1 Bulus, rrasul ittwařaɣan d ittwasekken n Yasuɛ Lmasiḥ ɛlaḥsab min ixs AREBBI, d tawmat Sustinis, ◼1:1 rrasul - niɣ ‘amazan’. 2 i tmesmunt n AREBBI i iǧan di Kurintus, inni ittwařaɣan d inni d imqeddasen, inni ittwaqeddsen di Yasuɛ Lmasiḥ, u i marra inni mani ma ittřaɣan x Yisem n Siditneɣ Yasuɛ Lmasiḥ, wenni d Siditsen d Siditneɣ. ◘1:2 Yḥ. 17:19; Řex. 15:9; Rum. 1:7; Afa. 1:1; 1 Ts. 4:7; 2 Tim. 2:22. 3 Ad xawem yiři arḍa d řehna zi AREBBI, Babatneɣ, u zi Siditneɣ Yasuɛ Lmasiḥ. ◘1:3 Rum. 1:7; 2 Kur. 1:2; Afa. 1:2; 1 Bṭ. 1:2.

4 Necc řebda ttqadiɣ AREBBI inu di ṭṭweɛ nwem x arḍa n AREBBI i d awem immewcen di Yasuɛ Lmasiḥ. 5 Minzi di marra tdewřem zzayes d ttujjar, di marra awař u di marra tussna, ◘1:5 Kul. 1:9. 6 maɣar cchadet n Lmasiḥ tᵉttwaḍmen daywem, 7 minzi uřa d ijj n zzɛaf n tewhibin nnes war daywem iqqim, am tᵉttrajam asargab n Siditneɣ Yasuɛ Lmasiḥ, ◘1:7 Fil. 3:20; Tit. 2:13. 8 Minzi Netta ad kenniw iḍmen ɛawed ɣar uneggar, ḥima ad tiřim břa řɛib deg wass n Siditneɣ Yasuɛ Lmasiḥ. ◘1:8 1 Ts. 3:13; 5:23. 9 AREBBI d amtiqqi, d wenni zi tᵉttwařaɣam kenniw ɣar tmunt ak-d Mmis Yasuɛ Lmasiḥ, Siditneɣ. ◘1:9 Irm. 32:40-44; Yḥ. 15:5; 1 Kur. 10:13; Gal. 2:20; 1 Ts. 5:24; 1 Yḥ. 1:3.

10 Maca ttzawageɣ kenniw, a aytma, s Yisem n Siditneɣ Yasuɛ Lmasiḥ, ad tessiwřem marra s ijj n wawař, war tᵉttemsebḍim jar awem, maca iřim tmunem nican s nneyyet d icten d uxarreṣ d ijjen. ◘1:10 Rum. 12:16; 15:5; Fil. 2:2; 3:16; 1 Bṭ. 3:8. 11 Minzi ssargben ayi inni zi taddart n Kluwi, a aytma inu, belli jar awem imenɣan. 12 Xseɣ ad iniɣ, aqa ca zzaywem qqaren: ‘Necc aqa ayi zi Bulus!’ u ca nneɣni: ‘Necc zi Apullus!’, u ca nneɣni ɛawed: ‘Necc zi Kifa!’, u ca nneɣni qqaren: ‘Necc zi Lmasiḥ!’ ◘1:12 Řex. 18:24; 1 Kur. 3:4; 16:12. 13 Ma aqa Lmasiḥ ittwabḍa d iwetwiten? Ma tuɣa Bulus ittwaṣelleb di ssibbet nwem? Niɣ tuɣa kenniw tᵉttwassɣeḍṣem s yisem n Bulus? 14 Necc ttqadiɣ AREBBI inu war ssɣeḍṣeɣ uřa d ijj zzaywem mɣir Krispus d Xayus waha, ◘1:14 Řex. 18:8; Rum. 16:23. 15 ařami uřa d ijjen ad yini belli ssɣeḍṣeɣ deg yisem inu. 16 Ɛawed ssɣeḍṣeɣ tawacunt n Stifanus, xenni war ssineɣ ca, ma ssɣeḍṣeɣ ḥed nneɣni. ◘1:16 1 Kur. 16:15, 17. 17 Maɣar Lmasiḥ war d ayi dd-issekk ḥima ad ssɣeḍṣeɣ, maca ḥima ad barrḥeɣ s Řexbar Aṣebḥan, war iǧi s tiɣit n wawařen, ḥima war ittᵉttwassbeṭṭeř ṣṣalib n Lmasiḥ. ◘1:17 1 Kur. 2:1, 4; 2 Bṭ. 1:16.

18 Minzi awař n ṣṣalib d tubbuheřya di tiṭṭawin n yinni i ɣa iweddaren, maca i neccin, inni iddaren, man aya d jjehd n AREBBI. ◘1:18 Rum. 1:16. 19 Minzi tura:

“Ad areddǧeɣ tiɣit n imiɣisen

uca ad kkseɣ řefhamet n ifehhamen.” ◘1:19 Ayub 5:12; Ica. 29:14.

20 Mani iǧa umiɣis? Mani iǧa umseřmad n idlisen? Mani iǧa bu-umḥarweḍ n ddunect-a? Ma war isscen AREBBI belli tiɣit n ddunect-a d tubbuheřya? ◘1:20 Ica. 33:18. 21 Minzi di tiɣit n AREBBI, ddunect war tessin ca AREBBI zi ssibbet n tiɣit n yixef nnes, aqa tuɣa yarḍa AREBBI ad iwc Tudart i yinni yumnen s tubbuheřya n tbarreḥt. ◘1:21 Mt. 11:25; Lk. 10:21. 22 Minzi Udayen ttaren řeɛřamat u Iramiyyen arezzun tiɣit, ◘1:22 Mt. 12:38; 16:1; Yḥ. 4:48. 23 maca neccin nettbarreḥ Lmasiḥ, d wenni ittwaṣellben, aqa-t d taɛenkrift i Wudayen, d tubbuheřya i Iramiyyen, ◘1:23 Mt. 11:6. Yḥ. 6:60, 66. 24 maca i yinni ittwařaɣan, am Wudayen am Iramiyyen, aqa Lmasiḥ d jjehd n AREBBI d tiɣit n AREBBI. ◘1:24 Kul. 2:3. 25 Minzi tubbuheřya n AREBBI d tmiɣist x iwdan, u tuḍɛeft n AREBBI tejhed x iwdan.

26 Xenni, a aytma, xzarem mammec teǧam ɣar wass n třaɣit nwem, aqa war teǧim d aṭṭas n imiɣisen ɛlaḥsab bnadem, niɣ d aṭṭas n yinni ɣar teǧa ṣṣulṭa, niɣ d aṭṭas n tarwa n taṣiřet. ◘1:26 Yḥ. 7:48; Yaɛ. 2:5. 27 Maɣar AREBBI aqa ifarz ibuhařiyyen n ddunect, ḥima ad zzaysen isseḥcem imiɣisen, uca imuḍɛifen n ddunect ifarz i-ten AREBBI, ḥima ad zzaysen isseḥcem ayt n bu-ṣṣulṭa. 28 uca yinni dd-ixeřqen am war ɣarsen ca di ddunect, d yinni ittwasseḥqaren, d yinni war iǧin d ca, aqa ifarz i-ten AREBBI, ḥima ad ibḍeř inni iǧan d ca, 29 ḥima uřa d ijj n bnadem n weysum, war ittfeyyec ca zzates. 30 Maca kenniw teǧam zzayes di Yasuɛ Lmasiḥ, wenni d aneɣ idewřen d tiɣit n AREBBI d tsegda d tuqeddsi d usenjem, ◘1:30 Irm. 23:5; Yḥ. 17:19. 31 am mammec tura: “Ejj wenni issemɣaran, ad issemɣar di SIDI.” ◘1:31 Ica. 65:16; Irm. 9:22-23; 2 Kur. 10:17.