Awařen Iweznen
1
Awař Amezwaru - Lɣaraḍ n wawařen iweznen
1 Awařen iweznen n Suliman,
mmis n Dawud, ajeǧid n Israil,
2 ḥima ad issen bnadem tiɣit d ttarbiyyet,
ḥima ad ifhem awařen ccuren s řefhamet,
3 ḥima ad iqbeř ttarbiyyet d řeɛqeř,
tasegda d řḥeqq d řeṣfayet,
4 ḥima ad iwc asfarz i iḥafiyyen,
tussna d uḥadur i uḥudri.
5 Ejj amiɣis ad iseř
u ad yarni di řefhamet nnes,
ejj wenni ifehhmen ad ikseb řeqnaɛet,
6 ḥima ad ifhem awař iweznen d lmatal,
awařen n imiɣisen
d řemɛani innufaren nsen.
7 Tiggʷudi n SIDI d beddu n tussna,
maca ibuhařiyyen
sseḥqaran tiɣit d ttarbiyyet. ◘1:7 Ayub 28:28; Izhd. 111:10; Awřn. 9:10; Amb. 12:13
Ccwar n babas i mmis
8 Seř, a mmi, ɣar ttarbiyyet n babac,
war ttagi ca taɣuri n yemmac,
9 maɣar nitenti ad iřint
d ttaj icna x uzeǧif nnec,
d tseddyin izewwqen i yiri nnec.
10 A mmi, mařa xsen imednab
ad cek ɣwan,
war d asen ttegg ca array.
11 Mařa nitni qqaren:
“Uyur akidneɣ, ejj ad nḥama
i usizzeř n idammen,
ejj aneɣ ad negg ijj n řfex
i umezdag, břa ssibbet,
12 ejj aneɣ ad ten nṣarḍ am ddaren,
am mammec tṣareḍ řaxart,
am kemřem,
am mammec imsar
ak-d yinni ihekkwan
deg weḥfur n wenḍeř.
13 Ad naf ɛřamkur řeḥwayej yiɣřan aṭṭas,
tudrin nneɣ ad tent neccur s tkeccaḍt.
14 Cek ad tenḍared taqedduḥt nnec jar aneɣ,
ad ɣarneɣ tiři marra ict n tecyart.”
15 A mmi, war kidsen ggur deg webrid,
siggʷej aḍar nnec x umesruq nsen,
16 maɣar iḍaren nsen ttazzřen ɣar řɣar,
u nitni ttqeǧiqen
maḥend ad ssizzřen idammen. ◘1:16 Ica. 59:7; Rum. 3:15
17 Maɣar s řbaṭeř ad tᵉttwabezzeɛ tracca,
zzat i tiṭṭawin n marra
min ɣar iǧa wafriwen,
18 maɣar nitni ttḥaman
idammen n yixef nsen,
tteggen řfex i řeɛmur n yixef nsen.
19 Ammu i iǧan ibriden n kuř ijj
wenni ittazzřen ɣar arbeḥ,
aqa aya itteṭṭef řeɛmar n sidis. ◘1:19 Ayub 8:13
Tiɣit
20 Tiɣit tᵉttřaɣa s jjhed diha barra,
tessgeɛɛed tmijja nnes deg wazzayen.
21 Ɣar umezwar n imucan i daysen řharaj,
tᵉttbarraḥ nettat,
ɣar wadafen n tewwura n tendint
tessawař awařen nnes.
22 “Ař meřmi ɣa qqimen
iḥafiyyen ttexsen taqubbanect,
ař meřmi d asen i ɣa iɛjeb
uḥecci i imestehzayen,
u ař meřmi ɣa carhen
ibuhařiyyen tussna?
23 Dewřem ɣar uwebbex inu!
Xzarem, necc ad xawem ssfarrɣeɣ
arruḥ inu,
awařen inu ad awem ten ɛeřmeɣ.”
24 “Aqa zeɛma řaɣiɣ u kenniw war texsem,
sswiẓẓḍeɣ necc afus inu,
maca uřa d ijj war d as iḥekkar. ◘1:24 Ica. 65:12; 66:4; Irm. 13:10
25 Tenḍarem ccwar inu,
awebbex inu war t teqbiřem.
26 S uyenni uřa d necc
ad ḍeḥceɣ x uḍeyyeɛ nwem,
necc ad zzaywem stehzeɣ
xmi dd ɣa yas unexřiɛ nwem,
27 xmi dd ɣa yas unexřiɛ nwem
am yijj n ureddeǧ,
aḍeyyeɛ nwem am yict n tḥaryaḍt,
xmi xawem dd ɣa tewḍa
řeḥṣaret d teggʷudi. ◘1:27 Ayub 27:9; 35:12; Ica. 1:15; Irm. 11:11; 14:12; Ḥiz. 8:18; Mixa 3:4
28 Xenni ad xafi dd-řaɣan,
maca necc war dd-ttarriɣ,
ad xafi arzun, maca war d ayi ttifen,
29 minzi nitni carhen tussna,
u war ixḍaren ad ṭṭfen di tiggʷudi n SIDI.
30 Nitni war xsen ca řecwar inu,
marra awebbex inu nḍaren t.
31 Nitni ad ccen zi řɣiǧet n webrid nsen,
u ad jjiwnen s ixarriṣen n yixef nsen,
32 minzi uffuɣ n iḥafeyyen
x webrid ad ten ineɣ,
u afřaḥ n ibuhařiyyen ad ten isshellek.
33 Wi ɣari i ɣa isřen, ad izdeɣ di řaman,
ad yiři di řehna břa anexřiɛ n tuɛeffna.”
◘1:7 1:7 Ayub 28:28; Izhd. 111:10; Awřn. 9:10; Amb. 12:13
◘1:16 1:16 Ica. 59:7; Rum. 3:15
◘1:24 1:24 Ica. 65:12; 66:4; Irm. 13:10
◘1:27 1:27 Ayub 27:9; 35:12; Ica. 1:15; Irm. 11:11; 14:12; Ḥiz. 8:18; Mixa 3:4