1 Awarni man aya yusa-dd wawař n SIDI ɣar Abram deg ijj n řewḥiy. Inna as “War tteggʷed ca, Abram, Necc d aseřqi i cek, řmunet nnec temɣar aṭṭas d Necc.” ◘15:1 Izhd. 16:6; 18:3; 19:12. 2 Uca inna Abram: “Sidi inu, SIDI, min d ayi ɣa tewced, maɣar necc ad raḥeɣ ammu břa mmi u Aliɛazir zi Dimacq ad yiři amecnaw mmi x wagřa n taddart inu?” ◼15:2 Aliɛazir - isem-a wanita ixs ad yini ‘wenni ɣar iǧa Arebbi d amɛawen nnes’ niɣ ‘wenni umi iwca Arebbi afus’. 3 Inna Abram ɛawed: “Xzar, war d ayi tewcid zzariɛet, s uyenni, wenni iǧan am mmi n taddart inu, ad yiři d awrit inu!” ◼15:3 zzariɛet - ixs ad yini ‘tarrawt’. 4 Uca xzar, awař n SIDI yusa-dd ɣares, inna: “War cek iwarret ca wa, maca wenni i ɣa iffɣen zzayek ad yiři d awrit nnec.” 5 Issuffeɣ i-t ɣar barra, inna: “Xzar ɣar ujenna, tḥesbed itran, mařa tzemmared ad ten tḥesbed!” Uca inna as: “Ammu i ɣa tiři zzariɛet nnec!” ◘15:5 Uf. 32:13; Aɛwd. 10:22; Rum. 4:18; Ɛbr. 11:12. 6 Uca netta yumen di SIDI uca iḥseb as t-i-dd d tasegda. ◼15:6 iḥesb as t-i-dd d tasegda - niɣ ‘igga as t i netta d tasegda’.  ◘15:6 Rum. 4:3, 9, 18, 22; Gal. 3:6; Yaɛ. 2:23.

7 Inna as ɛawed: “Necc d SIDI, wenni cek dd-yiwyen zi Ur n Ikaldaniyyen, ḥima ad ac wceɣ tammurt-a d řwart.” ◘15:7 Izhd. 105:11. 8 Xenni netta inna: “A Sidi inu, SIDI, s minzi i ɣa ssneɣ, belli ad tt warteɣ?” 9 Inna as Netta: “Awi ayi-dd ict n tɛejmit n třata n iseggʷusa d ijj n iɣayḍ n třata iseggʷusa d ijj n icarri n třata iseggʷusa d ict n tejlilleḥt d ijj n wedbir d ameẓyan.” 10 Netta yiwi-dd ɣares marra man aya, ibḍa ten x wezyen u igga kuř azyen qibač i wenneɣni, maca war ibḍi ca ijḍaḍ. ◘15:10 Irm. 34:18, 19 11 Hwan-dd ijḍaḍ ittkeccaḍen x imurḍas, maca Abram yuẓẓeř xasen. 12 Ɣar uɣeǧay n tfuct, imsar aqa yusa as-dd i Abram ijj n yiḍeṣ yuǧeɣ, uca xzar, tiggʷudi d taǧest iḥedqen wḍan-dd xas. 13 Xenni inna i Abram: “Ssen s tidett aqa zzariɛet nnec ad tiři d tabarranect deg ict n temmurt i war iǧin nnes uca ad asen xedmen am isemɣan u nitni ad xasen ggen aɣiř arebɛa-mya n iseggʷusa. ◘15:13 Uf. 12:40; Řex. 7:6; Gal. 3:17. 14 Maca řgens umi ɣa xedmen am isemɣan, ad xasen ḥekmeɣ ɛawed, uca awarni man aya ad ffɣen s wagřa imɣar. ◘15:14 Uf. 3:22; 11:2; 12:35,36. 15 Ad tᵉttwassmuned ɣar řejdud nnec s řehna uca ad cek neḍřen am umeccaybu iweqqar. ◘15:15 Amz. 25:7, 8. 16 Jjiř wiss arebɛa ad dd-iɛqeb danita, minzi řqedd n řmuɛṣiyyet n Imuriyyen ɛad war ikemmeř.” ◘15:16 Uf. 12:40. 17 Řami teɣři tfuct uca tedweř d taǧest, tuɣa din afarran iddexxnen u iɛdu ijj n weṣfeḍ n tmessi jar izeynan nni. ◼15:17 afessar - řami ggin tnayen n ijeǧiden zic ijj n řɛahd di Ccarq-Ameřwasu ksin nitni ijj n umeddar i tɣarṣt, bḍan t d izeynan uca ssarsen azyen ɣar ijj n uɣezdis u azyen ɣar ijj n uɣezdis nneɣni. Xenni tuɣa x ujeǧid nni tuɣa d amuqřiř zzaysen ad yuyur di řwest n tnayen n iziynan am iqqar aqa ajeǧid wenni d ameqqran zzaysen ɣares řḥeqq ḥima ad kides igg amecnaw min igga ak-d umuddar i umi ɣarṣen, mařa netta war ikemmeř řɛahd i igga akides (xzar Irm. 34:18-20). Deg wawařen-a nettwařa aqa Arebbi wenni d ameqqran x Ibrahim, tuɣa iggur di řwest n izeynan n umeddar di ṣṣifet n wesfeḍ am tuɣa Ibrahim ittbedda ɣar uɣezdis. Man aya ixs ad yini aqa Arebbi s Yixef nnes d Netta i iqeḍɛen řɛahd ak-d Ibrahim minzi Arebbi ittḥinna x bnadem, issen bnadem war izemmar ad ikemmeř uřa d ijj n řɛahd akides. Bnadem izemmar mɣir ad ittwassenjem xmi i ɣa yamen di Řɛahd i igga Arebbi di Mmis, ixs ad yini di Lmasiḥ wenni iwcin Ixef nnes d tɣarṣt i ddnub n iwdan. 18 Deg wass nni nnit igga SIDI ijj n Řɛahd ak-d Abram, inna: “I zzariɛet nnec umi wciɣ tammurt-a zeg iɣzar n Miṣra ař iɣzar ameqqran, iɣzar n Lfuraṭ: ◘15:18 Amz. 12:7; 13:15; 24:7; 26:4; Uf. 32:13; Aɛwd. 1:8; 34:4. 19 tammurt n Iqiniyyen, Iqeniziyyen, Iqadmiyyen, 20 Iḥittiyyen, Ifirziyyen, Irafawiyyen, 21 Imuriyyen, ayt n Kenɛan, Igirgaciyyen d Iyibusiyyen.”