45
1 I umeqqran n imeɣnajen. S teɣnint n ‘Tlillicin’. Zeg ayt n Quraḥ. Axemmi. Izři n tayri.◼45:1 tilillicin - ict n marka n nnuwarat daysen aẓri aṭṭas.
2 Zeg wuř inu idduqqez-dd
ijj n wawař d aṣebḥan,
qqareɣ i Ujeǧid min sswejdeɣ,
iřes inu d řeqřem n ijj n umarir imeḥḍen. ◼45:2 řeqřem - niɣ ‘stilu’ niɣ ‘plumu’.
3 “Cek tecnid x marra tarwa n bnadem,
řxaḍar ittwazeǧeɛ x iyencicen nnec,
x uya ibarek i Cek AREBBI i řebda.
4 Byes ssif x tmessaḍt nnec,
a bu-teɣruḍt,
tissiqt nnec d řɛezz nnec.
5 Wah, řɛezz nnec! Iři tfeřḥed,
ndeh di ṭṭweɛ n tidett,
ḍidd i řeḥṣaret n tsegda.
Afus nnec afusi ad Cek isseřmed
timesřayin ssaggʷadent.
6 Fřitcat nnec qeḍɛent,
- wah, řegnus ad wḍan sadu ufus nnec -
cuqent uř n řɛedyan n Ujeǧid.
7 Řkursi nnec igellden, a AREBBI,
aqa-t i řebda qaɛ.
Azeǧaḍ n Tgeldit nnec
d ijj n uzeǧaḍ n tsegda. ◘45:7 Ɛbr. 1:8
8 Cek tᵉttexsed tasegda u tcarrhed řɣar.
X uya i Cek idhen, a AREBBI, AREBBI nnec
s zzect n řefraḥet
tiwa i iɛciren nnec. ◘45:8 Ɛbr. 1:9
9 Marra řeɛbayat nnec
am mirru d wecfiř d řqarfa,
zi řeqṣur n řɛaj ssfarraḥen Cek
s uzenzun x ifiřan n řgambri, ◼45:9 acfiř - ixs ad yini ‘aluwi’ (‘aluwis’). řɛaj - ixs ad yini ‘accawen n lfil’.
10 yessis n ujeǧid aqa-tent
jar tinewjiwin nnec iweqqaren,
tasřit n Ujeǧid tbedd ac x ufusi,
s werruḍ zeg wureɣ iɣřan qaɛ zi Ufir.
11 Seř, a yeǧi, xzar, ewc amezzuɣ nnem!
Ttu řgens nnem d taddart n babam!
12 Xenni Ajeǧid ad immeẓri deg waẓri nnem,
maɣar Netta d Sidi nnem!
Bendeq zzates!
13 Yeǧis n Ṣur s ict n tarzeft,
wah, ayt n bu-wagřa n ijj n řgens
ad arzun ad xam arḍan. ◘45:13 Izhd. 72:10
14 Yeǧis n Ujeǧid
aqa-tt d aɛuǧi marra daxeř,
arruḍ nnes d ijj n umudi
zeg ufiřu n wureɣ.
15 Ad tᵉttwandeh ɣar Ujeǧid
deg warruḍ s tintat ifarzen.
Tiɛzariyyin tinni tt iḍeffaran,
aqa atent d timeddukkař nnes
nni dd ɣarek ttwawyent.
16 Aqa ttwawyent s řefraḥet d warceq,
ammu i ɣa adfent
ɣar řeqṣar n Ujeǧid.
17 Tarwa nnec ad iřin
deg wemcan n řejdud nnec,
Cek ad ten tegged d řḥukkam
di marra tammurt.
18 Necc ad idareɣ Isem nnec
di kuř jjiř d kuř jjiř awarni as.
X uya, ad Cek qadan
marra řegnus i řebda qaɛ.”
◼45:1 45:1 tilillicin - ict n marka n nnuwarat daysen aẓri aṭṭas.
◼45:2 45:2 řeqřem - niɣ ‘stilu’ niɣ ‘plumu’.
◼45:9 45:9 acfiř - ixs ad yini ‘aluwi’ (‘aluwis’). řɛaj - ixs ad yini ‘accawen n lfil’.
◘45:13 45:13 Izhd. 72:10