1 Yarwes Musa uǧi n Yitru, aḍeggʷař nnes, akehhan n Midyan. Indeh uǧi awarni i řexřa uca yiwiḍ-dd ɣar wedrar n AREBBI, ɣar Ḥurib. 2 Iban as-dd lmalak n SIDI deg ijj n uceɛɛuř di řwesṭ n ijj n cbarq ak-d isennanen, u xzar, netta iẓra belli cbarq ak-d isennanen tuɣa tekkar dayes tmessi, maca cbarq war ittwacmeḍ ca. 3 Inna Musa: “Ejj ayi ad qewseɣ cwayt, maḥend ad ẓareɣ tameẓriwt nni tameqqrant, mayemmi cbarq ak-d isennanen war icemmeḍ ca.” 4 Řami iẓra AREBBI belli ijja abrid, maḥend ad iẓar man aya, iřaɣa-dd xas AREBBI zi řwesṭ n cbarq ak-d isennanen, inna: “Musa, Musa!” Netta yarra: “Aqa ayi da!” 5 Xenni inna Netta: “War dd-ttqarrab ca danita! Kkes tisiřa nnec zeg iḍaren nnec, minzi amcan i xef tbedded, aqa-t d tammurt tqeddes.” ◘3:5 Yac. 5:15 6 Inna ɛawed: “Necc d AREBBI n babac, AREBBI n Ibrahim, AREBBI n Isḥaq d AREBBI n Yaɛqub.” Řexdenni issduriy Musa aɣembub nnes, minzi iggʷed ad isweḍ di AREBBI. ◘3:6 Mt. 22:32; Mk. 12:26; Lk. 20:37; Řex. 7:32

7 Inna SIDI: “Aqa ẓriɣ řmeḥnet i di iddar řgens inu i iǧan di Miṣra uca sřiɣ iɣuyyan nsen zzat i imzeyyaren nsen, aqa ssneɣ tamara nsen. ◘3:7 Řex. 7:34 8 Hwiɣ-dd ḥima ad fekkeɣ řgens zeg ifassen n Imiṣriyyen, ad t ssuffɣeɣ zi temmurt nni ɣar ict n temmurt teṣbeḥ d tmiriwt, ɣar ict n temmurt ifeyyḍen s uɣi d tamment, ɣar wemcan n ayt n Kenɛan d Iḥittiyyen d Imuriyyen d Ifiriziyyen d Iḥiwiyyen d Iyibusiyyen. 9 Xzar řexxu, aqa tiweḍ-dd ɣari tɣuyyit n ayt n Israil uca ɛawed ẓriɣ ddeǧ nsen i zi ten deǧen Imiṣriyyen. 10 Řexxu xenni, ruḥ, Necc ad cek ssekkeɣ ɣar firɛun u cek ad tsuffɣed řgens inu, ayt n Israil, zi Miṣra.” ◘3:10 Izhd. 105:26; Ḥuc. 12:14; Mixa 6:4; Řex. 7:35

11 Xenni inna Musa i AREBBI: “Min ɛniɣ necc ařami ɣa raḥeɣ ɣar firɛun, ad ssuffɣeɣ ayt n Israil zi Misra?” 12 Netta inna as: “Necc ad kik iřiɣ u tanita ad ac tiři d řeɛřamet, belli Necc ssekkeɣ-dd cek: x minni i ɣa tessuffɣed řgens-a zi Miṣra, ad tɛebdem AREBBI x wedrar-a.” ◘3:12 Yac. 1:5 13 Xenni inna Musa i AREBBI: “Xzar, xmi dd ɣa awḍeɣ necc ɣar ayt n Israil, ad asen iniɣ: ‘AREBBI n řejdud nwem issekk ayi-dd ɣarwem!’, uca nitni ad ayi sseqsan: ‘Mammec d as qqaren?’, min d asen ɣa iniɣ xenni?” 14 Inna AREBBI i Musa: “NECC d NECC i ǧiɣ”. Uca inna ɛawed: “Ammu i ɣa tinid i ayt n Israil: NECC d NECC i ǧiɣ! aqa Netta d Wenni d ayi dd-issekken ɣarwem.” 15 Inna AREBBI ɛawed i Musa: “Ammu i ɣa tinid i ayt n Israil: ‘SIDI, AREBBI n řejdud nwem, AREBBI n Ibrahim d AREBBI n Isḥaq d AREBBI n Yaɛqub, issekk ayi-dd ɣarwem. D wa d Isem inu i řebda u Yisem wanita ad yiři i řidaret dayi zi jjiř ař jjiř.’ 16 Ruḥ, tessmuned imɣaren n Israil, ini asen: ‘SIDI, AREBBI n řejdud nwem, AREBBI n Ibrahim d Isḥaq d Yaɛqub iban ayi-dd, inna: ‘Aqa xawem ḥinneɣ uca ẓriɣ min xawem sseɛdun di Miṣra. 17 Nniɣ: Necc ad kenniw ssuffɣeɣ zi řmeḥnet di Miṣra ɣar temmurt n ayt n Kenɛan d Iḥittiyyen d Imuriyyen d Ifiriziyyen d Iḥiwiyyen d Iyibusiyyen, ɣar ict n temmurt ifeyyḍen s uɣi d tamment.’ 18 Ad sřen i tmijja nnec, uca ad traḥed, cek d imɣaren n Israil, ɣar ujeǧid n Miṣra, ad as tinim: ‘SIDI, AREBBI n Iɛibraniyyen, imsagar akidneɣ. Xenni řexxu, ejj aneɣ ad neṭṭef abrid ticři n třata n wussan di řexřa, ḥima ad nqeddem tiɣarṣa i SIDI, AREBBI nneɣ.’ ◼3:18 taɣarṣt - tiɣarṣa - niɣ ‘ddebiḥet’, ‘ddbayeḥ’. 19 Maca Necc ssneɣ belli ajeǧid n Miṣra war kenniw ittejji ad traḥem uřa s ufus ijehden. 20 Xenni ad sswiẓẓḍeɣ afus inu, ad wteɣ Miṣra s marra lmuɛjizat inu i dayes i ɣa ggeɣ di řwesṭ nnes, uca awarni i man aya, netta ad kenniw yejj ad traḥem. 21 Ad ḥinneɣ x řgens-a zzat i tiṭṭawin n Imiṣriyyen uca ad imsar, xmi ɣa traḥem, war tᵉtteffɣem ca s ifassen xwan. 22 Ad tᵉttar kuř tamɣart zi tajjart nnes u zi tbarranit nni akides izeddɣen di taddart, řeqcuɛ n nnuqart d wureɣ d warruḍ, uca kenniw ad ten teggem x iḥenjiren d tḥenjirin nwem, uca ammu i ɣa tkeccḍem Miṣra.” ◘3:22 Uf. 11:2; 12:35; Ḥiz. 39:10