1 S uyenni, a aytma, farḥem di Siditneɣ. War xafi yewɛar ad awem ariɣ timesřayin-a twařa nneɣnit, minzi ad zzaysent tᵉttwaḥḍam. ◘3:1 Fil. 4:4; Yaɛ. 1:2; 1 Bṭ. 4:13.

2 Ḥḍam ixef nwem zeg yiṭan, ḥḍam zeg ixeddamen iɛeffanen, ḥḍam zeg inni iqeṭṭɛen aysum. ◘3:2 Ica. 56:10. 3 Minzi neccin d axtan, neccin inni ittsexxaren i AREBBI s Arruḥ, inni issemɣaran di Yasuɛ Lmasiḥ, uca war ttiqqen ca deg wextan n weysum n bnadem. ◘3:3 Aɛwd. 10:16; 30:6; Irm. 4:4; Yḥ. 4:24; Rum. 2:29; Kul. 2:11.

4 Necc zemmareɣ ad ttiqqeɣ deg weysum inu, minzi mařa ittɣiř i ḥed ad ittiqq deg weysum nnes, necc ktar: ◘3:4 2 Kur. 11:21. 5 aqa ayi d amextan zeg wami ɣari tmenya n wussan, zi řgens n Israil, zeg ayt n Binyamin, necc d Aɛibrani zeg Iɛibraniyyen, zi jjihet n Ccariɛa necc d Afarisi, ◘3:5 Amz. 49:27; Lawi 12:3; Řex. 23:6; 2 Kur. 11:22. 6 zeg uɣezdis n cḍaret tuɣa darrceɣ x tmesmunt n Lmasiḥ, zeg uɣezdis n tsegda tenni di Ccariɛa aqa ayi břa řɛib. ◘3:6 Řex. 8:3; 9:1; 22:3, 4; Gal. 1:13; 1 Tim. 1:13. 7 Maca min tuɣa ɣari arbeḥ, aqa ggiɣ t d taxessart x ssibbet n Lmasiḥ. ◘3:7 Mt. 13:44. 8 Necc ggiɣ marra man aya d taxessart zi ssibbet n tussna n Sidi Yasuɛ Lmasiḥ, wenni di ṭṭweɛ nnes xsareɣ kuřci, ggiɣ t amecnaw wefraḍ yurṣuḍen ḥima ad arebḥeɣ Lmasiḥ, ◘3:8 Ica. 53:11; Irm. 9:22; Yḥ. 17:3; Kul. 2:2. 9 maḥend ad ttwafeɣ dayes, war iǧi s tsegda n ixef inu tenni zi Ccariɛa - maca ak-d tenni dd-itteffɣen zi l’iman n Lmasiḥ, aqa-tt d tasegda tenni zi AREBBI - ◘3:9 Rum. 1:17; 3:21. 10 ḥima ammu i ɣa ssneɣ Yasuɛ d jjehd n tnukra nnes, u maḥend ad carceɣ deg uweddeb nnes, ad dewřeɣ deg warwas n řmewt nnes, ◘3:10 Rum. 8:17; 2 Kur. 4:10; 2 Tim. 2:11, 12; 1 Bṭ. 4:13. 11 ḥima s ca n webrid ad awḍeɣ ɣar tnukra zi taddart n imettinen.

12 Necc war ttiwiḍeɣ niɣ ttwakemmřeɣ ɛad, maca yemmareɣ i man aya, ḥima, mařa iɛeddeř, ad ṭṭfeɣ min xef i d ayi iṭṭef Yasuɛ Lmasiḥ. 13 A aytma, war d ayi ittɣiř aqa ṭṭfeɣ t, maca tteggeɣ ict n řḥajjet: ttuɣ min awarni ayi uca ad sswiẓẓḍeɣ ixef inu ɣar min din zzati. 14 Ttizzareɣ ɣar lɣaraḍ ḥima ad ṭṭfeɣ ttaj n uɣelleb n třaɣit yuɛřan n AREBBI tenni iǧan di Yasuɛ Lmasiḥ. ◘3:14 1 Kur. 9:24; 2 Tim. 4:7.

15 Ejj inni iwḍen ɣar řekmaret, ad rekkzen xenni di tmesřayin-a. Uca mařa ɣarwem nneyyet nneɣni di ca, aqa AREBBI ad awem isscen man aya ɛawed. 16 Maca ejj aneɣ, ḥima ad naweḍ ɣar man aya, ad nuyur deg webrid d ijjen s ixariṣṣen nneɣ d ijjen. ◘3:16 Rum. 12:16; 15:5; 1 Kur. 1:10; Gal. 6:16; Fil. 2:2; 1 Bṭ. 3:8. 17 Ḍfarem ayi-dd, a aytma, ksim tiweṣṣaf i inni yuyuren ɛlaḥsab amedya i zzayneɣ teẓrim. ◘3:17 1 Kur. 4:16; 11:1; 1 Ts. 1:6. 18 Minzi aqa din aṭṭas inni yuyuren war iǧi amenni, nniɣ awem tt aṭṭas n imuren - uca řexxu ad tt iniɣ s imeṭṭawen - aqa aten d řɛedyan n ṣṣalib n Lmasiḥ. ◘3:18 Rum. 16:17. 19 Aneggaru nsen d ahellek, arebbi nsen d aɛeddis nsen uca aɛuǧi nsen d abehdeř nsen, u nneyyet nsen di tmesřayin n ddunect. 20 Maca neccin nᵉttsexxar deg ijenwan i zzayes nettraja ɛawed wenni d aneɣ itticen Tudart, Siditneɣ Yasuɛ Lmasiḥ, ◘3:20 1 Kur. 1:7; 1 Ts. 1:10; Tit. 2:13; Ɛbr. 13:14. 21 wenni i ɣa ibeddřen arrimet nneɣ iḥebḍen, ḥima ad tedweř di ṣṣifet n Arrimet nnes iɛuǧen, ɛlaḥsab jjehd nnes tameqqrant i zi i ɣa ittwagg marra min iǧan swadday Nnes. ◘3:21 1 Kur. 15:51; Kul. 3:4; 1 Yḥ. 3:2.