1 Minzi tuɣa Ccariɛa d tiři n řxar i dd ɣa yasen waha, war ɣares ṭṭbiɛet n tmesřayin simant nsent. S uyenni war zemmarent tɣarṣa nni, waxxa iwyen tent-i-dd kuř aseggʷas, ad awyent řekmaret x yinni tent dd-ittqarraben. ◘10:1 Kul. 2:17; Ɛbr. 8:5. 2 Minzi mařa iban-dd aqa tᵉttawyent ɣar řekmaret, ad tiři ttwassbedden nitni zeg uwehheb n tɣarṣa nsen aṭṭas zeg wami, minzi war tᵉttwakkʷur ɛad tnefsect nsen s ddenb awarni řami ttwassizedgen ict n twařa. 3 Maca s man aya ttwassfekkaren asen-dd ddnub nsen kuř aseggʷas, 4 minzi idammen n ifunasen imeẓyanen d iɣayḍen war zemmaren ad ssizdegen zi ddnub. ◘10:4 Lawi 16:14; Řxř. 19:4; Ɛbr. 9:13. 5 S uyenni řami dd-yudef ɣar ddunect, inna:

“Tiɣarṣa niɣ tiwhibin war tent texsed,

maca aqa tessyarḍed ayi ict n arrimet. ◘10:5 Izhd. 40:7; Ica. 1:11; Irm. 6:20; Ɛam. 5:21.

6 Tiɣarṣin n wecmaḍ

ak-d tiɣarṣa n řehna i ddnub

war tent tᵉttared.”

7 Řexdenni nniɣ:

“Xzar, ad dd-aseɣ!

- minzi yura xafi deg Wedlis ittwanḍen -

ḥima ad ggeɣ min texsed Cek, a AREBBI!” ◘10:7 Izhd. 40:8, 9

8 Tuɣa inna qbeř: “Tiɣarṣin d tewhibin d tɣarṣin s tmessi d tɣarṣin i ddnub war tent texsed!”, waxxa aqa atent ttwaqeddment ɛlaḥsab Ccariɛa. 9 Awarni man aya inna: “Xzar, usiɣ-dd ḥima ad ggeɣ min texsed Cek, a AREBBI.” S uya ikkes amezwar, ḥima ad issgeɛɛed wiss tnayen. 10 Maɣar s man aya, s řxaḍar nnes, aqa nettwaqeddes deg ict n twařa s tɣarṣt n Arrimet n Yasuɛ Lmasiḥ. ◘10:10 Ɛbr. 9:12.

11 Maɣar kuř akehhan i tuɣa ittsexxar kuř ass, aqa iwehheb aṭṭas n twařawin simant n tɣarṣa, tinni war izemmaren ad ssizedgent zi ddnub. 12 Maca Wanita iqeddem ict n tɣarṣt x ddnub, uca xenni iqqim x yefus n AREBBI i řebda. ◘10:12 Izhd. 110:1; Řex. 2:34; 1 Kur. 15:25; Afa. 1:20; Kul. 3:1; Ɛbr. 1:13. 13 Zi řexdenni ittraja ař d as ttwaggen řɛedyan nnes d tanebdat sadu iḍaren nnes. 14 Minzi s ict n tɣarṣt aqa yiwi inni zzayes ittwaqeddsen ɣar řekmaret i řebda.

15 Maca Arruḥ Iqeddsen ɛawed iched i neccin, iqqar:

16 “D wa d Řɛahd i d asen ɣa wceɣ

awarni i wussan nni, iqqar SIDI:

‘Ad ggeɣ Ccariɛa inu di řeɛqeř nsen,

ad tt ariɣ ɛawed deg wuřawen nsen, ◘10:16 Irm. 31:31-34; Rum. 11:27; Ɛbr. 8:8.

17 uca ddnub nsen d ixeṭṭan nsen,

ɛemmarṣ ad daysen fekkareɣ ɛad.’ ” ◘10:17 Irm. 31:33, 34.

18 Mani ittiři xenni weɣfar i ddnub, war din iqqim ɛad tɣarṣt x ddnub. 19 S uyenni, a aytma, aqa ɣarneɣ ttiqqet maḥend ad nadef ɣar Zzawect Iqeddsen s Idammen n Yasuɛ, ◘10:19 Yḥ. 10:9; 14:6; Rum. 5:2; Afa. 2:13; 3:12. 20 x Webrid n jdid iddaren i d aneɣ issewjed am Webrid n jdid i dd-ittadfen ɣar daxeř n uřeḥḥaf n tewwart, wenni d weysum nnes, 21 uca aqa ɣarneɣ ɛawed Arrays n ikehhanen x Taddart n AREBBI. ◘10:21 Afa. 2:19; 1 Tim. 3:1; 1 Bṭ. 4:17 22 Ejj aneɣ xenni ad dd-nqarreb s wuř n tidett, di ttiqqet n l’iman, am ttwaruccen wuřawen nneɣ u ttwassizdegen ɛawed zi tnefsect taɛeffant, u am tᵉttwassird ɛawed arrimet nneɣ s waman iṣfan. ◘10:22 Ḥiz. 36:25. 23 Ejj aneɣ ad ncebbar di cchadet n usitem nneɣ břa ma ad narjij, minzi d Wenni d aneɣ iwcin lwaɛd, dayes řaman. 24 Ejj aneɣ ad neḥḍa ijj i wenneɣni ḥima ad negg uř deg wayawya ɣar tayri u ɣar řexdayem tiṣebḥanin. 25 War nᵉttejji ca tamesmunt nneɣ am mammec nnumen ca, maca ad nessemḥeḍ ijjen wenneɣni, mahu ɛad xmi ɣa tẓarem aqa ass nni yiweḍ-dd.

26 Minzi mařa ixḍa ca n ijj neɛmada awarni ma iṭṭef tussna n tidett, xenni war teqqim ɛad tɣarṣt x ddnub, ◘10:26 Řxř. 15:30; Mt. 12:31; Ɛbr. 6:4; 2 Bṭ. 2:20; 1 Yḥ. 5:16. 27 maca mɣir araji n lḥisab issnexřɛen d řɛabuq n tmessi nni i ɣa iccen řɛedyan. 28 Mařa ixḍa ḥed ak-d Ccariɛa n Musa, ittxeṣṣa ad immut břa arreḥmet x uqemmum n tnayen niɣ třata n řechud. ◘10:28 Řxř. 35:30; Aɛwd. 17:6; 19:15; Mt. 18:16; 2 Kur. 13:1. 29 Mecḥař ktar ittxeṣṣa ad ihwa lɛiqab x uzeǧif n wenni iɛeffsen x Mmis n AREBBI, d wenni iḥessben Idammen n Řɛahd nnes i zi tuɣa ittwaqeddes amecnaw idammen n marra iwdan, d wenni isseḥqaren ɛawed Arruḥ n arḍa? 30 Minzi nessen d Wenni innan:

“Antaqem i Necc umi iǧa,

Necc ad t xeǧṣeɣ!”

Uca ɛawed:

“SIDI ad iḥkem řgens nnes.” ◘10:30 Aɛwd. 32:35, 36; Rum. 12:19.

31 Sseɛd d abarcan i wenni i ɣa iwḍan deg ifassen n AREBBI iddaren. 32 S uya fekkarem deg wussan imezwura řami tᵉttwassɣeḍṣem u tuɣa tarebbum amenɣi ameqqran am mammec xawem tekka řefḍiḥet d řmeḥnet. 33 Tdewřem d ijj n afurrej u tcarcem ak-d inneɣni umi daysen ittwagg ammu kifkif. 34 Minzi teksim amnus x yinni ittwaḥebbsen, uca tqebřem akecceḍ n wagřa nwem s řefraḥet, tessnem belli ɣarwem agřa imɣar i war ifennin deg ijenwan. ◘10:34 Mt. 5:12; Řex. 21:33. 35 War neṭṭarem ca taryast nwem nni ɣar teǧa ict n řmunet temɣar. 36 Minzi ittxeṣṣa kenniw ṣṣbar ḥima ad teggem min ixs AREBBI u maḥend ad tᵉṭṭfem lwaɛd. ◘10:36 Lk. 21:19.

37 “Minzi drus n řweqt i dinni, wah drus,

ař Wenni dd ɣa yasen ad ixecc,

war ittɛeṭṭař ca. ◘10:37 Ḥab. 2:2-3; Ḥag. 2:7; 1 Bṭ. 1:6; 5:10.

38 Maca amseggad s l’iman inu ad iddar,

maca mařa ismeḥ,

war dayes yareṭṭi řeɛmar inu.” ◘10:38 Ḥab. 2:4; Rum. 1:17; Gal. 3:11.

39 Maca neccin war ɣarneɣ min ɣa negg s tarexxut i ittawyen ɣar txessart, maca ɣarneɣ l’iman i ittawyen ɣar usenjem n řeɛmar nneɣ.