1 Awarni řami yarsa uɣuwweɣ, iřaɣa-dd Bulus x imeḥḍaren, iweddeɛ i-ten s usudem n wawmaten, uca iffeɣ ḥima ad iraḥ ɣar Makiduniya. 2 Řami icuq di jjwayeh nni, icejjeɛ i-ten s waṭṭas n wawařen, xenni yiweḍ ɣar Hillas, ixs ad yini ɣar jjihet Axaya. 3 Ařami isseɛdu din třata n iyuren, ssewjden as Wudayen ijj n řfex, umi tuɣa iggur ad ibeḥḥar ɣar Suriya. S uya igga ad yeɛqeb x webrid n Makiduniya. 4 Supatrus zi tendint n Biriya, Aristarxus d Sikundus zi Tissalunika, Xayus zi Dirbi, Timutiyu zi Listra u Ticikus d Trufimus zi Asiya uyuren akides ař Asiya. ◘20:4 Řex. 19:29; 21:29; 27:2; 1 Kur. 1:14; Afa. 6:21; Kul. 4:7, 10; 2 Tim. 4:12; Tit. 3:12. 5 Ina izwaren aneɣ, ttrajan aneɣ di Truwas. 6 Maca neccin neffeɣ zi Filippi, tandint tamezwarut n Makiduniya, awarni řami kemmřen wussan n Weɣrum břa Antun, nekka x řebḥar u di xemsa n wussan niweḍ-dd ɣar Truwas mani neqqim sebɛa n wussan.

7 Deg wass amezwaru n ssimana umi munen imeḥḍaren maḥend ad arẓen aɣrum n tnemmirt, issiweř Bulus akidsen. Isszugar Bulus di řhard nnes ař řwesṭ n ǧiřet, maɣar netta tuɣa inwa ad isafar tiwecca nnes. 8 Aqa areqqen din aṭṭas n řefnarat di tɣurfet n sennej i di tuɣa nmun. 9 Tuɣa din ijj n ubřiɣ qqaren as Utixus, iqqim di řkazi, ittesřa, řexdenni ikka xas yiḍeṣ yuǧeɣ am tuɣa Bulus isszugar di řhard nnes. Umi tuɣa iṭṭeṣ, iwḍa-dd zi ṭṭebqet wiss třata ɣar wadday, ksin t immut. 10 Maca Bulus ihwa, iwḍa xas, idarreɛ as, inna: “War tennexřiɛem ca, aqa dayes tudart.” ◘20:10 1 Ij. 17:21; 2 Ij. 4:34. 11 Xenni yuři ɛawed, yarẓa aɣrum, icca cwayt zzayes, xenni issiweř akidsen ɛad aṭṭas ařami d řefjar. Xas uca iruḥ isafar x temmurt, 12 am dd-iwyen nitni aḥenjir iddar, farḥen as aṭṭas.

13 Maca neccin nenya deg uɣarrabu, nbeḥḥar ɣar řmarsa n Tissus maḥend ad kidneɣ dd-nawi Bulus ssenni, am mammec tuɣa ittḍebbar, maɣar netta s yixef nnes ikka ɣar din x temmurt. 14 Ařami zzayes nareḥḥeb di Tissus, neksi t di tɣarrabut uca niweḍ-ḍḍ ɣar Mitilini. 15 Ssenni neɛdu tiwecca nnes ɣar tegzirt n Xiyus u farwecca nnes niwed ɣar Samus, neqqim di Truxiliyun. Deg wass awarni as niweḍ ɣar Militus, 16 minzi Bulus igga ad iɛdu Afasus x řebḥar ḥima war ittɛeṭṭař dinni, minzi tuɣa ittqeǧeq ḥima, meɛlik iɛeddeř, ad iɛeyyed Řɛid n Xemsin n Wussan di Urcalim. ◘20:16 Řex. 21:4, 12.

17 Zi Militus ijja ad dd-asen imɣaren n tmesmunt di Afasus. 18 Řami dd-usin ɣares, inna asen:

“Kenniw tessnem zeg wass amezwaru umi dd-udfeɣ ɣar Asiya, mammec ǧiɣ akidwem marra ussan, 19 am tuɣa ttsexxareɣ i AREBBI s marra awaḍeɛ u s imeṭṭawen, uřa deg iɣekkwan i xafi ikkin zi ssibbet n tmeɛmač n Wudayen. 20 War jjiɣ ca zi min inefɛen i řeɛmur nwem war d awem t barrḥeɣ, war t ssřemdeɣ di řeswaq u di tudrin, 21 am ssqenɛeɣ Udayen d Iramiyyen maḥend ad dd-dewřen ɣar AREBBI, ad amnen di Siditneɣ Yasuɛ Lmasiḥ. ◼20:21 Iramiyyen - di řmaxtuṭṭat s yiřes n L’Yunan ittwari ‘Iyunaniyyen’.  ◘20:21 Mt. 3:2; Mk. 1:15; Lk. 24:47. 22 U řexxu ad raḥeɣ ɣar Urcalim am ttwacarfeɣ zi Arruḥ, war ssineɣ min d ayi ittrajan din, 23 mɣir aqa Arruḥ Iqeddsen iched ayi di kuř tandint, iqqar: ‘Aqa iceddiyyen d řemḥayem ttrajan cek!’ 24 Maca necc war ḥessbeɣ tudart inu ca tiɣřa i yixef inu, maḥend ad kemmřeɣ ticři inu d řxedmet n tsexxart i ksiɣ zi Siditneɣ Yasuɛ ḥima ad cehdeɣ x Řexbar Aṣebḥan n arḍa n AREBBI. ◘20:24 Řex. 21:13; Gal. 1:1; Tit. 1:3. 25 U řexxu ssneɣ, aqa uřa d ijj zzaywem ad iẓar aɣembub inu ɛad, marra kenniw inni jar awem ggureɣ, ttbarrḥeɣ s Tgeldit n AREBBI.

26 S uyenni ad xawem cehdeɣ ass-a, belli necc ttbarriɣ ixef inu zeg idammen nwem marra. 27 Minzi war ɛgizeɣ ad awem ssecneɣ marra min ittexs AREBBI. 28 S uyenni ḥḍam x yixef nwem u x tḥimart tmun min xef igga Arruḥ Iqeddsen kenniw d imeḥḍayen, ḥima ad tarwesem tamesmunt n Lmasiḥ tenni d ikesseb s Idammen nnes. ◘20:28 Afa. 1:7; Kul. 1:14; 1 Bṭ. 1:19; 5:2; Asa. 5:9.

29 Minzi ssneɣ belli awarni twaḥit inu ad ɣarwem dd-adfen wuccanen imuzzaren inni war ittejjin taḥimart. ◘20:29 2 Bṭ. 2:1. 30 Ɛad ad zzaywem dd-kkaren yeryazen inni i ɣa issiwřen řhard iɛewwjen ḥima ad ssuffɣen imeḥḍaren zeg webrid, ad ten jarren awarni asen. ◘20:30 Izhd. 41:10; Mt. 16:21; Řex. 1:17; 1 Yḥ. 2:19. 31 S uyenni faqem, tɛeqřem belli třata n iseggʷusa, ǧiřet d wass, war beddeɣ ad ssmeḥdeɣ kuř ijjen zzaywem s imeṭṭawen.

32 U řexxu ad kenniw sellmeɣ i AREBBI u i wawař n arḍa nnes, i Wenni ɣar iǧa tizemmar ḥima ad kenniw ibna u ad awem iwc řwart ak-d marra imqeddasen. 33 War ḍmiɛeɣ di nnuqart niɣ deg wureɣ niɣ deg warruḍ uřa zeg ijjen. ◘20:33 1 Kur. 9:12; 2 Kur. 11:9; 12:13. 34 Kenniw tessnem simant nwem belli ifassen inu aqa xedmen i min ḥwajeɣ u i min ḥwajen inni iǧan akidi. ◘20:34 Řex. 18:3; 1 Kur. 4:12; 1 Ts. 2:9; 2 Ts. 3:8. 35 Di kuřci ssecneɣ awem belli ittxeṣṣa, am nxeddem ammu, ad newc afus i yinni iḍeɛfen uca ad nfekkar deg wawařen n Siditneɣ Yasuɛ, belli inna: ‘Sseɛd n wenni iwcin x wenni iksin.’ ”

36 Awarni řami inna aya, iwḍa x ifadden nnes, iẓẓuǧ u marra iryazen akides. ◘20:36 Řex. 21:5. 37 Aqa din jar asen aṭṭas n imeṭṭawen uca darrɛen as, ssudmen t. 38 Ceḍnen aṭṭas, amezwar n marra x wawař i inna, belli war ẓarren ca aɣembub nnes ɛad, uca ssqebbḍen t ɣar uɣarrabu. *