1 Ikkar Laban ɣar tuffut n ṣṣbeḥ, issudem iḥenjiren nnes d yessis, ibark i-ten. Xenni iruḥ Laban, iɛqeb ɣar wemcan nnes. 2 Uca iṭṭef Yaɛqub ɛawed abrid nnes uca usint-i-dd lmalakat n AREBBI, řqant t-i-dd. ◘32:2 Amz. 48:16. 3 Inna Yaɛqub umi ten iẓra: “Řmargeḥ n řɛeskar n AREBBI d wa!”, uca iřaɣa isem n wemcan nni Maḥanayim. 4 Issekk Yaɛqub ireqqasen ɣar zzat, ɣar Ɛisu umas ɣar temmurt n Saɛir, aqa-tt d jjihet n Idum. 5 Uca iweṣṣa i-ten, inna asen: “Ammu i ɣa tinim i sidi inu Ɛisu: ‘Ammu i iqqar umsexxar nnec Yaɛqub: Tuɣa zeddɣeɣ ak-d Laban am ubarrani uca qqimeɣ din ař i řexxu. 6 Ɣari ifunasen d yeɣyař d wuǧi d isemɣan d tiyya uca ssekkeɣ ireqqasen, maḥend ad t iniɣ i sidi inu, maḥend ad afeɣ arḍa di tiṭṭawin nnec.’ ”

7 Ireqqasen dewřen-dd ɣar Yaɛqub, nnan: “Nruḥ ɣar umac Ɛisu, u netta ɛawed yusa-dd ad cek iřqa u aqa din arebɛa-mya n yeryazen akides.” 8 Xenni Yaɛqub tudef i-t tiggʷudi temɣar uca issqenḍ i-t řḥař. Netta ibḍa iwdan, inni akides d wuǧi d ifunasen d tfunasin d iřeɣman x tnayen n řemrageḥ n řɛeskar. 9 Inna: “Mařa yusa-dd Ɛisu ɣar ijj n řmargeḥ n řɛeskar, ad xas iɣřeb, xenni ad yarweř řmargeḥ n řɛeskar i iqqimen.” 10 Uca inna Yaɛqub: “A AREBBI n baba Ibrahim d AREBBI n baba Isḥaq, a SIDI, Cek wenni d ayi innan: ‘Dweř ɣar temmurt nnec d raǧ nnec uca Necc ad ac ggeɣ min icnan!’ ◘32:10 Amz. 31:13. 11 Aqa ayi qell x marra timegga n tmexsiwt icewwaren d marra řaman i tessecned i umsexxar nnec, minzi ẓwiɣ L’Urdun s teɣɣarct inu řami dd-ffɣeɣ uca řexxu dewřeɣ-dd d tnayen n řemrageḥ n řɛeskar. 12 Fekk ayi řexxu zeg ufus n Ɛisu uma, minzi tteggʷedeɣ balak ad dd-yas uca ad ineɣ uřa d tiyemmatin ak-d iḥenjiren! 13 Uca Cek tennid: ‘Necc ad kik ggeɣ mliḥ, ad ggeɣ zzariɛet nnec am yijdi n řebḥar i war izemmar ad ittwaḥseb zi ssibbet n ubarru nnes!’ ” ◘32:13 Amz. 28:13.

14 Issens din ǧiřet nni uca iksi zi min dd-yusin deg ifassen nnes d agřa, maḥend ad t yewc d arriɣalu i umas Ɛisu: 15 mitayen n tɣayḍin d ɛicrin n imuyan d mitayen n txeswin d ɛicrin n icarriyyen 16 d třatin n třeɣmin issuṭṭuḍen ak-d tarwa nsent, arebɛin n tfunasin timeẓyanin, ɛecra n ifunasen imeẓyanen d ɛicrin n teɣyař d ɛecra n yeɣyař imeẓyanin. 17 Isseɛdu ten ɣar ifassen n imsexxaren nnes, kuř taḥimart weḥḥdes, uca inna i imsexxaren nnes: “Ɛdum kenniw řexxu zzat inu, ggem ttasiɛ jar tḥimart d tḥimart.” 18 Xenni yumur umezwar, inna as: “Mařa yusa-dd Ɛisu i umsagar akidek uca isseqsa ac, inna: ‘Wi cek yiřan d mani ɣa traḥed?’ u ‘Umi tina i iǧan zzatek?’, 19 řexdenni ad tinid: ‘D arriɣalu i yeǧa n umsexxar nnec Yaɛqub, wenni dd-issekk i sidi inu Ɛisu. Xzar, netta ɛawed yusa-dd awarni aneɣ!’ ” 20 Yumur ɛawed wenni wiss tnayen d wiss třata inni igguren awarni i tḥimriwin, inna: “Siwřem awařen-a d ijjen ak-d Ɛisu, xmi t ɣa teřqam. 21 Kenniw ɛawed ad tinim: ‘Xzar, amsexxar nnec Yaɛqub yusa-dd awarni aneɣ!’ ” Minzi inna: “Ad t ssareyyḥeɣ s arriɣalu-ya i dd-yusin zzat inu. Xenni awarni man aya ad ẓareɣ aɣembub nnes, balak ad iqbeř aɣembub inu zzates.” 22 Ammu i issizzar arriɣalu zzates ɣar ujemmaḍ am issens netta ǧiret nni di řmargeḥ n řɛeskar.

23 Ikkar ǧiřet nni uca iksi tnayen n temɣarin nnes d tnayen n tiyya nnes d ḥiṭac n iḥenjiren nnes, iẓwa amcan n uẓekkwu n yeɣzar n Yabbuq. 24 Yiwyi i-ten uca isseẓwa ten i teɣzurt u marra min ɣares isseɛdu t ɣar ujemmaḍ.

25 Maca iqqim Yaɛqub weḥḥdes u netta immuɣzeř ak-d ijj n Weryaz ařmi d tuffut n řefjar. 26 Umi iẓra Wanita aqa war xas iqedd ca, iḥada t ɣar wemcan n temqiqqect n tmeṣṣaḍt nnes, maḥend ad dd-tenxuxer tamqiqqect n tmeṣṣaḍt n Yaɛqub umi kides tuɣa ittmuɣzuř. 27 Inna: “Ejj ayi ad raḥeɣ, aqa iṣbeḥ řḥař.” Maca netta inna: “War Cek ttejjiɣ, mɣir mařa tbarked ayi.” ◘32:27 Ḥuc. 12:4. 28 Uca Netta inna as: “Mammec d ac qqaren?” Yarra-dd xas: “Yaɛqub.” 29 Xenni inna as: “War d ac qqaren ɛad Yaɛqub, maca Israil, minzi temmenɣed ak-d AREBBI d iwdan, uca cek tɣeřbed.” ◼32:29 Israil - isem wanita ixs ad yini ‘Arebbi ittmenɣa’ niɣ ‘netta ittmenɣa ak-d Arebbi’.  ◘32:29 Amz. 35:10. 30 Isseqsa Yaɛqub xenni, inna: “Ini ayi řexxu Isem nnec!” Yarra-dd xas: “Maɣar tesseqsid x Yisem inu?” Uca ibark i-t din. 31 Uca isemma Yaɛqub amcan nni Fanuwil, inna: “Minzi ẓriɣ AREBBI aɣembub deg uɣembub uca injem řeɛmar inu.” 32 Tenqar-dd xas tfuct umi tuɣa iɛdu x Fanuwil, uca yuyur ittzeḥḥef zi tmeṣṣaḍt nnes. 33 X uya war ttᵉtten ayt n Israil ař ass-a zeg weẓwar igdaren i ittekken x temqiqqect n tmeṣṣaḍt, minzi iḥada tameṣṣaḍt n Yaɛqub ɣar mani iǧa weẓwar igdaren.