1 Inna SIDI i Musa: “Ad řeqfeɣ ɛad mɣir s yicten jjriḥect x firɛun d Miṣra. Awarni ta ad kenniw issekk ssa. Ɣar uneggar xmi kenniw ɣa yejj ad truḥem marra, ad xawem yaẓẓeř ssa s tidett. 2 Siweř xenni deg imezzuɣen n řgens maḥend ad ittar kuř aryaz zeg wajjar nnes u kuř tamɣart zi tajjart nnes řeqcuɛ n nnuqart d wureɣ.” ◘11:2 Uf. 3:22; 12:35 3 SIDI iwca as i řgens arḍa di tiṭṭawin n Imiṣriyyen. Ɛawed tuɣa Musa d ijj weryaz s ccan ameqqran di temmurt n Miṣra di tiṭṭawin n řgens u di tiṭṭawin n imsexxaren n firɛun. ◘11:3 Uf. 12:36 4 Inna Musa: “Ammu i inna SIDI: ‘Ɣar wezyen n ǧiřet Necc ad ɛduɣ di řwesṭ n Miṣra ◘11:4 Uf. 12:29 5 uca ad immet kuř amenzu di temmurt n Miṣra, zeg umenzu n firɛun, wenni iqqimen x řɛarc n tgeldit, ař amenzu n tayya, tenni iqqimen awarni i tsirt tḥarri imendi, uřa d kuř amenzu zi řebhayem. ◘11:5 Uf. 12:12 6 Ad din tiři ict n tɣuyyit d tameqqrant x marra tammurt n Miṣra i war tuɣi ɛemmarṣ niɣ ɛemmarṣ ɛad ad tiři. 7 Maca ɣar marra ayt n Israil, war ittẓu uřa d ijj n weqzin x iwdan uřa x řmař, maḥend ad tessnem, belli SIDI ittegg řfarz jar Imiṣriyyen d Israil.’ 8 Xenni ad ɣari dd-hwan marra imsexxaren nnec, ad ayi bendqen, ad inin: ‘Ffeɣ cek d marra řgens i cek iḍeffaren deg iṣuraf nnec!’ Awarni man aya necc ad ffɣeɣ.’ ” Uca iffeɣ x firɛun, tekkar dayes tmessi s uxeyyeq. ◘11:8 Uf. 12:30

9 Aqa inna SIDI i Musa: “Firɛun war d awem ittesři ca, ḥima ad mɣarent řeɛřamat inu di temmurt n Miṣra.” 10 Aqa Musa d Harun ggin marra řeɛřamat-a zzat i wudem n firɛun, maca SIDI tuɣa isseqseḥ uř n firɛun ařami war ijji ad ffɣen ayt n Israil zi temmurt nnes. ◘11:10 Uf. 9:16; Rum. 9:17