1 Inna SIDI ɛawed i Musa: “Ini i Harun: ‘Swiẓẓeḍ afus nnec s teɣɣarct nnec x iɣezran, x tɣezratin uřa x iyeřmamen, sgeɛɛed iqarqriwen x temmurt n Miṣra.’ ” 2 Uca isswiẓẓeḍ Harun afus nnes x waman n Miṣra uca geɛɛden-dd iqarqriwen uca dřin tammurt n Miṣra. 3 Uca uřa d tarwa n tseḥḥart ggin amenni s tmegga nsen n swadday swadday d ict, uca ssgeɛɛden-dd ɛawed iqarqriwen x temmurt n Miṣra. 4 Iřaɣa-dd firɛun x Musa d Harun, inna asen: “Ẓaǧem s řaǧaɣ i SIDI ḥima ad xafi iksi iqarqriwen u x řgens inu, uca xenni ad jjeɣ ad iffeɣ řgens, maḥend ad qeddmen tiɣarṣa i SIDI.” 5 Inna Musa i firɛun: “Ṭṭef xafi řḥurmet meřmi d ayi ɣa tinid ad xak ẓẓaǧeɣ u x imsexxaren nnec u x řgens nnec, maḥend ad xak qeḍɛeɣ iqarqriwen u x tudrin nnec, ad qqimen deg iɣzar waha.” 6 Yarra-dd xas: “Tiwecca!” Inna Musa: “Ad yiři am mammec tennid ḥima ad tessned belli war din iǧi ḥed am SIDI, AREBBI nneɣ. 7 Uca iqarqriwen ad mmeksin xak u x tudrin nnec uřa x imsexxaren nnec u x řgens nnec, ad qqimen deg iɣzar waha.” 8 Řexdenni iffeɣ Musa d Harun x firɛun uca iřaɣa Musa i SIDI di ssibbet n jjriḥect n iqarqriwen nni tuɣa igga x firɛun. 9 Uca igga SIDI am mammec dd-ittas ak-d wawař n Musa uca mmuten iqarqriwen uca weddaren zi tudrin, zi řemraḥat u zeg iyyaren. 10 Uca ssmunen ten d iɛurrac uca turṣuḍ zzaysen temmurt. 11 Řami iẓra firɛun belli aqa bnadem izemmar ad yarr nnefs, isseqseḥ uř nnes uca war ɣarsen issḥess, am mammec tuɣa inna SIDI. ◘8:11 Uf. 7:14

12 Řexdenni inna SIDI i Musa: “Ini i Harun: ‘Swiẓẓeḍ taɣɣarct nnec, tewted zzayes acař n temmurt. Xenni ad idweř d nnamus x marra tammurt n Miṣra.’ ” 13 Uca ammu i ggin nitni. Isswiẓẓeḍ Harun afus nnes s teɣɣarct nnes i dayes, iwta acař n temmurt. Uca yusa-dd nnamus am x iwdan am x řmař. Marra acař n temmurt idweř d nnamus di marra tammurt n Miṣra. ◘8:13 Izhd. 105:31 14 Tarwa n tseḥḥart ggin tizemmar nsen amenni ɛawed s tmegga nsen n swadday swadday, maḥend ad ssuffɣen nnamus, maca war zemmaren. Uca tuɣa nnamus x iwdan d řmař. 15 Řexdenni nnan tarwa n tseḥḥart i firɛun: “Man aya d aḍaḍ n AREBBI!” Maca isseqseḥ uř n firɛun uca war dd ɣarsen iseǧ ca, am mammec tuɣa inna SIDI.

16 Uca inna SIDI i Musa: “Tiwecca kkar zic, ad tbedded zzat i firɛun. Xzar, netta ad iffeɣ ɣar tma n waman, ad as tinid: ‘Ammu i iqqar SIDI: Ejj ad iraḥ řgens inu, ḥima ad ayi iɛbed! 17 Minzi mařa war tejjid řgens inu ad iraḥ, xzar, Necc ad xak ssekkeɣ iyřafen n ibeɛɛac, x imsexxaren nnec, x řgens nnec, x tudrin nnec, ař ɣa ttwaccurent tudrin n Imiṣriyyen s iyřafen n ibeɛɛac uca amenni uřa d tammurt mani zeddɣen. 18 Deg wass nni ad ssḥuzeɣ tammurt n Jucan mani izeddeɣ řgens inu, ḥima war din ttiřin weyřafen n ibeɛɛac ḥima ad tessned belli Necc d SIDI di řwesṭ n temmurt. 19 Uca ad ggeɣ ijj n ttaman n weṣřaḥ jar řgens inu d wenni nnec. Tiwecca ad tiři řeɛřamet-a.’ ” 20 Uca ammu i igga SIDI. Usin-dd iyřafen imeqqranen n ibeɛɛac x taddart n firɛun, x tudrin n imsexxaren nnes u x marra tammurt n Miṣra uca tᵉttwaxarreb temmurt s iyřafen n ibeɛɛac. ◘8:20 Izhd. 78:45; 105:31 21 Řexdenni iřaɣa firɛun i Musa d Harun, inna asen: “Ruḥem, tqeddmem taɣarṣt i AREBBI nwem di temmurt-a.” 22 Inna Musa: “War dd-yusi ad negg ammu, minzi ad nqeddem taɣarṣt i SIDI, AREBBi nneɣ, min iǧan d ict n jjɛifect ɣar Imiṣriyyen. Xzar, mařa nqeddem d taɣarṣt zzat i tiṭṭawin n Imiṣriyyen min d asen ittɣiř d jjɛifect, ma war d aneɣ tarejjmen ca? ◘8:22 Amz. 43:32; 46:34 23 Ejj aneɣ ad nraḥ ticři n třata n wussan di řexřa, ḥima ad nqeddem taɣarṣt i SIDI, AREBBI nneɣ, am mammec d aneɣ yumur Netta.” 24 Xenni inna firɛun: “Necc ad kenniw jjeɣ ad traḥem uca ad tqeddmem taɣarṣt i SIDI, AREBBI nwem, di řexřa, maca war iɛeddeř ad tiggʷijem aṭṭas. Ẓaǧem uřa xafi.” 25 Musa inna: “Aqa ad xak ffɣeɣ, ad ẓẓaǧeɣ i SIDI, ḥima ad ikkes tiwecca iyřafen n ibeɛɛac x firɛun, x imsexxaren nnes uřa x řgens nnes. Maca ittxeṣṣa firɛun war ixeddeɛ twařa nneɣni, war ittejji ad iraḥ řgens, maḥend ad iqeddem taɣarṣt i SIDI.” 26 Řexdenni iffeɣ Musa x firɛun uca iẓẓuǧ i SIDI. 27 Igga SIDI ɛlaḥsab awař i inna Musa uca ikkes iyřafen n ibeɛɛac x firɛun, x imsexxaren nnes, uřa x řgens nnes. War iqqim uřa d ijj n ubeɛɛuc. 28 Maca firɛun isseqseḥ uř nnes twařa-ya ɛawed, war ijji ad iraḥ řgens. ◘8:28 Uf. 8:11