1 Deg ijj zeg wussan nni, am tuɣa netta isseřmad řgens di Zzawect Tameqqrant, ittbarreḥ s Řexbar Aṣebḥan, xenni ɣewwɣen xas imeqqranen n ikehhanen d imseřmaden n idlisen ak-d imɣaren n řgens. ◘20:1 [Mt. 21:23-27; Mk. 11:27-33] — Mt. 21:23; Mk. 11:27; Řex. 4:7; 7:27. 2 Ssiwřen akides, nnan: “Ini aneɣ, s man ttesriḥ i tᵉttegged aya, niɣ man wen i d ac iwcin ttesriḥ-a?” 3 Yarra-dd Yasuɛ, inna asen: “Uřa d Necc ad kenniw sseqsiɣ ijj n useqsi. Inim ayi: 4 Ma aseɣḍeṣ n Yuḥanna zeg ujenna niɣ zeg iwdan?” 5 Mcawaren jar asen, nnan: “Mařa nenna: ‘Zeg ujenna!’, ad yini: ‘Mayemmi xenni war zzayes tuminem?’ 6 Mařa nenna: ‘Zeg iwdan!’, ad aneɣ yarjem marra řgens, minzi nitni ttwassqenɛen belli Yuḥanna d anabi.” 7 Nnan as: “Neccin war nessin zi manis!” 8 Xenni inna asen Yasuɛ: “Xenni uřa d Necc war d awem qqareɣ s man ttesriḥ i tteggeɣ aya!”

9 Ibda ittɛawad i řgens amedya-ya: “Ijj n bnadem igga ijj n umarjeɛ n uḍiř, iẓẓu dayes tizayarin, icra amarjeɛ i ixemmasen, uca isafar ijj n řmijař n řweqt d azirar. ◘20:9 [Mt. 21:33-46; Mk. 12:1-12] — Izhd. 80:9; Ica. 5:1; Irm. 2:21; 12:10; Mt. 21:33; Mk. 12:1. 10 Ařami dd-yiweḍ řḥař, issekk ijj n umsexxar ɣar ixemmasen ḥima ad as wcen zeg uḍiř n umarjeɛ. Wtin t ixemmasen nni uca ssekken t-i-dd ixwa. 11 Xenni issekk ɛawed ijj n umsexxar nneɣni, wtin t ɛawed, deǧen t, xenni sekken t-i-dd ixwa. 12 Issekk ɛawed amsexxar wiss třata, maca nitni ssyezmen t ɛawed uca nḍaren t ɣar barra.

13 Inna bab n umarjeɛ n uḍiř: ‘Min ɣa ggeɣ? Ad ssekkeɣ mmi iɛizzen. Xmi t ɣa ẓaren, ad t weqqaren nican.’ 14 Umi t ẓrin ixemmasen, mcawaren jar asen, nnan: ‘Aqa d wa d awrit. Zid ad t nneɣ, ḥima ad ɣarneɣ dd-idweř řwart.’ ◘20:14 Amz. 37:17; Izhd. 2:1, 8; Mt. 26:3; 27:1; Yḥ. 11:53; Ɛbr. 1:2. 15 Mmenḍaren t barra i umarjeɛ n uḍiř uca nɣin t. Min zzaysen i ɣa yegg xenni bab n umarjeɛ n uḍiř? 16 Ad dd-yas, ad ineɣ ixemmasen nni, uca ad iwc amarjeɛ n uḍiř i inneɣni.” Umi sřin aya, nnan as: “Ɛemmarṣ!” 17 Maca Netta ixzar ɣarsen, inna: “Min ixs ad yini xenni wawař-a i yuran:

‘Aẓru i tuɣa iɛiffen ibennayen,

aqa idweř d aẓru n Uzeǧif n teɣmart! ◘20:17 Izhd. 118:22; Ica. 8:14; 28:16; Mt. 21:42; Mk. 12:10; Řex. 4:11; Rum. 9:33; 1 Bṭ. 2:4, 7.

18 Marra wi ɣa iwḍan x weẓru-ya,

ad ifartek,

u wenni xef i ɣa iwḍa,

ad t iřbez’?” ◘20:18 Ica. 8:15; Dan. 2:34; Zak. 12:3.

19 Arezzun imseřmaden n idlisen d imeqqranen n ikehhanen ad xas ssarsen ifassen di tsaɛɛet nni, maca nitni ggʷeden zeg iwdan, minzi ssnen belli Netta inna amedya-ya xasen.

20 Ḥḍan t uca ssekken ibergagen inni iggin ixef nsen amecnaw imseggaden, ḥima ad as ggen ijj n řfex di ssibbet n ijj n wawař, maḥend ad t sellmen i řqaḍi d jjehd n lɛamil. ◘20:20 [Mt. 22:15-22; Mk. 12:13-17] — Mt. 22:16; Mk. 12:13. 21 Sseqsan t, nnan: “A Amseɣɣar, nessen belli Cek tessawařed u tesseřmaded nican, war tᵉttegged ca s wudmawen u tesseřmaded abrid n AREBBI s tidett. 22 Ma iḥeǧeř aneɣ ad newc řeɛcur i kuř ijjen uzeǧif i qayṣar niɣ lla?” 23 Yuca s teḥraymect nsen uca inna asen: “Mayemmi d ayi tᵉttjarrabem? 24 Secnem ayi-dd dinar. Wi yiřan taṣwirt-a d tira-ya?” Nnan as: “N qayṣar!” 25 Xas uca inna asen Yasuɛ: “Wcem xenni i qayṣar min iǧan i qayṣar u i AREBBI min iǧan i AREBBI!” ◘20:25 Mt. 17:25; 22:21; Rum. 13:7. 26 War zemmaren ad t ṭṭfen s wawař nnes qibač i iwdan, maca qqimen ttbehten s temwarrit nnes uca sseɣden.

27 Usin-dd ca zeg Iṣaduqiyyen inni iqqaren, war din bu tnukra zi řmewt. Sseqsan t, ◘20:27 [Mt. 22:23-33; Mk. 12:18-27] — Mt. 22:23; Mk. 12:18; Řex. 23:8. 28 nnan as: “A Amseɣɣar, yura aneɣ Musa, mařa immut i weryaz umas i ɣar iǧa tamɣart uca immut břa iḥenjiren, xenni ad yawi umas tamɣart nni, maḥend ad dd-yejj aḥenjir i umas. ◘20:28 Aɛwd. 25:5-6. 29 Tuɣa din sebɛa n wawmaten. Amezwar yiwi ict n temɣart, maca immut břa iḥenjiren. 30 Yiwi wenni d wiss tnayen tamɣart nni uca uřa d netta immut břa iḥenjiren. 31 Xenni wenni d wiss třata yiwi tamɣart nni uca ammu inneɣni ař wiss sebɛa. Mmuten nitni marra idsen, war dd-jjin ca iḥenjiren. 32 Ɣar uneggar temmut temɣart ɛawed. 33 Di tnukra i man wen zzaysen i ɣa tiři d tamɣart? Minzi marra sebɛa nni iwyen tt d tamɣart!”

34 Inna asen Yasuɛ: “Ayt n ddunect-a iwyen timɣarin, u timɣarin ttwassmeǧacent i yeryazen. 35 Maca inni ittwaḥesben sdaheǧen ad awḍen ɣar ddunect nni u ɣar tnukra zi taddart n imettinen, war ttiwyen timɣarin, u timɣarin war ttiřint i yeryazen. 36 Maɣar war zemmaren ɛad ad mmten, minzi nitni am lmalakat u nitni d tarwa n AREBBI, minzi nitni dewřen d tarwa n tnukra. ◘20:36 1 Yḥ. 3:2. 37 Maca zi jjihet n imettinen ad ttwassnekkaren, tuɣa issbeyyan Musa ɛawed umi iḥaja x cbarq ak-d isennanen, aqa SIDI inna: ‘NECC d AREBBI n Ibrahim d AREBBI n Isḥaq d AREBBI n Yaɛqub.’ ◘20:37 Uf. 3:6; Řex. 7:32; Ɛbr. 11:16. 38 Netta war iǧi ca d AREBBI n imettinen, maca n yinni iddaren, minzi ɣares Netta nitni marra ddaren.” 39 Arrin-dd ca zeg imseřmaden n idlisen, nnan: “A Amseɣɣar, tessiwřed mliḥ aṭṭas!” 40 Uca war zɛimen ɛad ad t sseqsan x ca.

41 Inna asen: “Mammec zemmaren imseřmaden n idlisen ad inin belli Lmasiḥ d Mmis n Dawud? ◘20:41 [Mt. 22:41-46; Mk. 12:35-37] — Mt. 22:42; Mk. 12:35. 42 Dawud simant nnes iqqar deg wedlis n Izehhiden:

‘SIDI inna i Sidi inu:

Qqim x ufusi inu, ◘20:42 Izhd. 110:1; Řex. 2:34; 1 Kur. 15:25; Ɛbr. 1:13; 10:13.

43 ař d ɣa ssarseɣ řɛedyan nnec

sadu iḍaren nnec.’ ◘20:43 Izhd. 110:1.

44 Mařa Dawud isemma t ‘Sidi’, mammec ɣa yiři Netta d mmis?”

45 Am tuɣa marra iwdan zemmaren ad sřen, inna i imeḥḍaren nnes: ◘20:45 [Mt. 23:1-36; Mk. 12:38-40; Lk. 11:37-54] 46 “Ḥḍam ixef nwem zeg imseřmaden n idlisen inni ittexsen ad uyuren s ijeǧaben iziraren, inni umi itteɛjib asen ad xasen seǧmen iwdan di řeswaq u ad qqimen x řekrasi iṣebḥen di temzidawin u x imucan imezwura ɣar imensiwen. ◘20:46 Mt. 23:5, 6; Mk. 12:38, 39; Lk. 11:43. 47 Nitni ttᵉtten tudrin n tijjař am ttᵉttaren tiwhibin di ṭṭweɛ n tẓaǧatin nsen tizirarin. Aqa ina ad ksin ijj n řḥukm iqseḥ.” ◘20:47 Mt. 23:14; Mk. 12:40; 2 Tim. 3:6; Tit. 1:11.