46
Aytmas n Yusuf usin-dd ɣar Miṣra ak-d Yaɛqub
1 Ifsi Israil iqiḍan nnes ssenni, yuyur s marra min ɣares uca yiweḍ ɣar Bi’r-Sebɛa. Iqeddem din tiɣarṣa i AREBBI n babas Isḥaq. 2 Uca issiweř AREBBI ak-d Israil di iweḥḥan di ǧiřet, inna: “Yaɛqub, Yaɛqub!” uca inna netta: “Aqa ayi da!” 3 Xenni inna: “Necc d Arebbi, AREBBI n babac. War tteggʷed, maḥend ad tehwid ɣar Miṣra, minzi Necc ad cek ggeɣ din d ijj n řgens imɣar. ◘46:3 Amz. 13:16; 16:10; 17:2; 22:17; 26:24; 28:13; 32:9; 35:11; 48:4. 4 Ad kidek hwiɣ ɣar Miṣra uca Necc ad cek ssgeɛɛdeɣ ɛawed u Yusuf ad xak issars ifassen nnes x tiṭṭawin nnec.” ◘46:4 Řxř. 20:15; Aɛwd. 10:22; Yac. 24:4, 5, 6; Izhd. 105:23, 24; Ica. 52:4; Ḥuc. 11:1.
5 Ikkar Yaɛqub, iffeɣ zi Bi’r-Sebɛa. Ksin ayt n Israil babatsen Yaɛqub d iḥenjiren nsen d temɣarin nsen deg ikarruten nni dd-issekk firɛun maḥend ad t yawi. ◘46:5 Řex. 7:15. 6 Ksin řebhayem nsen d wagřa i yarebḥen di temmurt n Kenɛan uca iwḍen ɣar Miṣra, Yaɛqub d marra iḥenjiren nnes akides: 7 iḥenjiren nnes d iḥenjiren n iḥenjiren nnes jmiɛ akides, uřa d yessis d yessitsen n iḥenjiren nnes, aqa yiwi akides marra tarwa nnes ɣar Miṣra. ◼46:7 marra tarwa nnes - s Tɛibranit ‘marra zzariɛet nnes’.
Tarwa n Yaɛqub
8 Ina d ismawen n ayt n Israil, inni yudfen ɣar Miṣra:
Yaɛqub d iḥenjiren nnes.
Amenzu n Yaɛqub: Rubin. ◘46:8 Uf. 1:2; 6:13; Řxř. 26:5; 1 Im. 4-8.
9 Tarwa n Rubin: Ḥanuk d Fallu d Ḥaṣrun d Karmi. ◼46:9 Ḥanuk - xzar afesssar ɣar Amz. 4:17. Fallu - ‘aryaz icenɛen’. Ḥaṣrun - ‘wenni d iqewwaren s ijj n řḥiḍ’. Karmi - ‘tazayart inu’ niɣ ‘bab n tzayart’.
10 Tarwa n Cimɛun: Yamuyil d Yamin d Uhad d Yakin d Ṣuḥar d Cawul, mmis n temɣart Takenɛanit. ◘46:10 Uf. 6:15; 1 Im. 4:24.
12 Tarwa n Yahuda: Ɛir d Unan d Cayla d Fariṣ d Zaraḥ. Maca Ɛir d Unan mmuten di temmurt n Kenɛan. Tarwa n Fariṣ tuɣa aten Ḥaṣrun d Ḥamul. ◘46:12 Amz. 38:3, 4, 5; 1 Im. 2:5.
13 Tarwa n Issakar: Tulaɛ d Fawwa d Yub d Cimrun.
14 Tarwa n Zabulun: Sarad d Ilun d Yaḥliyil.
15 Ina tuɣa aten d iḥenjiren n Liya inni d as dd-turuw i Yaɛqub di Fadan-Aram, uca ɛawed yeǧis Dina. Marra řeɛmur n iḥenjiren nnes d tḥenjirin tuɣa aten di třata u-třatin.
17 Iḥenjiren n Acir: Yimna d Yiswi d Bariɛa d učmatsen Caraḥ. D iḥenjiren n Bariɛa: Ḥabir d Malkiyil. ◘46:17 1 Im. 7:30.
18 Ina tuɣa aten d iḥenjiren n Zilpa tenni iwca Laban i yeǧis Liya. Nettat turuw-dd ina i Yaɛqub, ina seṭṭac d arruḥ. ◘46:18 Amz. 29:24.
19 Tarwa n Raḥil, tamɣart n Yaɛqub: Yusuf d Binyamin.
20 Ttwaxeřqen-dd i Yusuf di temmurt n Miṣra Manassa d Ifrayim, inni d as dd-turuw Asnat, yeǧis n Fuṭi-Faraɛ, akehhan n Un. ◘46:20 Amz. 41:50; 48:5.
21 Tarwa n Binyamin: Bilaɛ d Bakir d Acbil d Jira d Naɛman d Iḥi d Ruc d Muffim d Ḥuffim d Ard. ◘46:21 1 Im. 7:6; 8:1.
22 Ina tuɣa aten d iḥenjiren n Raḥil, inni dd-ittwawarwen i Yaɛqub, marra arbeɛṭac d arruḥ.
23 Tarwa n Dan: mɣir Ḥucim.
25 Ina tuɣa aten d iḥenjiren n Bilha, tenni i d as iwca Laban i Raḥil yeǧis. Turuw as-dd ina i Yaɛqub, ina marra tuɣa aten sebɛa d arruḥ. ◘46:25 Amz. 29:29.
26 Marra řeɛmur nni dd-yusin ɣar Miṣra ak-d Yaɛqub, inni dd-iffɣen zeg uɣezdis nnes, břa timɣarin n iḥenjiren n Yaɛqub, ina marra tuɣa aten di setta u-settin řeɛmur. 27 Tarwa n Yusuf inni d as dd-ittwaxeřqen di Miṣra, aqa tnayen n řeɛmur. Marra řeɛmur n taddart n Yaɛqub nni dd-yusin ɣar Miṣra, tuɣa aten di sebɛin. ◘46:27 Aɛwd. 10:22; Řex. 7:14.
28 Uca netta issekk Yahuda zzates ɣar Yusuf, ḥima ad isscen abrid zzates ɣar Jucan uca iwḍen ɣar temmurt n Jucan. 29 Indeh Yusuf ɛawed akarru nnes uca igeɛɛed ɣar Jucan, maḥend ad iřqa Israil, babas. Umi d as immeř ixef nnes, ingez as x yiri, iqqim ittru x yiri nnes aṭṭas. 30 Inna Israil i Yusuf: “Řexxu zemmareɣ necc ad mmteɣ, řexxu umi ẓriɣ aɣembub nnec, zeɛma aqa ɛad teddared!” 31 Xenni inna Yusuf i yaytmas u i aytbab n taddart n babas: “Ad geɛɛdeɣ ad xebbareɣ firɛun, ad iniɣ: ‘Aytma d taddart n baba, inni iǧan di temmurt n Kenɛan, aqa usin-dd ɣari. 32 Iryazen d imeksawen n wuǧi, tuɣa ceɣřen ixef nsen ak d řebhayem. Aqa iwyen-dd uǧi nsen d ifunasen d tfunasin nsen d marra min ɣarsen.’ 33 Mařa imsar ad awem dd-iřaɣa firɛun uca ad awem yini: ‘Min teɛna řxedmet i tᵉtteggem?’, 34 ad tinim: ‘Imsexxaren nnec d iryazen inni iceɣřen ak-d řebhayem zi temẓi nsen ař i řexxu, neccin uřa d řejdud nneɣ!’, ḥima ad ɣarwem yiři ttesriḥ maḥend ad tzedɣem di temmurt n Jucan, minzi kuř ameksaw n wuǧi, aqa-t d jjɛifect i Imiṣriyyen.” ◘46:34 Amz. 43:32; Uf. 8:22.
◘46:3 46:3 Amz. 13:16; 16:10; 17:2; 22:17; 26:24; 28:13; 32:9; 35:11; 48:4.
◘46:4 46:4 Řxř. 20:15; Aɛwd. 10:22; Yac. 24:4, 5, 6; Izhd. 105:23, 24; Ica. 52:4; Ḥuc. 11:1.
◼46:7 46:7 marra tarwa nnes - s Tɛibranit ‘marra zzariɛet nnes’.
◘46:8 46:8 Uf. 1:2; 6:13; Řxř. 26:5; 1 Im. 4-8.
◼46:9 46:9 Ḥanuk - xzar afesssar ɣar Amz. 4:17. Fallu - ‘aryaz icenɛen’. Ḥaṣrun - ‘wenni d iqewwaren s ijj n řḥiḍ’. Karmi - ‘tazayart inu’ niɣ ‘bab n tzayart’.
◘46:10 46:10 Uf. 6:15; 1 Im. 4:24.
◘46:11 46:11 1 Im. 5:27.
◘46:12 46:12 Amz. 38:3, 4, 5; 1 Im. 2:5.
◘46:16 46:16 1 Im. 5:11.
◘46:17 46:17 1 Im. 7:30.
◘46:18 46:18 Amz. 29:24.
◘46:20 46:20 Amz. 41:50; 48:5.
◘46:24 46:24 1 Im. 7:13.
◘46:25 46:25 Amz. 29:29.
◘46:27 46:27 Aɛwd. 10:22; Řex. 7:14.
◘46:34 46:34 Amz. 43:32; Uf. 8:22.