1 “Xzar, afus n SIDI war iǧi d aquḍaḍ ḥima ad issenjem, amezzuɣ nnes war idduhcar aqa Netta war ittesři, ◘59:1 Řxř. 11:23; Ica. 50:2 2 maca řmuɛṣiyyet nwem d min ittemsebḍan jar awem d AREBBI nwem, uca ddnub nwem řeḥḥfen zzaywem aɣembub nnes, aqa Netta war i d awem ittesři. 3 Maɣar ttwassxemmjen ifassen nwem s idammen, iḍewḍan nwem s řmuɛṣiyyet, iyencicen nwem ssxarriqen, iřes nwem inṭeq s min war iḥrin. 4 Uřa d ijj issmuna s tsegda uca uřa d ijj ittwacarreɛ s řḥeqq. Marra nitni ttɛemmden x min iǧan baṭeř uca qqaren ixarriqen. Aqa kessin s ddeyset n tuɛeffna u ttarwen-dd řmuɛṣiyyet. ◘59:4 Ayub 15:35; Izhd. 7:15 5 Ḥebḍen x tmeǧařin n třefsa u zeṭṭen axmař n qundɛa. Wenni iccen zi tmeǧařin nsen, ad immet, u xmi ittareẓẓa ijj icten, tᵉtteffeɣ-dd zzayes ict n tfiɣart. 6 Ixmaren nsen war dd-usin i werruḍ uca war zemmaren ad arḍen ixef nsen s min ggin ifassen nsen. Min ggin aqa d řexdayem n řmuɛṣiyyet uřa d řxedmet n řexcunet n ifassen nsen. ◘59:6 Ayub 8:14, 15 7 Iḍaren nsen ttazzřen ɣar řɣar u nitni ttqeǧiqen maḥend ad ssizzřen idammen imezdagen. Ixarriṣen nsen d ixarriṣen ccuren ak-d řmuɛṣiyyet, areddeǧ d ukehheḍ aqa aten x ibriden nsen iwaṭan. ◘59:7 Awřn. 1:16; Rum. 3:15 8 Abrid n řehna war t ssinen u řatarat nsen war xasent walu n řḥeqq. Nitni ssfarraɣen izubaq nsen i yixef nsen, marra inni daysen igguren, war ssinen řehna.”

9 “X uya ittɣima řḥeqq iggʷej xaneɣ u tasegda war dd aneɣ dd-tᵉttikkwiḍ. Neccin nettraja tafawt, maca xzar, aqa din ṭṭřam, nraja tissiqt n tfawt, maca nuyur di taǧest. 10 Nettfafa am yiḍarɣařen ak-d řḥiḍ u nᵉttemhafa ssa ɣar da, axmi war ɣarneɣ ǧint tiṭṭawin. Nweṭṭa di ṭṭḥa n uziř axmi di tbambast x yinni iddaren axmi x imettan. 11 Neccin nzehhar marra am ddubat u nettgergur am ttgergurent tedbirin, nettraja řḥeqq, maca war dd-yusi, nettraja asenjem, maca iggʷej xaneɣ. 12 Maɣar iɛeddiyen nneɣ aṭṭas qibač Cek u ddnub nneɣ cehhden xaneɣ, minzi iɛeddiyen nneɣ aqa aten ɣarneɣ u řmuɛṣiyyat nneɣ aqa nessen i-tent: 13 aɛeddi d uxarreq x SIDI, uca aḥeyyed zi AREBBI nneɣ, řhard x ddeǧ d uɣewweɣ, aḥaweř d usuffeɣ n ixarriqen zeg wuř. 14 Ittwexxar řḥeqq ɣar ḍeffar, uca tᵉttɣima tsegda ɣar řaggʷaj, maɣar tidett tennedref deg wazzay uca min iseggmen war izemmar ad dd-yadef. 15 Tbeṭṭeř tidett u wenni iḥeyyden x tuɛeffna idweř d takeccaḍt. Aya iẓra i-t SIDI uca tuɣa-t d aɛeffan di tiṭṭawin nnes aqa war din iǧi řḥeqq. 16 Iẓra aqa war din uřa d ijjen u Netta tuɣa ittebhet řami uřa d ijj iksi s řmeɛruf i uceffaɛ. Xenni yiwi uɣiř nnes d asenjem i Netta uca tasegda nnes tuɣa d aɛemmed nnes. ◘59:16 Ica. 63:5 17 Issyarḍ Ixef nnes tasegda am warruḍ n wuzzař uca issars lkask n usenjem x uzeǧif nnes. Netta yarḍ arruḍ n wexřaf uca iřeḥḥef s tusmi iqeddsen am iřeḥḥef s useřham. ◘59:17 Afa. 6:17; 1 Ts. 5:8 18 Am mammec sdahǧent tmegga nsen, ammu i ɣa ixřef i iɣrimen nnes s wesɛar, i řɛedyan nnes min d asen dd-yusin. Tigzirin ad tent iwc řexřef nsent i isdaḥǧen.”

19 “Xenni ad ggʷeden zeg Yisem n SIDI zi manis tɣeǧi tfuct, uca aɛuǧi nnes zi manis dd-tneqqar tfuct. Maɣar ad dd-yas am yeɣzar iḥṣaren, asemmiḍ n SIDI ad t iɛarn. 20 Ad dd-yas Umefdi zi Ṣihyun, i yinni i ɣa ituben zeg iɛeddiyen nsen zi Yaɛqub, ammu i iqqar SIDI.” ◘59:20 Ica. 10:21, 22; Rum. 11:26

21 “Wa d Řɛahd inu akidsen, iqqar SIDI. Arruḥ inu, wenni xak iǧan, d wawařen inu nni ggiɣ deg uqemmum nnec, war xak ttḥeyyiden ca zeg uqemmum nnec, war iǧi zeg uqemmum n tarwa nnec uřa zeg uqemmun n tarwa n tarwa nnec, zi řexxu ař i řebda, iqqar SIDI.”