Yahuda
1
1 Yahuda, amsexxar n Yasuɛ Lmasiḥ, d umas n Yaɛqub.
I řegnus ittwařaɣan, inni ittwaɛizzen zi AREBBI, Babatneɣ, d inni ittwaḥḍan zi Yasuɛ Lmasiḥ. 2 Iři ad ɣarwem tᵉmmarni arreḥmet d řehna d tayri.
3 A imɛizzen inu, umi ceṭṭareɣ maḥend ad awem dd-ariɣ x Tudart nneɣ imunen, aqa ufiɣ belli ittxeṣṣa ayi ad awem dd-ariɣ s uziyyar, ḥima ad tᵉmmenɣem s jjehd x l’iman i immewcen ict n twařa i řebda i imqeddasen. 4 Minzi ca n iwdan xtuttřen ɣar daxeř, inni tuɣa ittwazemmemen i řḥukm-a qbeř: aqa nitni d iɛeffanen, inni ibeddřen arḍa n AREBBI nneɣ deg ijj n nnɛi n ufucceḥ, uca nekkaren ayenni n Sidi AREBBI d Siditneɣ Yasuɛ Lmasiḥ. ◘1:4 1 Bṭ. 2:8; 2 Bṭ. 2:1, 3.
5 Maca xseɣ ad kenniw ssɛeqřeɣ, aqa marra kenniw tessnem man aya mliḥ, belli AREBBI, umi ifekk řgens zi temmurt n Miṣra, tuɣa isshellek awarni man aya inni war yuminen ca. ◘1:5 Řxř. 14:29; 26:64, 65; Izhd. 106:26; 1 Kur. 10:5; Ɛbr. 3:17. 6 Uca lmalakat nni war ḥḍint aweqqar nsen amezwaru, maca jjint tazeddiɣt nsen, aqa Netta iḥḍa xasen s ssnaseř war ittwiřin sadu taǧest i řḥukm n wass ameqqran, ◘1:6 2 Bṭ. 2:4. 7 am mammec Sadum d Ɛamurra d tneddam i d as dd-innḍen, mani ggin nitni farq-ccɣeř s webrid d ijjen am ggint tina s tnayen u ḍfarent ddat nneɣni, aqa ttwammarsent d imedya n tmessi ittduman, ttwaḥekment ɣar ccreɛ. ◘1:7 Amz. 19:24; Aɛwd. 29:22; Ica. 13:19; Irm. 50:40; Ḥiz. 16:49; Ḥuc. 11:8; Ɛam. 4:11; Lk. 17:29; 2 Bṭ. 2:6.
8 Amenni ɛawed i ɣa hellken ina, inni issexmajen ddat am dd-ttadfen di tirja, inni immenḍaren ṣṣulṭa n ijenwan uca ttceqqafen deg uɛuǧi nnes.
9 Maca řami tuɣa issawař Mixayil, azeǧif n lmalakat, ak-d ibřis x arrimet n Musa, war xas iḥkim s ijj n řḥukm ittceqqafen, maca inna: “SIDI ad cek ixeǧeṣ!” ◘1:9 Dan. 10:13; 12:1; Zak. 3:2; 2 Bṭ. 2:11; Asa. 12:7. 10 Maca ina ttceqqafen di marra min war ssinen, uca s tmesřayin i ɣar ttwajebbden nitni am imuddaren ignawen ɛlaḥsab ṭṭbiɛet nsen, aqa areddǧen nitni ixef nsen. ◼1:10 imuddaren - ixs ad yini ‘iwdan’ d ‘lḥayawanat’ d marra min iddaren nni izemmar ad yuyur. ◘1:10 2 Bṭ. 2:12. 11 Uct xasen, minzi nitni uyuren abrid n Qayin uca umi ttmeẓren di řmunet ḍfaren nitni aɣekkwi n Balɛam u ttwahelken deg uɣewweɣ n Kurax. ◘1:11 Amz. 4:8; Řxř. 16:1; 22:7, 21; 2 Bṭ. 2:15;1 Yḥ. 3:12.
12 Ina d inni issfeṭṭaḥen ixef nsen s unecwet nsen, war ttseḍḥin ca ad ɣebban. Aqa aten d iseynuten břa anẓar, ttwaɛarrnen zi ssa ɣar diha s usemmiḍ, aqa aten d ticejjura nni di teǧa řɣiǧet nsent tweddar, aqa war daysent teǧi bu řɣiǧet, mmutent wiss martayen uca ttwaqeřɛent zeg iẓewran nsent. ◘1:12 2 Bṭ. 2:13, 17. 13 Nitni d řemwaj n řebḥar ihajen, inni issusufen ikuffan n řefḍiḥet nsen, aqa aten d itran weddaren, inni umi tᵉttwassewjed tubbarcent n taǧest i řebda. ◘1:13 Ica. 57:20.
14 Maca Ḥanux, wenni d wiss sebɛa zi Adam, inebba xasen, inna: “Xzar, SIDI ad dd-yas ak-d řuřuf n řuřuf n imqeddasen nnes, ◘1:14 Amz. 5:18; Dan. 7:10; Řex. 1:11; 1 Ts. 1:10; 2 Ts. 1:10; Asa. 1:7. 15 ḥima ad igg řḥukm nnes x marra iwdan zi ssibbet n marra timegga n yinni iggin tuɛeffna, u zi ssibbet n wawařen iqesḥen i zi ssiwřen imednab iɣeccacen.” ◘1:15 Mt. 12:36.
16 Ina ttɛekkasen, ttcetcan x kuř ddab n ssibbet, am gguren ɣar nnecwat nsen, aqemmum nsen issawař s tmesřayin tiɛeffanin ař ṭṭarf, tteggen tiqedduḥin i iwdan i tizi n yixef nsen. ◘1:16 2 Bṭ. 2:18.
17 Maca kenniw, a imɛizzen inu, ɛeqřem awařen i izzar ssiwřen zzaysen rrusul n Siditneɣ Yasuɛ Lmasiḥ, ◼1:17 rrusul - niɣ ‘imazanen’. 18 inni d awem innan, aqa deg uneggar n zzmanat ad din iřin imestehzayen, inni i ɣa iḍfaren řeqjahet ɛlaḥsab nnecwat nsen. ◘1:18 Řex. 20:29; 1 Tim. 4:1; 2 Tim. 3:1; 4:3; 2 Bṭ. 2:1; 3:3. 19 Aqa d yina d inni ifarrzen ixef nsen am iwdan iḍeffaren ṭṭbiɛet n yixef nsen, minzi war ɣarsen bu Arruḥ.
20 Maca kenniw, a imɛizzen inu, ttwabnam zeg Uzeǧif di l’iman nwem iqeddsen s Arruḥ Iqeddsen, am teẓẓaǧam. 21 Ejj aneɣ ad neḥḍa ixef nneɣ di tayri n AREBBI am nᵉttraja arreḥmet n Siditneɣ Yasuɛ Lmasiḥ i Tudart nneɣ ittduman. 22 Qeřɛem ca zzaysen zi tmessi. 23 Mařa tuben nitni, secnem asen arreḥmet, maca ak-d tiggʷudi, wah, ɛiffem ɛad zi tcamir i ittwassxemjen zeg weysum.
24 Maca i Netta, wenni izemmaren ad aneɣ iḥḍa břa aneqřaḍ u břa řexmej u wenni ad aneɣ yegg ad nbedd nican břa řɛib zzat i uɛuǧi nnes s řefraḥet 25 - aqa Netta d AREBBI weḥḥdes, Amsenjem nneɣ - aqa i Netta dd-ittas usemɣar d řɛezz d ccan d lɛaḍama, am řexxu am i řebda qaɛ. Amin. ◘1:25 Rum. 16:27; 1 Tim. 1:17.
◘1:4 1:4 1 Bṭ. 2:8; 2 Bṭ. 2:1, 3.
◘1:5 1:5 Řxř. 14:29; 26:64, 65; Izhd. 106:26; 1 Kur. 10:5; Ɛbr. 3:17.
◘1:7 1:7 Amz. 19:24; Aɛwd. 29:22; Ica. 13:19; Irm. 50:40; Ḥiz. 16:49; Ḥuc. 11:8; Ɛam. 4:11; Lk. 17:29; 2 Bṭ. 2:6.
◘1:9 1:9 Dan. 10:13; 12:1; Zak. 3:2; 2 Bṭ. 2:11; Asa. 12:7.
◼1:10 1:10 imuddaren - ixs ad yini ‘iwdan’ d ‘lḥayawanat’ d marra min iddaren nni izemmar ad yuyur.
◘1:10 1:10 2 Bṭ. 2:12.
◘1:11 1:11 Amz. 4:8; Řxř. 16:1; 22:7, 21; 2 Bṭ. 2:15;1 Yḥ. 3:12.
◘1:12 1:12 2 Bṭ. 2:13, 17.
◘1:13 1:13 Ica. 57:20.
◘1:14 1:14 Amz. 5:18; Dan. 7:10; Řex. 1:11; 1 Ts. 1:10; 2 Ts. 1:10; Asa. 1:7.
◘1:16 1:16 2 Bṭ. 2:18.
◼1:17 1:17 rrusul - niɣ ‘imazanen’.
◘1:18 1:18 Řex. 20:29; 1 Tim. 4:1; 2 Tim. 3:1; 4:3; 2 Bṭ. 2:1; 3:3.
◘1:25 1:25 Rum. 16:27; 1 Tim. 1:17.