1 Umi kemmřen wussan ař Řɛid n Xemsin n Wussan, tuɣa aten marra jmiɛ munen. ◘2:1 Lawi 23:15; Aɛwd. 16:9; Řex. 1:14. 2 X ict n řɣefřet yusa-dd ijj n zzhir zeg ujenna, igga axmi d asemmiḍ ijehden aṭṭas, iccur marra taddart mani tuɣa qqimen. 3 Uca ḍharen asen-dd iřsawen am n tmessi nni ittemsebḍan, arsin x kuř ijjen zzaysen, 4 u marra nitni dewřen ccuren s Arruḥ Iqeddsen, bdan ad ssiwřen s ijj n yiřes nneɣni am mammec d asen iwca Arruḥ ad zzaysen neṭqen. ◘2:4 Mt. 3:11; Mk. 1:8; 16:17; Lk. 3:16; Yḥ. 14:26; 15:26; 16:13; Řex. 10:46; 11:15; 19:6.

5 Tuɣa ttɣiman di Urcalim iryazen nni ittegʷeden AREBBI, Udayen zi marra řegnus sadu ujenna. 6 Umi ikkar zzhir-a, imun marra řgens dinni uca tbehten, minzi kuř ijj tuɣa ittesřa asen ssawařen s yiřsawen nsen ifarzen. 7 Dehcen, tbehten marra, nnan jar asen: “Ma war ǧin marra ina inni din issawařen d Ijaliliyyen? 8 Mammec d asen nesřa neccin, kuř ijj zzaysen, ssawařen s yiřes i zi dd-netwaxřeq? 9 Ipartiyyen d Imidiyyen d Iɛilamiyyen d imezdaɣ n Misuputamya, tenni d tammurt jar tnayen n iɣezran, d Wudayen d inni zi Kappadukiya, inni dd-yusin zi jjwayeh n Punṭus d Asiya, 10 zi jjwayeh n Frixiya, Pamfiliya d Miṣra u zi jjwayeh n Libiya ɣar Qayrawan, uřa d inni dd-yusin zi Ruma, am Udayen am yinni idewřen d imɛacaren n ddin n Wudayen, 11 innidd-yusin zi Krita u zi Ɛarabiyya, aqa neccin nesřa asen ssawařen s yiřes nneɣ x řeɛjayeb imeqqranen n AREBBI!” 12 Marra tbehten uca nnan ijj i wenneɣni: “Min ixs ad yini man aya?” 13 Maca inneɣni sthezzan zzaysen, nnan: “Nitni swin binu n jdid.”

14 Awarni as ikkar Cimɛun Buṭrus, ak-d ḥiṭac n rrusul. Netta issgeɛɛed tmijja nnes, inna asen:

“Kenniw, a iryazen d Udayen u marra imezdaɣ n Urcalim, ittxeṣṣa ad snem aya, sřem ɣar wawařen inu! 15 Iwdan-a war scaren ca am mammec d awem ittɣiř, minzi aqa-tt d tasaɛɛet d třata n wass. 16 Maca aya min ittwannan zeg unabi Yuwil:

17 ‘Ad yiři deg wussan ineggura,

iqqar AREBBI,

aqa ad farrɣeɣ Arruḥ inu x marra ddat.

Ad nebban iḥenjiren nwem d tḥenjirin nwem,

ibřiɣen nwem ad twařan iweḥḥan,

uca imeqqranen nwem ad arjan tirja. ◘2:17 Ica. 44:3; Ḥiz. 11:19; 36:27; Yuw. 3:1-5; Zak. 12:10; Lk. 2:36; Yḥ. 7:3; Řex. 10:45; 21:9.

18 Uřa x imsexxaren inu u x tiyya inu

ad farrɣeɣ Arruḥ inu deg wussan nni,

uca ad nebban.

19 Ad wceɣ lmuɛjizat deg ujenna

uřa d řeɛřamat x temmurt:

idammen d tmessi d řefwar n ddexxan.

20 Ad tedweř tfuct ɣar taǧest,

d tziri ɣar idammen,

qbeř dd ɣa yas

wass imɣaren iɛuǧen n SIDI. ◘2:20 Mal. 3:23

21 Uca ad yiři,

aqa marra wi ɣa iřaɣan x Yisem n SIDI,

ad ittwassenjem!’ ◘2:21 Yuw. 3:1-5; Rum. 10:13.

22 A iryazen, ayt n Israil, sřem awařen-a: Yasuɛ Nnaṣiri, aqa-t d Bnadem i d awem dd-ittwasscanen zi AREBBI s tmegga timeqqranin d řeɛřamat d lmuɛjizat i yegga AREBBI s ufus nnes di řwesṭ nwem, am mammec tessnem kenniw, 23 aqa Wanita, wenni ittwaḥuzen i man aya i Netta ɛlaḥsab tussna n AREBBI qbeř u ɛlaḥsab řxaḍar nnes, aqa kenniw tsellmem t deg ifassen n iɛeffanen u tṣellbem t u tenɣim t. ◘2:23 Řex. 4:28; 5:30. 24 Maca issnekkar i-t-i-dd AREBBI uca issarxu iseɣwan n řaxart, maɣar war izemmar ad ittwaṭṭef di řaxart. ◘2:24 Řex. 10:40, 1 Ij. 3:16-28. 25 Minzi Dawud inna xas:

‘Tuɣa ttwařiɣ Sidi zzati di kuř amur,

aqa-t x yefus inu,

ḥima war ttmeyyiřeɣ. ◘2:25 Izhd. 16:8-11.

26 S uya ifarreh uř inu

uřa d asemɣar inu ifeyyeḍ s řefraḥet,

uřa d arrimet inu ad yareyyeḥ

x usitem wanita,

27 minzi war tᵉttejjid řeɛmar inu di řaxart,

uřa war tᵉttejjid Amsizdeg nnec ad ikiccu. ◘2:27 Izhd. 16:10; Izhd. 49:10; Řex. 13:35

28 Cek tessecned ayi abrid n Tudart,

Cek ad ayi teccured s řefraḥet

di lḥaḍar nnec.’ ◘2:28 Izhd. 16:8-11.

29 A iryazen tawmat, aqa teɛdeř ayi ad awem ssiwřeɣ s bṭayṭay x arrays n řejdud nneɣ Dawud, wenni aqa immut, ittwanḍeř, uca anḍeř nnes aqa-t ɣarneɣ ař ass-a. ◘2:29 1 Ij. 2:10; Řex. 13:36. 30 Maɣar netta tuɣa d anabi, issen belli AREBBI ijjuǧ as s ict n tjaǧit:

‘Ad ssɣimeɣ ijjen zi řɣiǧet n tɛeddist nnec

x řkursi n řɛarc nnes.’ ◘2:30 2 Ṣm. 7:12; Izhd. 132:11; Lk. 1:32; Řex. 13:23; Rum. 1:3; 2 Tim. 2:8.

31 Ammu tuɣa netta izwar iẓra uca issiweř x tnukra n Lmasiḥ, belli war ittwajji ca di řaxart uca arrimet nnes war tᵉttaci akiccu. ◘2:31 Izhd. 16:10; Řex. 13:35. 32 Yasuɛ wanita aqa issnekkar i-t-i-dd AREBBI u neccin marra d řechud nnes. ◘2:32 Yḥ. 15:27; Řex. 1:8. 33 Netta ittwassgeɛɛed ař afus afusi n AREBBI uca iṭṭef lwaɛd n Arruḥ Iqeddsen zi Babas. Aqa ifarreɣ tawhibt-a řexxu am mammec tᵉttwařam u tᵉttesřam. ◘2:33 Řex. 1:4; 5:31; 10:45; Fil. 2:9. 34 Dawud maca war igeɛɛed ca ɣar ijenwan, maɣar inna:

‘SIDI inna i Sidi inu:

Qqim x yefus inu, ◘2:34 Izhd. 110:1; 1 Kur. 15:25; Afa. 1:20; Ɛbr. 1:13.

35 ař d ɣa ggeɣ řɛedyan nnec

d tanebdat sadu iḍaren nnec.’ ◘2:35 Izhd. 110:1.

36 Ad tessen marra taddart n Israil nican, belli AREBBI igga Yasuɛ wanita, wenni tṣellbem kenniw, d SIDI d Lmasiḥ.”

37 Řami sřin man aya, tudef asen deg wuř nsen daxeř, nnan i Cimɛun u i rrusul nneɣni: “Min ɣa negg, a tawmat nneɣ?” ◘2:37 Zak. 12:10; Lk. 3:10; Řex. 9:6; 16:30. 38 Inna asen Cimɛun: “Tubem, ejj kuř ijjen zzaywem ad ittwasseɣḍeṣ s Yisem n SIDI Yasuɛ i weɣfar n ddnub, uca ad tqebřem tawhibt n Arruḥ Iqeddsen. 39 Minzi lwaɛd i kenniw u i tarwa nwem u i marra inni iǧan ɣar řaggʷaj, inni x i d ɣa iřaɣa AREBBI nneɣ.” ◘2:39 Yuw. 3:1; Afa. 2;13. 40 Uca s wawařen nneɣni aṭṭas tuɣa isseqneɛ u iɛřem asen, inna: “Nejmem zi taṣiřet-a ifarɣen.” 41 Tuɣa jar asen inni iwejden ad qebřen awař nnes uca ttwassɣeḍṣen nitni. Mmarnin-dd deg wass nni ɛřaḥař teřt-ařaf n řeɛmur.

42 Nitni qqimen ṣbaren di tɣuri n rrusul u carrcen di tẓaǧit u di tareẓẓit n weɣrum n nniɛmet.

43 Kuř ijjen tudef i-t tiggʷudi uca msarent lmuɛjizat d řeɛřamat aṭṭas s ifassen n rrusul di Urcalim. ◘2:43 Mk. 16:17; Řex. 5:12. 44 Marra inni yumnen tuɣa aten munen jmiɛ, u marra min ɣarsen tuɣa icarc. ◘2:44 Aɛwd. 15:4; Řex. 4:32. 45 Inni ɣar iǧa wagřa tuɣa zznuzan man aya uca beṭṭan arbeḥ ɛlaḥsab min iḥdaj kuř ijj. ◘2:45 Ica. 58:7; Řex. 4:35. 46 Tuɣa ttmunen kuř ass di Zzawect Tameqqrant s dmam d ijjen, ttareẓẓan aɣrum di tudrin, ksin macca nsen s řefraḥet u s wuř iṣfa, ◘2:46 Řex. 1:14; 20:7. 47 am ssemɣaran di AREBBI u tuɣa ttwassɛizzen ɣar marra iwdan. Kuř ass tuɣa Siditneɣ yarenni ɣar tmesmunt inni iwḍen ɣar Tudart. ◘2:47 Řex. 5:14; 11:21.