1 “Di řweqt nni d ijjen inna ayi SIDI: ‘Nqec tnayen n teřwiḥin n weẓru am tinni timezwura uca geɛɛed-dd ɣari ɣar wedrar uca egg i cek ict n Ttabut n ukeccuḍ. ◘10:1 Uf. 34:1 2 Ad ariɣ di teřwiḥin awařen nni tuɣa di teřwiḥin timezwura nni tarẓid uca ad tent tessarsed di Ttabut. 3 Necc ggiɣ ict n Ttabut n ukeccuḍ n ukasiya uca neqceɣ tnayen n teřwiḥin n weẓru am tmezwura. Geɛɛdeɣ ɣar wedrar s tnayen n teřwiḥin deg ufus inu. 4 Yura x teřwiḥin, anect n tira tamezwarut, ɛecra n wawařen nni tuɣa issiweř SIDI deg wass n wegraw n řgens x wedrar zi řwesṭ n tmessi uca iwca i-tent ayi-dd SIDI. 5 Dewřeɣ-dd u hwiɣ-dd zeg wedrar uca ssarseɣ tiřwiḥin di Ttabut nni ggiɣ uca diha i ǧant ɛad, am mammec d ayi yumur SIDI.”

6 Fesyen ayt n Israil iqiḍan nsen zi Biɛrut-Bani-Yaɛqan, ffɣen ɣar Musira. Dinni immut Harun uca ittwanḍeř din. Mmis Aliɛazar idweř d akehhan deg wemcan nnes. ◘10:6 Řxř. 20:28; 33:30,38 7 Ssenni mmuṭṭiyen ɣar Judjud u zi Judjud ɣar Yuṭbata, tammurt n tɣezratin n waman. ◘10:7 Řxř. 33:32,33 8 Di řweqt nni d ijjen iḥuzz SIDI taqbič n Lawi ḥima ad arbun Ttabut n Řɛahd n SIDI maḥend ad bedden zzat i wudem n SIDI, ad as sexxaren u ad barken deg Yisem nnes, ař ass-a. 9 X uya Lawi war ɣares tuɣi ca n tesɣart, uřa d ca n řwart ak-d aytmas. SIDI d řwart nnes, am mammec d as inna SIDI, AREBBI nnec. ◘10:9 Řxř. 18:20-32.; Aɛwd. 18:1; Ḥiz. 44:28

10 “Uca necc qqimeɣ x wedrar, am wussan imezwura, arebɛin n ussan d arebɛin n ǧyaři uca isřa ayi SIDI ɛawed twařa-ya, aqa SIDI tuɣa war ixs ad kenniw issexsar. ◘10:10 Aɛwd. 9:18, 19 11 Inna ayi SIDI: ‘Kkar, uyur deg webrid zzat i wudem n řgens, ḥima ad adfen ɣar temmurt, tenni jjuǧeɣ i řejdud nsen ad asen tt-i-dd-wceɣ, ad tt ksin d řwart.’ 12 Řexxu xenni, a Israil! Min zzayek ittar SIDI, AREBBI nnec, mɣir ad teggʷeded SIDI, AREBBI nnec, ad tuyured deg ibriden nnes u ad t texsed uca ad tsexxared i SIDI, AREBBI nnec s marra uř nnec u s marra řeɛmar nnec, ◘10:12 Aɛwd. 6:5; Mt. 22:37; Lk. 10:27 13 uca ad teḥḍid řumurat n SIDI d tweṣṣa nni necc xak carḍeɣ ass-a i tizi nnec. 14 Xzar, ajenna d ujenna n ijenwan d marra min dayes i SIDI, AREBBI nnec i iǧan. ◘10:14 Amz. 14:19; Izhd. 24:1; 115:16 15 Mɣir ɣar řejdud nnec waha i iqqen SIDI Ixef nnes ḥima ad ten ixs u Netta ixḍar zzariɛet nsen awarni asen, aqa d kenniw, zi marra řegnus, am teǧa ass-a. 16 Xetnem xenni i řeɛdařyet n wuř nwem, war sqessiḥem ca ɛad ktar uřawen nwem, ◘10:16 Uf. 32:9; 33:3; 34:9; Aɛwd. 9:13; 30:6; Irm. 4:4 17 minzi SIDI, AREBBI nwem, d AREBBI x marra irebbiten d Sidi x marra isiditen, ijj n Arebbi imɣar d ajebbar d ameggʷed, wenni war itteggen řfarz deg iwdan niɣ ikessi ccarḍ, ◘10:17 2 Im. 19:6, 7; Ayub 34:19; Řex. 10:34; Rum. 2:11; Gal. 2:6; Afa. 6:9; Kul. 3:25; 1 Bṭ. 1:17; Asa. 17:14 18 wenni itteggen tasegda i uyujiř d tajjač, wenni ittexsen abarrani u iwca as aɣrum d arruḍ. 19 Ittxeṣṣa ad texsem abarrani, minzi tuɣa kenniw d ibarraniyyen di temmurt n Miṣra. 20 Ad teggʷeded SIDI, AREBBI nnec, ad as tsexxared uca ad as třeṣqed u s Yisem nnes ad tejjaǧed. ◘10:20 Aɛwd. 6:13; 13:4; Mt. 4:10; Lk. 4:8 21 Aqa Netta d asebbaḥ nnec, uca Netta d AREBBI nnec, wenni ɣarek iggin řxedmet-a d tameqqrant uřa d marra timesřayin-a issaggʷaden tinni ẓrint tiṭṭawin nnec. 22 Řejdud nwem hwan-dd s sebɛin n řeɛmur ɣar Miṣra uca řexxu igga i-c SIDI, AREBBI nnec, aṭṭas am yitran n ujenna.” ◘10:22 Amz. 15:5; 46:27; Uf. 1:5; Řex. 7:14