1 Aqa ta d twařa wiss třata ad ɣarwem dd-aseɣ. “X uqemmum n tnayen niɣ třata n řechud ad ittwaḍmen marra wawař!” ◘13:1 Řxř. 35:30; Aɛwd. 17:6; 19:5; Mt. 18:16; Yḥ. 8:17; Ɛbr. 10:28. 2 Nniɣ tt qbeř uca ad awem tt iniɣ qbeř ɛawed, axmi tt nniɣ řami d ayi tuɣa akidwem wiss martayen, uca ɛawed řexxu, umi ɣabeɣ, ttariɣ tt i yinni ixḍan u i marra inneɣni, aqa, mařa usiɣ-dd twařa nneɣnit, war areḥḥmeɣ ca. 3 Minzi kenniw tarezzum lburhan belli aqa Lmasiḥ i d ayi issawařen, wenni war iḍɛifen daywem, maca aqa ijhed daywem. 4 Waxxa Netta ittwaṣelleb di tuḍɛeft, aqa iddar s jjehd n AREBBI. Uřa d neccin aqa neḍɛef akides, maca ad kis neddar zi jjehd n AREBBI i daywem iǧan.

5 Qeǧbem ixef nwem, ma aqa kenniw tᵉttbeddam di l’iman, arzum řeɛmur nwem. Niɣ war tessinem ca belli Yasuɛ Lmasiḥ aqa-t daywem, u mařa war iǧi amenni, aqa kenniw temmenḍarem? ◘13:5 1 Kur. 11:28. 6 Maca ssitimeɣ ad tessnem, belli war nemmenḍar. 7 Ttᵉttareɣ AREBBI, maḥend war daywem tᵉttwif uřa d ict n řḥajjet d taɛeffant, ḥima ad dd-tban tqeǧebt nneɣ uca kenniw tᵉtteggem min iǧan d aṣebḥan, waxxa neccin nban axmi nᵉmmenḍar. 8 Minzi neccin war nzemmar walu ḍidd i tidett, maca i tidett wah. 9 Minzi neccin nfarreḥ, řami neḍɛef u kenniw tjehdem. Uca nettẓaǧa ɛawed ad tiřim tkemmřem. 10 S uyenni ttariɣ awem-dd man aya am ɣabeɣ, maḥend, xmi dd ɣa yaseɣ, ittxeṣṣa war tteqsiḥeɣ ca ɛlaḥsab ṣṣulṭa i d ayi iwca Sidi inu i řebni, war iǧi i wareddeǧ. ◘13:10 2 Kur. 10:8.

11 Zi ssa d tsawent, a aytma, iřim tfarrḥem d tkemmřem, iřim tᵉttfewwjem, xarrṣem s yijj n uxarreṣ, uca jjem ad din tiři řhudnet jar awem, xenni ad kiwem yiři AREBBI n tayri d řehna. ◘13:11 Rum. 12:16, 18; 15:5; 1 Kur. 1:10; Fil. 2:2; Ɛbr. 12:14; 1 Bṭ. 3:8

12 Seǧmem ijjen x wenneɣni s řehna s usudem iqeddsen. ◘13:12 Rum. 16:16; 1 Kur. 16:20; 1 Ts. 5:26; 1 Bṭ. 5:14.

13 Marra imqeddasen ttseǧamen xawem s řehna.

14 Řehna n Siditneɣ Yasuɛ Lmasiḥ d tayri n AREBBI d tmunt n Arruḥ Iqeddsen ad iřin akidwem marra. Amin.