Iɛibraniyyen
1
Mmis yuɛřa aṭṭas x lmalakat
1 Deg wussan iɛdun issiweř AREBBI di kuř řweqt u deg waṭṭas n ibriden ak-d řejdud nneɣ s inabiyyen. 2 Deg wussan-a ineggura aqa issiweř-dd akidneɣ s Mmis, wenni igga d Awrit n kuřci, s Wenni ɛawed igga zzmanat. ◘1:2 Amz. 1:3; Izhd. 33:6; Mt. 21:38; Yḥ. 1:3; Afa. 3:9; Kul. 1:16. 3 Minzi Netta d talellect n uɛuǧi nnes uřa d tteswirt n Simant nnes, u Netta d wenni yarebbun marra timesřayin s jjehd n Wawař nnes. Aqa Netta issizdeg ddnub nneɣ di ṭṭbiɛet n Yixef nnes, uca iruḥ iqqim ɣar yefus n Lɛaḍim di řuɛřa. ◘1:3 2 Kur. 4:4; Fil. 2:6; Kul. 1:15. 4 Netta yuɛřa aṭṭas x lmalakat am Isem i iṭṭef d řwart, aqa icna x wenni nsen.
5 Minzi i man ten zi lmalakat inna AREBBI:
“Mmi i teǧid Cek,
ass-a Necc jjiɣ-dd Cek!”,
uca ɛawed inna:
“Necc ad as iřiɣ d Babas
u Netta ad ayi yiři d Mmi”? ◘1:5 2 Ṣm. 7:14; 1 Im. 17:13; 22:10; Izhd. 2:7; Řex. 13:33; Ɛbr. 5:5.
6 Uca xenni xmi dd-issidef Amenzu ɣar ddunect, inna:
“Ad as sejdent marra lmalakat n AREBBI.” ◘1:6 Izhd. 97:7.
7 Maca x lmalakat inna:
“Netta igga lmalakat nnes d isemmiḍen,
uca imsexxaren nnes
d ict n tmessi itteḥduduqen”, ◘1:7 Izhd. 104:4
8 Maca x Mmis:
“Řɛarc nnec, a AREBBI,
aqa iǧa i řebda qaɛ.
Azeǧaḍ n Tgeldit nnec,
aqa-tt d azeǧaḍ iseggden. ◘1:8 Izhd. 45:7.
9 Aqa texsed tasegda, tcarhed řɣar.
S uyenni aqa idhen i c
AREBBI, AREBBI nnec,
s zzect n řefraḥet
sennej i imɛacaren nnec.” ◘1:9 Izhd. 45:7, 8
10 Uca xenni:
“Zeg ubeddu teggid Cek dsas n temmurt,
ijenwan ǧan d řxedmet n ifassen nnec. ◘1:10 Izhd. 102:26.
11 Ina ad ttwateḥḥan, maca Cek ad tdumed,
uca ina marra ad arcan am warruḍ. ◘1:11 Ica. 51:6; 2 Bṭ. 3:7, 10.
12 Amecnaw ijj n useřham ad ten ttḍefsed.
Ad ttwabeddřen am warruḍ,
maca Cek ad tiřid d wenni
uca iseggʷusa nnec war qeṭṭin ca.” ◘1:12 Izhd. 102:26-28.
13 Maca i man ten zi lmalakat inna ijj n wass:
“Qqim ɣar yefus inu
ař d ɣa ggeɣ řɛedyan nnec
d tanebdat sadu iḍaren nnec”? ◘1:13 Izhd. 110:1; Řex. 2:34; 1 Kur. 15:25; Afa. 1:20; Ɛbr. 10:12.
14 Ma war ǧint nitenti d arruḥat i tsexxart, ttwassekkent-i-dd ḥima ad sexxarent i yinni ɣa iwarten Tudart?
◘1:2 1:2 Amz. 1:3; Izhd. 33:6; Mt. 21:38; Yḥ. 1:3; Afa. 3:9; Kul. 1:16.
◘1:3 1:3 2 Kur. 4:4; Fil. 2:6; Kul. 1:15.
◘1:5 1:5 2 Ṣm. 7:14; 1 Im. 17:13; 22:10; Izhd. 2:7; Řex. 13:33; Ɛbr. 5:5.
◘1:6 1:6 Izhd. 97:7.
◘1:7 1:7 Izhd. 104:4
◘1:8 1:8 Izhd. 45:7.
◘1:9 1:9 Izhd. 45:7, 8
◘1:10 1:10 Izhd. 102:26.
◘1:11 1:11 Ica. 51:6; 2 Bṭ. 3:7, 10.
◘1:12 1:12 Izhd. 102:26-28.
◘1:13 1:13 Izhd. 110:1; Řex. 2:34; 1 Kur. 15:25; Afa. 1:20; Ɛbr. 10:12.