1 Cimɛun Buṭrus, amsexxar d rrasul n Yasuɛ Lmasiḥ, i inni ittwaḥesben am neccin ssdaheǧen l’iman s tsegda n Siditneɣ d Umsenjem nneɣ, Yasuɛ Lmasiḥ, ɛlaḥsab ccan d ijjen akidneɣ.

2 Arḍa d řehna ad ɣarwem mmarenyen xmi i ɣa tessnem Siditneɣ, Yasuɛ Lmasiḥ, ◘1:2 Yḥ. 17:3; Rum. 1:7; 1 Bṭ. 1:2; Yah. 2. 3 am Wenni iwcin marra min iǧan zi jjehd n AREBBI, maḥend ad yiwi Tudart d tiggʷudi zi AREBBI s tussna n Wenni d aneɣ dd-iřaɣan ɣar uɛuǧi nnes d lɛaḍama nnes, 4 d Wenni zzayes Netta iwca awem lwuɛud imɣaren iɣřan aṭṭas, ḥima ad zzaysen tcarcem di ṭṭbiɛet nnes n AREBBI, am tᵉttrakkʷarem zi nnecwat iɣeccen i yeǧan di ddunect. ◘1:4 Ica. 56:5; Yḥ. 1:12; Rum. 8:15; Gal. 3:26.

5 Am teǧa tmesřact ammu, arnim s marra cḍaret i l’iman nwem tcuni ifeyyḍen, i tcuni nwem ifeyyḍen tussna, 6 i tussna řewɛaret, i řewɛaret ṣṣbar, i ṣṣbar tiggʷudi zi AREBBI, 7 i tiggʷudi zi AREBBI tayri i wawmaten u i tayri i wawmaten tayri. 8 Mařa ttwafent daywem timesřayin-a uca ad daywem feyyḍent, war kenniw ttejjint texwam niɣ břa řɣiǧet di tussna n Siditneɣ Yasuɛ Lmasiḥ. ◘1:8 Tit. 3:14.

9 Minzi wenni war ɣar ǧint tmesřayin-a, aqa iddarɣeř, minzi war ittwiři illa ittu asizdeg n ddnub nnes inni tuɣa xas. ◘1:9 Ica. 59:10; Ṣaf. 1:17. 10 S uyenni, a aytma, cḍarem ktar ḥima ad tḍemnem tařaɣit d usixḍar nwem s řexdayem tiṣebḥanin, minzi mařa teggem aya, xenni ɛemmarṣ ad tenqarḍem. 11 Minzi ammu i d awem ɣa immarni s waṭṭas wadaf icnan ɣar tgeldit ittduman n Siditneɣ d Umsenjem nneɣ, Yasuɛ Lmasiḥ.

12 S uyenni war ttejjiɣ ad kenniw ssɛeqřeɣ zi man aya řebda, waxxa kenniw tessnem u aqa kenniw tbeddem x dsas n tidett tanita. 13 Maca ittɣiř ayi nican min ɣa kkeɣ ɛad di arrimet-a, ḥima ad kenniw ssfaqeɣ am ssɛeqřeɣ kenniw, ◘1:13 2 Bṭ. 3:1. 14 minzi ssneɣ aqa takessit n arrimet inu ad dd-tas deɣya, am mammec d ayi issargeb Siditneɣ Yasuɛ Lmasiḥ. ◘1:14 Yḥ. 21:18, 19; 2 Tim. 4:6. 15 Maca ad ggeɣ tizemmar, ḥima ad tɛeqřem x tmesřayin-a awarni uffuɣ inu.

16 Minzi neccin war neḍfar ca tiḥuja isaysen, umi tuɣa d awem nettbarreḥ jjehd d twasit n Siditneɣ Yasuɛ Lmasiḥ, maca aqa neched s tiṭṭawin nneɣ x lɛaḍama nnes. ◘1:16 Mt. 17:1; Yḥ. 1:14; 1 Kur. 1:17; 2:1, 4; 4:20; 1 Yḥ. 1:1. 17 Minzi Netta aqa iṭṭef zi AREBBI Babas ccan d uɛuǧi umi d as dd-tusa tmijja-ya zeg uɛuǧi i dd-yusin ak-d lɛaḍama nnes: “Wa d Mmi inu iɛizzen wenni dayes ufiɣ arḍa inu.” ◘1:17 Mt. 3:17; 17:5; Mk. 1:11; 9:7; Lk. 3:22; 9:35; Kul. 1:13. 18 Uřa d neccin nesřa tmijja-ya zeg ujenna, umi tuɣa issawař akides, řami neǧa akides x wedrar iqeddsen. 19 Uřa d neccin ɣarneɣ awař d tidett n inabiyyen, u kenniw ad teggem mliḥ mařa tewcim taynit i wawař nni am i yijj n řefnar yareqqen deg ijj n wemcan ibbubbes, ař ɣa idduqqez wass uca ad tenqar tfuct deg wuřawen nwem. ◘1:19 2 Kur. 4:6; Asa. 22:16. 20 Amezwar ittxeṣṣa kenniw ad tessnem aqa war din uřa d ict n nnubuwa tᵉnnufseř x tira nnes iqeddsen. 21 Minzi min ittwanabben war dd-itteffiɣ ɛemmarṣ zi min ixs bnadem, maca yusa-dd zeg uqemmum n yeryazen iqeddsen n AREBBI nni issiwřen am d asen dd-indeh Arruḥ Iqeddsen. ◘1:21 2 Tim. 3:16.