1 L’iman řexxu d aḍman n tmesřayin nni di issitim bnadem, axmi tina ɛad xeddment, uřa d asargeb n tmesřayin innuffaren. 2 Minzi s man aya tusa-dd ict n cchadet x imɣaren.

3 S l’iman nefhem belli zzmanat ttwaggent s wawař n AREBBI, u belli timesřayin-a i dd-ittbanen aqa ttwaggent zi tmesřayin nni innuffaren. ◘11:3 Amz. 1:1; Izhd. 33:6; Yḥ. 1:10; Rum. 4:17; Afa. 3:9; Kul. 1:16.

4 S l’iman tuɣa Habil iqeddem ict n tɣarṣt tecna aṭṭas x min tuɣa iqeddem Qayin i AREBBI. S uya i din teǧa cchadet xas belli tuɣa-t d amseggad. Uca AREBBI iched i tɣarṣt nnes u s uya issawař ɛad, waxxa netta immut. ◘11:4 Amz. 4:4; Mt. 23:35.

5 S l’iman immeksi Inux břa ma iqqas řmewt. War ittwif ɛad, minzi iksi i-t AREBBI. Minzi qbeř ma ad t iksi, tuɣa xas cchadet-a: aqa tuɣa yareṭṭa AREBBI. ◘11:5 Amz. 5:22, 24. 6 Maca břa l’iman war izemmar bnadem ad yarḍa AREBBI, minzi wenni i ɣa dd-iqarrben ɣar AREBBI, ittxeṣṣa as ad yamen belli Netta aqa-t din, u belli Netta d amxeǧaṣ n yinni xas yarezzun.

7 S l’iman tuɣa Nuḥ itteggʷed, awarni řami d as ittwanna min tuɣa war dd-ittbinen, uca igga aɣarrabu i usenjem n iḥenjiren n twacunt nnes. S man aya aqa iḥkem x ddunect uca idweř netta d awrit n tsegda nni iǧan s l’iman. ◘11:7 Amz. 6:13.

8 S l’iman tuɣa Ibrahim, řami dd-ittwařaɣa, iṭṭaɛ uca iffeɣ ɣar wemcan i ɣa iṭṭef d řwart, uca iffeɣ břa ma ad issen mani ɣa yaweḍ. ◘11:8 Amz. 12:4. 9 S l’iman tuɣa izeddeɣ am umɛezzeb di temmurt i d as ittwawaɛden, am di temmurt n ibarraniyyen. Netta izdeɣ deg iqiḍan ak-d Isḥaq d Yaɛqub, inni d iwriten akides n lwaɛd nni. 10 Minzi ittraja Tandint s dsusa i zi iǧa AREBBI d Bab n řebni d Wenni tt iggin.

11 S l’iman immewc as i Sara jjehd maḥend ad teksi ddeyset - waxxa nettat war dd-tᵉttiruw, uca am tt tuɣa ɛad barra i řmijař n tewsar nnes - turuw-dd minzi tuɣa tessen nican belli wenni d as iwaɛden, dayes řaman. ◘11:11 Amz. 17:19; 21:2; Lk. 1:36. 12 S uyenni ɛawed zeg ijjen, aqa zeg wenni di ibḍeř jjehd nnes s tewsar, ttwařwen as-dd am yitran n ujenna s ubarru nsen u am yijdi x tma n řebḥar i war izemmar ad ittwaḥseb. ◘11:12 Amz. 15:5; 22:17; Rum. 4:18.

13 Di l’iman mmuten yina marra břa ma ad ṭṭfen min d asen ittwawaɛden, maca ẓrin t zi řaggʷaj uca farḥen zzayes uca neɛmen belli nitni d ibarraniyyen d imeɛzab x temmurt. ◘11:13 Amz. 23:4; 47:9; Yḥ. 8:53. 14 Minzi inni iqqaren timesřayin am tina, ssecnen mliḥ belli nitni arezzun Tandint nsen. 15 Meɛlik arzun x temmurt manis dd-ffɣen, iři aqa ufin lfurṣa ḥima ad ɛeqben din ɛawed. 16 Maca řexxu iban-dd mliḥ aqa daysen meẓri ɣar temmurt nni ḥsen, min ixs ad yini ɣar tenni deg ujenna. S uyenni AREBBI war iseḍḥi ca ad as řaɣan ‘AREBBI nsen’, minzi aqa issewjed asen ict n Tendint. ◘11:16 Uf. 3:6; Mt. 22:32; Řex. 7:32.

17 S l’iman iwca Ibrahim, řami ittwaqeǧeb, Isḥaq d taɣarṣt, uca issars ayenni n mmis nni iṭṭef s lwaɛd, x uɛalṭar. ◘11:17 Amz. 22:10. 18 Maca ittwanna as:

“Di Isḥaq ad ac řaɣan zzariɛet nnec.” ◘11:18 Amz. 21:12; Rum. 9:7; Gal. 3:29.

19 Tuɣa ixarreṣ ak-d ixef nnes, belli AREBBI izemmar ɛawed ad t-i-dd-issnekkar jar imettinen. S uya idweř-dd ɣares ɛawed s webrid n yijj n umedya, am s tnukra.

20 S l’iman zi jjihet n min tuɣa dd-igguren ɛad, ibarek Isḥaq iḥenjiren nnes, Yaɛqub d Ɛisu. ◘11:20 Amz. 27:28, 39.

21 S l’iman tuɣa Yaɛqub, řami immut, ibarek kuř ijjen zeg iḥenjiren n Yusuf am tuɣa iṭṭef deg ixef n teɣɣarct nnes. ◘11:21 Amz. 47:31; 48:15.

22 S l’iman tuɣa Yusuf, řami tuɣa immut, issiweř x wuffuɣ n ayt n Israil uca iweṣṣa ten x iɣsan nnes. ◘11:22 Amz. 50:24-25.

23 S l’iman tuɣa Musa, řami dd-ixřeq, ittwassnuffar zi lwalidin nnes třata n iyuren, řami ẓrin aḥenjir iṣbeḥ, uca s l’iman war ggʷiden ca zeg řumur n ujeǧid. ◘11:23 Uf. 2:2; Řex. 7:20.

24 S l’iman yugi Musa, řami imɣar netta, ad as řaɣan ɛad mmis n yeǧis n firɛun. 25 Mři yufa ad yiři ittwazeyyar ak-d řgens n AREBBI uřa d tarrit n meẓri di ddnub i drus n řweqt. ◘11:25 Izhd. 84:11. 26 Tuɣa iḥesseb aseḥqar n Lmasiḥ d agřa ameqqran sennej i řeknuz n Miṣra, minzi tuɣa ixezzar ɣar zzat ɣar řmunet.

27 S l’iman ijja Miṣra, war iggʷid ca zeg uxeyyeq n ujeǧid, minzi iziyyar ixef nnes axmi iẓra AREBBI i war ittwaẓaren.

28 S l’iman igga Taɣarṣt n Useɛdu, uca irucc idammen, ḥima amkeḥḥaḍ n imenza nsen war ten ittḥidi ca. ◘11:28 Uf. 12:21.

29 S l’iman ẓwan Řebḥar n Uɣanim axmi kkin di řbarr, am ttwaṣarḍen Imiṣriyyen zi řebḥar umi tuɣa xsen ad dayes cuqen. ◘11:29 Uf. 14:22.

30 S l’iman wḍan řeḥyuḍ n Ariḥa umi kkin sebɛa n wussan, ttennḍen as. ◘11:30 Yac. 6:20.

31 S l’iman war thellik ca Raḥab, tamɣart n farq-ccɣeř ak-d yinni war iṭṭiɛen, am tuɣa tareḥḥeb ibergagen s řehna. ◘11:31 Yac. 2:1; 6:23; Yaɛ. 2:25.

32 Uca min ɣa iniɣ ɛad? Minzi řweqt war tqeddi ad ssiwřeɣ x Jidɛun d Barak d Camcun d Yifta d Dawud d Camwil u x inabiyyen inneɣni, ◘11:32 Řqḍ. 4:6; 6:11; 11:1; 12:7; 13:24; 1 Ṣm. 17:45; 1 Ṣm. 12:2. 33 inni tuɣa iɣellben x tgeldiwin s l’iman, ggin tasegda, ṭṭfen lwuɛud, qqnen ixenfucen n wayraden, ◘11:33 Řqḍ. 14:6; 1 Ṣm. 17:34; Dan. 6:23. 34 ssxesyen jjehd n tmessi, arewřen zi řeqḍeɛ n ssif, ksin jjehd di tuḍɛeft, dewřen jehden deg imenɣan u qeřɛen x řemrageḥ n řɛeskar n ibarraniyyen. ◘11:34 1 Ṣm. 20:1; 1 Ij. 19:3; 2 Ij. 6:16; Ayub 42:10; Izhd. 6:9; Ica. 38:21. 35 Arrin-dd i temɣarin iḥenjiren nsent s tnukra n imettinen, ca nneɣni mmuten s řeɛdab, tuɣa war ttrijin ad ttwafekken, maca ad ṭṭfen di tnukra icnan ḥsen zi man aya, ◘11:35 1 Ij. 17:23; 2 Ij. 4:36; Řex. 22:25. 36 ca nneɣni ksin abehdeř d urekkuḍ, u ɛad inneɣni ttwaggen di ssnaseř u di řeḥbes. ◘11:36 Irm. 20:2. 37 Inneɣni ttwarejmen, ttwaqessen di tnayen, inneɣni mmuten s řeqḍeɛ n ssif, telɛen am arḍen iřmawen n wuǧi d iɣayḍen, daysen řeɣben, ttwaḥṣaren, ttwaḍeřmen. ◘11:37 1 Ij. 21:13; 2 Ij. 1:8; Mt. 3:4. 38 Nitni d iwdan i war d asen tessdaheǧ ddunnit ḥima ad dayes zedɣen. Nitni dewřen d inni itelɛen di řexřawat, x idurar u deg ifran d ixerdusen n temmurt.

39 Marra ina mixef tᵉttwaf ict n cchadet n l’iman nsen, war ṭṭifen ca di lwaɛd, 40 minzi AREBBI tuɣa izwar iẓra di ṭṭweɛ nneɣ, aqa nitni war ttikkʷiḍen ca ɣar řekmaret břa neccin.