Adlis Iqeddsen Amezwaru 4

Qayin d Habil

1 Issen Adam Ḥawwa, tamɣart nnes, uca teysi s ddeyset uca turuw-dd Qayin, tenna “Jjiɣ-dd aryaz, d SIDI!” ◼ 2 Xenni ɛawed turuw-dd umas Habil. Tuɣa Habil d ameksaw n wuǧi u Qayin iruḥ ixeddem tammurt. ◼

3 Uca awarni ussan imsar belli Qayin iqeddem ict n tewhibt zi řɣiǧet n wudem n temmurt i SIDI. 4 Iqeddem Habil ɛawed ict n tewhibt zeg imenza n wuǧi nnes, zeg inni ɣar iǧa tadunt aṭṭas. Ixzar SIDI ɣar Habil d tewhibt nnes, ◘ 5 maca ɣar Qayin d tewhibt nnes war d as yarri ca taynit. Uca ixeyyeq Qayin aṭṭas, inneqřeb as uɣembub. 6 Inna SIDI i Qayin: “Mayemmi txeyyqed? Mayemmi d ac inneqřeb uɣembub? 7 Mařa teggid mliḥ, ma war din ittiři usgeɛɛed, u mařa war teggid mliḥ, ddenb aqa-t izzeř ɣar tewwart? Meẓri nnes ɣarek, maca ittxeṣṣa cek ad xas tseǧḍed.” 8 Issiweř Qayin ak-d Habil umas. Uca imsar am ǧan nitni deg iyyar, belli Qayin ikkar ɣar umas Habil uca inɣa i-t. ◘

9 Xenni inna SIDI i Qayin: “Mani iǧa umac Habil?” Inna: “War ssineɣ. Ma necc d ameḥḍay x uma?” 10 Uca inna Netta: “Min teggid? Aqa tmijja n idammen n umac sɣuyyun-dd ɣari zi temmurt. ◘ 11 Řexxu, aqa cek d menɛuř zi temmurt, tenni yarezmen aqemmum nnes, ḥima ad teqbeř idammen n umac zeg ifassen nnec. 12 Xmi ɣa txedmed x temmurt, war ttᵉdikkʷiř ad ac tewc marra jjehd nnes uca cek ad tiřid d amennejru d ametluɛ di temmurt.” ◘ 13 Xenni inna Qayin i SIDI: “Lɛiqab inu imɣar aṭṭas x tzemmar inu. 14 Aqa Cek ass-a tuẓẓřed xafi zeg uɣembub n temmurt-a uca zeg uɣembub nnec ad ttwaffare. Ad iřiɣ d amennejru d ametluɛ di temmurt uca ad yiři marra wenni d ayi ɣa yafen ad ayi ineɣ.” ◘ 15 Xenni inna as SIDI: “S uya marra wenni i ɣa inɣen Qayin, ad zzayes xeřfen sebɛa n twařawin.” Uca igga SIDI řeɛřamet i Qayin belli marra wenni t ɣa yafen war t ineqq.

Tarwa n Qayen

16 Xenni iffeɣ-dd Qayin zeg wudem n SIDI uca iruḥ izeddeɣ di temmurt n Nud, ccarq n Ɛadn. ◼ 17 Issen Qayin tamɣart nnes uca teysi s ddeyset uca turuw as-dd Ḥanux. Tuɣa Qayen ibna ict n tendint uca iřaɣa as i tendint am yisem n mmis Ḥanux. ◼ 18 Ḥanux ijja-dd Ɛirad, u Ɛirad ijja-dd Miḥuya’il u Miḥuya’il ijja-dd Matuca’il u Matuca’il ijja-dd Lamak. ◼ 19 Imřec Lamak tnayen n temɣarin. Icten qqaren as Ɛada, tenneɣni qqaren as Ṣilla. ◼ 20 Turuw-dd Ɛada Yabal. Netta idweř d babatsen i imezdaɣ n iqiḍan u i imeksawen n řebhayem. ◼ 21 Isem n umas tuɣa d Yubal wenni tuɣa d babatsen i marra inni ittiraren řgambri d temja. ◼ 22 Ṣilla turuw-dd ɛawed Tubal-Qayin, amziř n imziřen n marra inni ixeddmen s nnḥas d wuzzař. Učmas n Tubal-Qayin tuɣa d Naɛma. ◼

23 Inna Lamak i temɣarin nnes, Ɛada d Ṣilla: “Sřent i tmijja inu, a timɣarin n Lamak! Sřent ɣar min ɣa iniɣ. Aqa nɣiɣ aryaz i uyezzim inu d uḥenjir i uyeddim inu! 24 Aqa ad xeřfen zi Qayin sebɛa n twařawin, maca zi Lamak sebɛa u-sebɛin n twařawin.” ◘

Axřaq n Cit

25 Yudef Adam ɛawed x tamɣart nnes uca turuw-dd nettat aḥenjir. Třaɣa as Cit, minzi tenna: “AREBBI iwca ayi zzariɛet nneɣni deg wemcan n Habil, minzi Qayin inɣa i-t.” ◼ 26 Uřa i Cit ittwaxřeq-dd useymi, uca igga as Anuc. Řexdenni ibda bnadem s uřaɣi x Yisem n SIDI.

Wa d adlis ittwanḍen n imezruyen n yinni dd-ittwaxeřqen zi Adam. ◼

◼4:1 4:1 Qayin - isem wanita ixs ad yini ‘agřa’ niɣ ‘min ittwakessben’.

◼4:2 4:2 Habil - isem wanita ixs ad yini ‘tayyut’ niɣ ‘amedlu’ niɣ ‘řefwar’ niɣ ‘min iɛeddun’ niɣ ‘min ifennan’. S uyenni idweř isem nnes d aceyyar ɣar min d as i ɣa imsaren umi i d as inɣa umas. Ad tefna tudart nnes deɣya am ict n tayyut tɛeddu. ameksaw - niɣ ‘aniči’.

◘4:4 4:4 Ɛbr. 11:4.

◘4:8 4:8 Mt. 23:35; 1 Yḥ. 3:12; Yah. 11.

◘4:10 4:10 Ɛbr. 12:24.

◘4:12 4:12 Awřn. 28:17.

◘4:14 4:14 Ayub 15:20, 21.

◼4:16 4:16 Nud - isem wanita ixs ad yini ‘atlaɛ’ niɣ ‘aweddar’ niɣ ‘tarewřa’ (xzar Izhd. 56:9).

◼4:17 4:17 Ḥanux - isem wanita ixs ad yini ‘wenni ittceṭṭaren’ niɣ ‘wenni ikemmřen’. Tuɣa Ḥanux d ijj n bnadem s wuř ikemmřen ɣar Arebbi.

◼4:18 4:18 Ɛirad - isem wanita ittqennan ak-d ‘Ɛarad’ (xzar Řxř. 21:1). Ad taɣ ad yiři řmeɛna nnes ‘ɛzeř’ niɣ ‘arweř’. Inneɣni qqaren aqa dayes řmeɛna ‘amezduɣ n tendint’. Miḥuya’il - isem wanita ixs ad yini ‘wenni ittwawten zi Arebbi’. Matuca’il - ad taɣ ad yiři řmeɛna n yisem wanita ‘aryaz n Arebbi’ niɣ ‘min iɛna Arebbi?’ Inneɣni qqaren aqa-t d ‘aryaz n taẓaǧit’. Lamak - ad taɣ ad yiři řmeɛna n yisem-a ‘wenni ijehden’.

◼4:19 4:19 Ɛada - isem wanita ixs ad yini ‘tunger’ niɣ ‘aẓri’. Uřa d tamɣart n Ɛisu řaɣan as s yisem-a (xzar Amz. 36:2, 4 u Amz. 26:34, 35). Ṣilla - isem wanita ixs ad yini ‘tiři’.

◼4:20 4:20 Yabal - isem wanita ixs ad yini ‘iɣzar’ niɣ ‘aman ittazzřen’. imeksawen - niɣ ‘iničan’.

◼4:21 4:21 Yubal - isem wanita ixs ad yini ‘yeɣzar’ niɣ ‘tammurt yuffen’.

◼4:22 4:22 Tubal-Qayin - ad taɣ isem-a wanita ixs ad yini ‘amziř, maca řmeɛna war iǧi itwassnen nican. Naɛma - isem wanita ixs ad yini ‘iɛizzen’ niɣ ‘yarḍan’.

◘4:24 4:24 Amz. 4:15.

◼4:25 4:25 Cit - isem wanita ixs ad yini ‘wenni ikessin amcan n wenneɣni’ niɣ ‘wenni ittwaggen deg wemcan n wenneɣni’. Man aya ixs ad yini aqa Arebbi iwca i Ḥawwa ijj n mmis deg wemcan n Habil.

◼4:26 4:26 Anuc - isem wanita ixs ad yini ‘bnadem’ niɣ ‘aryaz’.