1 “Ax, mři ɣari tazeddiɣt di řexřa i imsebriden, xenni iři semḥeɣ di řgens inu, uyureɣ, maɣar nitni marra d izennayen, amuni n iɣeddaren. ◘9:1 Irm. 5:7, 8 2 Nitni ssqeḍɛen iřes nsen, řqews iccur s ixarriqen. Nitni war dwiřen d ayt n bu-teɣruḍt di temmurt s řmanet, maɣar nitni uyuren zi tɛeffant ɣar učmas umi war d ayi ssinen ca, ammu i iqqar SIDI. ◘9:2 Ica. 59:4, 13, 15; Irm. 6:7 3 Ejj kuř ijj ad iḥḍa ixef nnes zeg umeddukkeř nnes, war ttciřem uřa x tawmat, maɣar kuř tawmat tᵉttegg mɣir acmat u kuř ameddukkeř ittenneḍ am ittceqqaf s řhard nnes. ◘9:3 Irm. 6:28 4 Kuř ijj ittɣarra ameddukkeř nnes, war qqaren ca tidett. Nitni sseřmaden i yiřes nsen ad issxarreq, nitni ssaḥařen ixef nsen s min war iseggden. 5 Tazeddiɣt nnec tbedd di řwesṭ n wecmat. S wecmat nsen ɛewwřen ad ayi ssnen, ammu i iqqar SIDI.”

6 “S uya, ammu i iqqar SIDI n řɛeskarat: ‘Xzar, Necc ad ten ssfesyeɣ u ad ten jarrbeɣ, maɣar mammec ɣa ggeɣ ad kkareɣ xenni ak-d yeǧis n řgens inu? 7 Iřes nsen am fřitca n řqews ineqqen, aqa issawař s wecmat. S uqemmum nnes kuř ijj issawař x řehna ak-d umeddukkeř nnes, maca deg wuř nnes issewjad as ijj n řfex. ◘9:7 Izhd. 12:3; 28:3; 120:4; Awřn. 30:14 8 Ma war zzaysen xeǧfeɣ zi man aya, ammu i iqqar SIDI. Ma war ixeǧef řeɛmar inu zi řgens am wa?” ◘9:8 Irm. 5:9, 29

9 “Necc ad ruɣ, ad ssgeɛɛdeɣ tɣuyyit n uweḥweḥ x idurar d yezři n wecḍan x ddmani n tarewsa, maɣar ttwacemḍen ařami uřa d ijj war ssenni dd-ittekk u war ttesřin řḥess n tḥimriwin ɛad. Zeg ijḍaḍ n ujenna ař řmař marra arewřen, kkaren uyuren.”

10 “Ad arreɣ Urcalim d izellijen n weẓru, d amcan n udurri i wuccanen n řexřa, uca tineddam n Yahuda ad tent ggeɣ d tammurt ittwareddǧen nni di war izeddeɣ uřa d ijj.” ◘9:10 Irm. 10:22

11 “Wi iǧan d aryaz amiɣis, aqa ad iḥaka deg uya, u wi ɣar issiweř uqemmum n SIDI? Ejj i-t ad zzayes ibarreḥ xenni! Mayemmi tᵉttwaxarreb tammurt, tᵉttwassecmeḍ am řexřa ařami uřa d ijj war tt ittcuqi?”

12 “SIDI inna: ‘Řami arxun nitni zi Ccariɛa inu tenni d asen wciɣ zzat i uɣembub nsen, u war sřin ɣar tmijja inu u war tt ḍfaren, 13 maca ḍfaren řeqsaḥet n wuř n yixef nsen uřa d ‘Ibaɛlen’ am mammec i d asen sseřmaden řejdud nsen, 14 s uya, ammu i iqqar SIDI n řɛeskarat, AREBBI n Israil: Xzar, Necc ad wceɣ cciḥ i řgens-a ḥima ad t ccen uřa d aman n arrhaj ḥima ad ten swen. ◘9:14 Irm. 8:14; 23:15 15 Necc ad ten zuzzareɣ jar řegnus nni war ssinen, war iǧi nitni uřa d řejdud nsen, u Necc ad xasen ssekkeɣ ssif ař ten qḍiɣ.’ ◘9:15 Lawi 26:33 16 Ammu i iqqar SIDI n řɛeskarat: ‘Ḥḍam, řaɣam-dd i temɣarin i wecḍan maḥend ad dd-asent, uca jjem uřa d timɣarin timiɣisin ad dd-asent!’ ”

17 “Necc nniɣ, wah, jjem tent ad deɣyant u ad ssgeɛɛdent tɣuyyit n wecḍan xaneɣ ař dd-azzřent tiṭṭawin nneɣ s imeṭṭawen u waman ad dd-hwan x wabřiwen. 18 Maɣar tɣuyyit n wecḍan sřin as-dd zi Ṣihyun: ‘Ax, mammec nettwareddeǧ, neccin nseḍḥa aṭṭas maɣar tuɣa xaneɣ ad nekkar ad nesmeḥ di temmurt nneɣ, maɣar tizeddiɣin nneɣ hedmen tent.’ 19 Sřent xenni i wawař n SIDI, a timɣarin, ejj amezzuɣ nkent ad iksi awař zeg uqemmum nnes. Sřemdent yessitkent ad ceḍnent uca ad tᵉsseřmed kuř tamɣart ict n wezři n wecḍan i tmeddukkečt nnes. 20 Minzi řmewt tgeɛɛed-dd zi řekwazi nneɣ, yudef-dd ɣar řeqṣur nneɣ maḥend ad iqḍeɛ iḥenjiren imeẓyanen zi zznaqi d iḥudriyyen zeg wazzayen.”

21 “Siweř, ammu i iqqar SIDI:

‘Řxecbet n bnadem ad tewḍa

am řeɣbar x yeyyar,

u am tqebbiḍt n imendi

awarni i wenni imejjaren

nni war t i ɣa ijarwen uřa d ijj.” ◘9:21 Irm. 7:33

22 “Ammu i iqqar SIDI: ‘War ittfeyyic umiɣis s tiɣit n yixef nnes uřa d bu-teɣruḍt war ittfeyyic s jjhed nnes, bu-wagřa war ittfeyyic s wagřa nnes. ◘9:22 1 Kur. 1:31; 2 Kur. 10:17 23 Maca wenni ittfeyyacen, ejj i-t ad issemɣar, belli netta ɣares řefhamet u issen ayi, belli Necc d SIDI nni itteggen s tmexsiwt icewwaren d řḥeqq d tsegda di temmurt, maɣar timesřayin-a tteɛjibent ayi, ammu i iqqar SIDI.’ ”

24 “Xzar, ad dd-asen wussan, ammu i iqqar SIDI, aqa Necc ad xeřfeɣ zi marra inni ixetnen, maca waxxa amenni ɣarsen ɛad řeɛdařyet, 25 zi Miṣra d Yahuda d Idum d ayt n Ɛammun d Mu’ab d marra inni ittḥeffan acuwwaf ɣar ṭṭrufa, inni izeddɣen di řexřa, maɣar marra řegnus war ttwaxetnen, maca marra taddart n Israil aqa ɣarsen řeɛdařyet x wuř.” ◘9:25 Lawi 19:27; 21:5; 26:41; Irm. 9:25; 25:23; 49:32; Rum. 2:28, 29