18
Řhard wiss tnayen n Bildad: Aneggaru n bnadem d aɛeffan
1 Xas uca yarra-dd Bildad, wenni dd-yusin zi Cuḥa, inna:
2 Ař meřmi ɛad tarezzum
ad tᵉṭṭfem ijj n bnadem x wawařen nnes?
Mařa tfehmem, xenni awarni i uya ad nessiweř.
3 Mayemmi d aneɣ ittwagg am řmař
u nettwaḥṣar di buḥbeř
di tiṭṭawin nwem?
4 Cek, a yaryaz wenni ittmezzqen ixef nnes
deg uxeyyeq nnes!
Ma ad jjen temmurt di ssibbet nnec,
ad ittwassmuṭṭi jjarf
5 Wah, tafawt n iɛeffanen ad texsi,
aceɛɛař n tmessi n uɛeffan
war ittegg tafawt ɛemmarṣ ɛad.
6 Tafawt di tqidunt nnes ad tebbarcen,
řefnar nnes tiwa nnes ad t ssxesyen.
7 Ttarjijen iṣuraf nnes ijehden,
ccwar n yixef nnes ad t iɣḍeř.
8 Maɣar s iḍaren nnes ad innaɣ deg uṣennaj,
ad yuyur x tracca, mmuden tt i tneymart.
9 Taxceft ad t temneɛ zeg unirz,
řfex ad dayes tᵉṭṭef. ◘18:9 Ayub 5:5
10 Tennuffar tesɣunt n řfex di temmurt,
řfex aqa-tt x webrid.
11 Ssiggʷeden t inexřiɛen
zi marra iɣezdisen,
ḍeffaren t ɣar iḍaren nnes. ◘18:11 Ayub 15:21; Irm. 6:25; 46:5; 49:29
12 Ittwaḥṣar dayes jjehd nnes,
aḍeyyeɛ ittraja i-t ɣar uɣezdis nnes. ◘18:12 Ayub 15:23
13 Arẓiyyet ad tecc
marra iɣezdisen n arrimet nnes,
iɣezdisen n arrimet nnes
ad ten yecc ijj n řeḥřac ineqqen.
14 Minxef tuɣa ittceř,
ittwaqřeɛ zi tqiḍunt nnes.
Tneddeh i-t arẓiyyet
ɣar ujeǧid n inexřiɛen. ◘18:14 Ayub 8:13, 14; 11:20; Awřn. 10:28
15 Iwdan nni war ǧin d yinni nnes,
zeddɣen deg uqiḍun nnes,
řecbariyyet tᵉttwazuzzar
x tzeddiɣt nnes.
16 Sadu netta ttaẓɣen iẓewran nnes,
zi sennej ttwaqessen řefruɛ nnes.
17 Řidaret nnes ad tᵉttwakkes zi temmurt,
war d as ittɣimi ɛad isem deg webriden. ◘18:17 Izhd. 109:13; Awřn. 10:7
18 Ad t ɛarnen zi tfawt ɣar taǧest,
ad sstewwjen zi ddunect. ◼18:18 zi ddunect - niɣ ‘zeg umaḍal’.
19 War ɣares ittiři warraw
niɣ jjadira di řgens nnes,
war ittɣimi uřa d ijj ad iddar
di tzeddiɣin nnes. ◘18:19 Ica. 14:22; Irm. 22:30
20 X wass nnes ad arjijen inni izeddɣen
ɣar mani tɣeǧi tfuct,
inni izeddɣen ɣar manis i dd-tneqqar tfuct
ad ten tᵉṭṭef tiggʷudi.
21 Wah, ammu i tᵉttemsar
i tzeddiɣin n imeqjaḥen,
wa d amcan n yinni war issinen Arebbi.
◼18:4 18:4 ixef nnes - s Tɛibranit ‘řeɛmar nnes’.
◘18:4 18:4 Ayub 13:14
◘18:11 18:11 Ayub 15:21; Irm. 6:25; 46:5; 49:29
◘18:12 18:12 Ayub 15:23
◘18:14 18:14 Ayub 8:13, 14; 11:20; Awřn. 10:28
◘18:17 18:17 Izhd. 109:13; Awřn. 10:7
◼18:18 18:18 zi ddunect - niɣ ‘zeg umaḍal’.
◘18:19 18:19 Ica. 14:22; Irm. 22:30