16
1 Tira ineqcen. N Dawud.
Ḥḍa xafi, a Arebbi,
maɣar necc arekkwařeɣ ɣarek.
2 Řeɛmar inu tenna i SIDI:
“Cek d Sidi inu,
Cek d řxar inu, war din min xak yuɛřan!” ◘16:2 Ayub 22:2; 35:7; Rum. 11:35
3 X imqeddasen i izeddɣen x temmurt,
nitni d ayt n jjehd
zi ssibbet n marra arḍa inu i daysen iǧan.
4 Tamara n yinni iḍeffaren ammu deɣya
ijj n arebbi nneɣni ad ttwaktarent.
Necc war ttfarriɣeɣ tawhibt nsen
n useyyeb n idammen,
war ttidareɣ ismawen nsen
x iyencicen inu.
5 SIDI d tasɣart inu d řkas inu.
Cek tᵉṭṭfed taqedduḥt inu deg ufus nnec. ◘16:5 Igjd. 3:24
6 Ifiřan n řeɛbar kkaren ayi-dd
deg imucan iṣebḥen,
wah, tasɣart inu aqa tusa-dd xafi mliḥ.
7 Ad barkeɣ SIDI, wenni d ayi ineṣḥen.
Uřa s ǧiřet ssřemdent ayi tiẓẓař inu. ◼16:7 tiẓẓař - niɣ ‘tigeẓřin’.
8 Tteggeɣ SIDI řebda jar tiṭṭawin inu.
Umi Netta iǧa x ufus afusi inu,
necc war ttefcireɣ. ◘16:8 Řex. 2:25
9 S uya ifarreḥ uř inu,
ittarciq řeɛmar inu.
Wah, uřa d ddat inu ad iddar s řaman.
10 Maɣar Cek war tsemmḥed ca
di řeɛmar inu di řaxart,
war tᵉttarrid amtiqqi nnec ad ikiccu. ◘16:10 Izhd. 49:10; Řex. 2:31; 13:35
11 Cek ad ayi tessecned abrid n tudart,
tyawant zi řefraḥet
aqa-t zzat i wudem nnec,
nniɛmat aqa atent deg ufus nnec i řebda.
◘16:2 16:2 Ayub 22:2; 35:7; Rum. 11:35
◘16:5 16:5 Igjd. 3:24
◼16:7 16:7 tiẓẓař - niɣ ‘tigeẓřin’.
◘16:10 16:10 Izhd. 49:10; Řex. 2:31; 13:35