27
Řhard n Ayub x iɛeffanen
1 Yarni issgeɛɛed Ayub řhard n lmatal nnes, inna:
2 S tidett am iddar Arebbi
nni i d ayi ikksen tasɣart inu,
Amzemmar x kuřci
nni issarzagen řeɛmar inu,
3 min ɣa yekk nnefs ɛad dayi
u arruḥ n Arebbi ɛad deg wenzaren inu,
4 war qqaren iyencicen inu řɣecc
u iřes inu war iqqar ixarriqen!
5 Iggʷej xafi ad ggeɣ kenniw
di tseyyarest n tidett.
Ař ɣa ssuffɣeɣ buḥbeř inu,
war ttejjiɣ ad xafi kksen asegged inu.
6 Ad ṭṭfeɣ di tsegda inu,
war zzayes arexxuɣ ca.
Uř inu war d as yarexxu
uřa x ijjen zeg wussan inu.
7 Mři dd-iban řeɛdu inu d aɛeffan,
wenni akidi ittmenɣan
d mmis n řmuɛṣiyyet.
8 Maɣar man řayas n umnafeq,
xmi ɣa tᵉttwaqḍeɛ tudart nnes,
xmi zzayes i ɣa iqřeɛ Arebbi řeɛmar nnes? ◘27:8 Mt. 16:26; Lk. 12:20
9 Ma ad iseř Arebbi i iɣuyyan nnes,
xmi xas dd ɣa iwḍa řḥeṣran? ◘27:9 Ayub 35:12; Izhd. 18:42; 109:7; Awřn. 1:28; 28:9; Ica. 1:15; Irm. 14:12; Ḥiz. 8:18; Mixa 3:4; Yḥ. 9:31; Yaɛ. 4:3
10 Ma ad ifarḥ ɣar Umzemmar x kuřci?
Ma ad iřaɣa x Arebbi meřmi ma?
11 Necc ad awem ssřemdeɣ x ufus n Arebbi,
min iɛewweř Umzemmar x kuřci,
war t ssnuffareɣ.
12 Xzar, kenniw marra idwem teẓrim t.
Mayemmi tarennyem
tessuffuɣem min ibeṭṭřen teqqarem:
13 “Ta d tasɣart n bnadem aɛeffan ɣar SIDI,
tasɣart n ayt n bu-řexcunet
nni i ɣa ṭṭfen zeg Umzemmar x kuřci: ◘27:13 Ayub 20:29
14 Xmi ɣa mmarenyen iḥenjiren nnes,
i ssif umi urin.
Iɣedduten nnes war ttyawanen aɣrum, ◼27:14 Iɣedduten - ixs ad yini ‘iḥenjiren nnes’. ◘27:14 Aɛwd. 28:41; Ḥuc. 9:13
15 wi zzayes i ɣa yarewřen
ad ttwaneḍřen s ṭṭaɛun,
tijjař nnes war ttrunt ca. ◘27:15 Izhd. 78:64
16 Waxxa ijarruw nnuqart anect n ucař,
u issewjad arruḍ anect n ucař,
17 iwa, waxxa ad t issewjed,
amsegged ad zzayes yarḍ
uca amezdag ad ibḍa nnuqart. ◘27:17 Awřn. 28:8; Amb. 2:26
18 Ad ibna taddart nnes am tcinda,
amecnaw tanwalt
i issbedda uɛessas i yixef nnes.
19 Ad dayes iṭṭeṣ d bu-wagřa,
maca war yarenni deg wagřa nnes.
Mařa yarzem tiṭṭawin nnes,
war din ittɣimi ɛad walu. ◘27:19 Izhd. 49:18
20 Inexřiɛen ad xas arenyen
am iɣezran n waman,
taḥaryaḍt ad t-i-dd-teqḍeɛ s ǧiřet. ◘27:20 Ayub 15:21; 18:11
21 Asemmiḍ zi ccarq ad t iksi,
iwa dinni ittraḥ,
ad t-i-dd-iqřeɛ zeg wemcan nnes.
22 Arebbi ad issiweḍ marra aya
x uzeǧif nnes, war xas issɛizzi ca.
Ad yarweř deɣya zi tecti n ufus nnes.
23 Iwdan ad xas wwten deg ifassen nsen
am zzayes sthezzan
uca ad xas ṣeffaren
zeg wemcan n tzeddiɣt nnes.”
◘27:8 27:8 Mt. 16:26; Lk. 12:20
◘27:9 27:9 Ayub 35:12; Izhd. 18:42; 109:7; Awřn. 1:28; 28:9; Ica. 1:15; Irm. 14:12; Ḥiz. 8:18; Mixa 3:4; Yḥ. 9:31; Yaɛ. 4:3
◘27:13 27:13 Ayub 20:29
◼27:14 27:14 Iɣedduten - ixs ad yini ‘iḥenjiren nnes’.
◘27:14 27:14 Aɛwd. 28:41; Ḥuc. 9:13
◘27:15 27:15 Izhd. 78:64
◘27:17 27:17 Awřn. 28:8; Amb. 2:26
◘27:19 27:19 Izhd. 49:18
◘27:20 27:20 Ayub 15:21; 18:11