1 Wekkřeɣ awem učmatneɣ Fubi, tenni d tamsexxart n tmesmunt di Kinxriyus, 2 ḥima ad zzayes tareḥḥbem di Siditneɣ, am mammec ittřiq i imqeddasen, uca ad tt tɛawnem di marra min zzaywem tᵉttar nettat, minzi aqa tɛawen aṭṭas, uřa řa d necc.

3 Seǧmem s řehna x Priskilla d Akwila, inni d imsexxaren akidi di Yasuɛ Lmasiḥ, ◘16:3 Řex. 18:2, 26. 4 Nitni sebbřen tudart nsen x ssibbet inu. War ǧiɣ d necc waha wenni ten ittqadan, maca ɛawed marra timesmunin n řegnus.

5 Seǧmem ɛawed s řehna x tmesmunt tenni di taddart nsen.

Seǧmem x Ibanitus, amɛizz inu, s řehna. Netta d ṣṣabet tamezwarut n Axaya di Lmasiḥ.

6 Seǧmem x Mariya s řehna. Netta tuɣa tᵉttamar aṭṭas xawem.

7 Seǧmem s řehna x Andrunikus d Yuniyas inni d raǧ inu d imeḥbas akidi, aqa aten d iryazen ittwassnen ɣar rrusul, tuɣa aten di Lmasiḥ qbeř xafi.

8 Seǧmem s řehna x Ampliyas, amɛizz inu di Siditneɣ.

9 Seǧmem s řehna x Urbanus, wenni d amsexxar akidneɣ di Lmasiḥ,

u x Astaxis amɛizz inu.

10 Seǧmem s řehna x Apillis wenni ittwafarzen di Siditneɣ.

Seǧmem s řehna x aytbab n taddart n Aristubulus.

11 Seǧmem s řehna x Hirudiyun wenni d řaǧ inu.

Seǧmem s řehna x aytbab n taddart n Narkissus inni iǧan di Siditneɣ. 12 Seǧmem s řehna x Tarifina d Tarifusa, tinni ittamaren di Siditneɣ.

Seǧmem s řehna x Parsis, amɛizz inu, wenni ittamaren aṭṭas di Siditneɣ.

13 Seǧmem s řehna x Rufus wenni ittwafarzen di Siditneɣ, uřa x yemmas tenni ɛawed am yict n yemma i necc.

14 Seǧmem s řehna x Asinkritus, Fligun, Hirmas, Batrubas, Hirmis uca x wawmaten inni akidsen.

15 Seǧmem s řehna x Filuluɣus d Juliya d Niriyus d učmas, d Ulimbas d marra imqeddasen inni akidsen.

16 Seǧmem x wayawya s usudem iqeddsen.

Marra timesmunin n Lmasiḥ marra ttseǧament xawem. ◘16:16 1 Kur. 16:20; 2 Kur. 13:12; 1 Ts. 5:26; 1 Bṭ. 5:14.

17 Maca ttzawageɣ kenniw, a aytma, maḥend ad teḥḍam zi wi itteggen amsebḍi d tɛinkrifin, barra i tɣuri i teɣrim. Beɛɛdem xasen. ◘16:17 Mt. 18:17; Kul. 2:8; 2 Ts. 3:6; 2 Tim. 3:5; Tit. 3:10; 2 Yḥ. 10. 18 Minzi am yina war sexxaren ca i Siditneɣ Yasuɛ Lmasiḥ, maca i uɛeddis nsen. S řehrud iṣebḥen d wawařen izewwqen xeddɛen uřawen n iḥafiyyen. ◘16:18 Ḥiz. 13:18; Fil. 3:19. 19 Minzi ṭṭaɛet nwem tᵉttwassen ɣar marra iwdan. S uyenni farḥeɣ zzaywem, maca xseɣ ad tiřim d imiɣisen di tcuni uřa d imezdagen zi řɣar. ◘16:19 Mt. 10:16; 1 Kur. 14:20. 20 AREBBI n řehna ad iteḥḥa cciṭan sadu iḍaren nwem deɣya. Arḍa n Siditneɣ Yasuɛ Lmasiḥ ad kiwem yiři. Amin.

21 Timutiyu, wenni d amsexxar akidi, ittseǧam-dd xawem s řehna,

uřa d inni zi řaǧ inu: Lukiyus d Yasun d Susipatrus. ◘16:21 Řex. 13;1; 16:1; 17:5; 20:4; Fil. 2:19; Kul. 1:1; 1 Ts. 3:2; 1 Tim. 1:2.

22 Necc, Tartiyus, wenni yuran tabrat-a, ttseǧameɣ xawem di Siditneɣ s řehna.

23 Ittseǧam-dd xawem Xayus s řehna. Netta yareḥḥeb zzayi uřa zi tmesmunt marra.

Ttseǧamen-dd xawem Irastus, wenni x ssenduq n tendint, d Kwartus, tawmat. ◘16:23 Řex. 19:22; 2 Tim. 4:20.

24 I Wenni ɣar teǧa ṣṣulṭa maḥend ad kenniw iḍmen ɛlaḥsab L’Injil inu - L’Injil i ittwabarrḥen zi jjihet n Yasuɛ Lmasiḥ ɛlaḥsab asargab n ssirr nni tuɣa innufaren di zzmanat n zic, 25 maca aqa ittwasseḍhar-dd řexxu s Tira Iqeddsen s ufus n inabiyyen, uca ittwasscen i marra řegnus ɛlaḥsab řumur n AREBBI, wenni iǧan i řebda, ařami d as ɣa ṭṭaɛen řegnus s l’iman - ◘16:25 Afa. 1:9; 3:9, 20; Kul. 1:26; 2 Tim. 1:10; Tit. 1:2; 1 Bṭ. 1:20. 26 aqa i Netta wenni d Bab n tiɣit weḥḥdes, i Netta umi ɣa yiři uɛuǧi s Yasuɛ Lmasiḥ i řebda qaɛ. Amin.

27 Arḍa n Siditneɣ Yasuɛ Lmasiḥ ad kiwem yiři marra. Amin.