1 Xenni inna Camwil i marra Israil: “Xzar, necc sřiɣ ɣarwem di marra min i d ayi tennam u necc ggiɣ ijj n ujeǧid xawem. ◼12:1 sřiɣ ɣarwem - s Tɛibranit ‘sřiɣ ɣar tmijja nwem’. 2 Uca řexxu, xzar, ajeǧid iruḥ zzat i wudem nwem. Necc wsareɣ, dewřeɣ cabeɣ, u xzar, arraw inu aqa aten jar awem. Zi temẓi inu ař ass-a necc ggureɣ am ukehhan zzat i wudem nwem. 3 Aqa ayi necc da. Cehdem xafi zzat i SIDI u zzat i lmasiḥ nnes. I umi iwyeɣ ca n ufunas? I umi iwyeɣ ijj n weɣyuř? Man wen i ḥṣareɣ u man wen i ɣezziɣ u zi man wen i ṭṭfeɣ ict n terzeft maḥend ad qqneɣ tiṭṭawin inu? Necc ad awem t arreɣ.” 4 Nitni arrin-dd xas: “Cek war d aneɣ teḥṣared ca u war d aneɣ tɣezzid u war tᵉṭṭifed uřa d ict n řḥajjet zi ca n yijjen.” 5 Xenni inna asen: “SIDI d acehhad xawem u lmasiḥ nnes d acehhad ass-a, aqa kenniw war tufim uřa d ict n řḥajjet deg ufus inu!” Inna řgens: “Aqa-t d acehhad!”

6 Inna Camwil i řgens: “D SIDI i tuɣa iggin Musa d Harun u Netta d wenni i dd-issuffɣen řejdud nwem zi Miṣra. 7 Xenni řexxu, beddem-dd ɣari, maḥend ad awem ssecneɣ řḥeqq zzat i wudem n SIDI, marra timegga iseggden n SIDI tinni igga i kenniw u i řejdud nwem. 8 Umi dd-yusa Yaɛqub ɣar Miṣra, sɣuyen řejdud nwem ɣar SIDI u SIDI issekk-dd Musa d Harun, uca nitni ssuffɣen-dd řejdud nwem zi Miṣra u sszedɣen ten deg wemcan-a. ◘12:8 Amz. 46:5; Uf. 2:23; Uf. 3:10. 9 Maca nitni ttun SIDI, AREBBI nsen. Xenni Netta izzenz i-ten i Sisara, akumandar n řɛeskar, di Ḥaṣur, u i Ifilisṭiniyyen u i ujeǧid n ayt n Mu’ab. Marra nitni tuɣa mmenɣen akidsen. ◘12:9 Řqḍ. 4:2; Řqḍ. 10:7; Řqḍ. 3:12. 10 Uca sɣuyen nitni ɣar SIDI, nnan: ‘Neccin nexḍa, maɣar neccin nesmeḥ di SIDI, nsexxar i ‘Ibaɛlen’ d ‘Ɛactarutin’. U řexxu, fekk aneɣ zeg ufus n řɛedyan nneɣ uca neccin ad Cek nsexxar.’

11 Xas uca issekk-dd SIDI Yarubbaɛl d Badan d Yaftaḥ d Camwil u Netta ifekk kenniw zeg ufus n řɛedyan nwem i d awem dd-innḍen, ařami tzeddɣem kenniw di řaman. ◘12:11 Řqḍ. 6:14; 10:3; 11:15. 12 Umi teẓrim kenniw aqa Naḥac, ajeǧid n ayt n Ɛammun, iffeɣ-dd ɣarwem, tennim ayi: ‘Lla, ittxeṣṣa ad xaneɣ yiři ijj n ujeǧid!’, waxxa SIDI, AREBBI nwem, d Ajeǧid nwem. ◘12:12 1 Ṣm. 8:5, 19. 13 Řexxu, xzar, aqa ajeǧid nwem, wenni i tixḍarem, wenni tuɣa tᵉttrajam. Aqa SIDI igga i-t d ajeǧid xawem. ◘12:13 1 Ṣm. 10:19. 14 Mařa kenniw tᵉtteggʷedem SIDI, ad as tsexxarem u ad tesřam i tmijja nnes, u war ttɣewwɣem x min dd-iffɣen zeg uqemmum n SIDI, xenni kenniw, iwa kenniw d ujeǧid nwem wenni i xawem i ɣa iḥekmen, ad tiřim di řaman ɣar ḍeffar n SIDI, AREBBI nwem. ◘12:14 Aɛwd. 1:26. 15 Maca mařa kenniw war tesřim ɣar tmijja n SIDI, ad tɣewwɣem x min dd-iffɣen zeg uqemmum n SIDI, xenni afus n SIDI ad xawem yiři am t tuɣa x řejdud nwem. 16 Xenni řexxu, beddem kenniw, xzarem řxedmet tameqqrant i d ɣa igg SIDI zzat i tiṭṭawin nwem. 17 Ma war iǧi ass-a ṣṣabet n irden? Necc ad řaɣiɣ ɣar SIDI u Netta ad iwc ajjajen d wenẓar ař ɣa tessnem u ad tẓarem mechař imɣar řɣar i teggim zzat i tiṭṭawin n SIDI maḥend ad as tᵉttarem ijj n ujeǧid i yixef nwem.”

18 U Camwil iřaɣa ɣar SIDI, u SIDI issekk-dd deg wass nni ajjajjen d wenẓar, uca marra řgens teřqef i-t tiggʷudi d tameqqrant zi SIDI u zi Camwil. 19 Marra řgens inna i Camwil: “Ẓaǧ i imsexxaren nnec ɣar SIDI, AREBBI nnec, maḥend war nettmetti ca, maɣar neccin narni-dd ɣar marra ddnub nneɣ ɛad tuɛeffna aya, belli narzu ijj n ujeǧid i neccin.”

20 Xenni inna Camwil i řgens: “War tteggʷdem ca! Kenniw teggim marra tuɛeffna-ya, maca ḥḍam ařami war ttḥeyyadem ca ɛad zi ɣar ḍeffar n SIDI, uca sexxarem i SIDI s marra uř nwem. 21 War ttḥeyyadem ca, minzi xenni ad taf tḍaffarem l’aṣnam ixwan, timesřayin nni war ineffɛen u war ittfekkin, minzi nitenti xwant. 22 Minzi SIDI war isemmeḥ di řgens nnes di ṭṭweɛ n Yisem nnes ameqqran, maɣar SIDI igga ad kenniw igg d řgens i Yixef nnes. 23 Min d ayi icqan, iggʷej xafi aqa ad xḍiɣ ak-d SIDI umi ssbeddeɣ tẓaǧit akidwem, maca necc ad awem ssecneɣ abrid iṣebḥen iseggmen. 24 Mɣir, ggʷedem SIDI, sexxarem xas s řmanet s wuř nwem marra, maɣar xzarem, ma war iggi Netta jar awem marra timesřayin nni imɣaren! 25 Maca mařa kenniw ad tarnim ad teggem tuɛeffna, xenni řa d kenniw uřa d ajeǧid nwem ad thellkem.”