109
1 I umeqqran n imeɣnajen. Azehhed n Dawud.
A AREBBI n uṣebbeḥ inu, war sɣidi!
2 Maɣar aqemmum n ijj n uɛeffan,
aqa aqemmum iccur s ixarriqen
innurzem xafi.
Nitni ssawařen akidi
s yijj n yiřes issxarriqen.
3 Nnḍen ayi-dd
s wawařen iccuren s wecrah,
ttmenɣan akidi x walu. ◘109:3 Izhd. 69:5
4 I twarrit x tmexsiwt inu,
ccetcan nitni zzayi
u necc kessiɣ s řmeɛruf.
5 Nitni xeǧṣen ayi řxar s řɣar,
tamexsiwt inu s wecrah.
6 Egg xas ijj n uɛeffan,
ejj ijj n cciṭan ad ibedd
ɣar uɣezdis nnes. ◘109:6 Zak. 3:1, 2
7 Mařa xas carrɛen,
ad iffeɣ am uqṭaṭɛi
uca ejj taẓaǧit nnes ad tiři d ddenb. ◘109:7 Awřn. 15:8; 28:9
8 Ad dewřen ussan nnes udrusen,
ejj wenneɣni ad iṭṭef řfusina nnes. ◘109:8 Řex. 1:20
9 Ad dewřen iḥenjiren nnes d iyujiřen,
tamɣart nnes d tajjač.
10 Ad tellɛen iḥenjiren nnes da d diha,
ad ttaren, ad arzun x macca
ɣar řaggʷaj n řxirbat n tzeddiɣin nsen.
11 Ad ittar bu-umarwas marra min ɣares,
ad keccḍen ibarraniyyen
řɣiǧet n warber nnes.
12 War ɣares ittiři uřa d ijjen
wenni d as i ɣa iggin
s tmexsiwt icewwaren,
ejj uřa d ijj ad iḥinn
x iyujiřen nnes.
13 Ad ttwateḥḥan tarwa nnes awarni as,
ad ittwamḥa isem nsen
di jjiř i dd ɣa yasen.
14 Ad yidar SIDI řmuɛṣiyyet n řejdud nnes,
ɛemmarṣ war imeḥḥi ddenb n yemmas.
15 Iři ad bedden řebda qibač i SIDI,
ejj i-t ad ikkes řidaret nsen x temmurt. ◘109:15 Ayub 18:17; Izhd. 34:17
16 Maɣar netta war iɛqiř
ḥima ad yegg s tmexsiwt icewwaren,
maca imarret řmeskin d umezřuḍ,
uřa d wenni umi ittwarẓ wuř,
ḥima ad t ineɣ.
17 Netta tuɣa ittexs nneɛřet,
xenni ejj i-tt ad xas tewḍa,
u umi war ifarḥ s lbaraka,
ejj i-tt ad xas tiggʷej.
18 Umi yarḍ nneɛřet am warruḍ nnes,
ejj i-tt ad tadef xenni
am waman ɣar daxeř nnes,
am zzect deg iɣsan nnes.
19 Ejj ad tiři nneɛřet nni
am warruḍ i di ittřeḥḥef,
am webyas i ibekkes řebda.
20 Ta d řmunet n SIDI i iɣrimen inu,
i yinni issawařen řɣar x řeɛmar inu.
21 Maca Cek, a SIDI, Sidi inu,
egg dayi am mammec texsed
di ṭṭweɛ n Yisem nnec,
maɣar tamexsiwt nnec icewwaren
d taṣebḥant,
fekk ayi.
22 Maɣar necc di řeɣben u zeřḍeɣ,
uř inu ittwassnuqqeb
ɣar daxeř deg idmaren inu.
23 Am ict n tiři izzuggarten qeṭṭiɣ,
zzruzan ayi am yict n tmurɣi.
24 Ifadden inu ttarjijin s uẓummi,
arrimet inu d tamusriwt,
ittxeṣṣa i-tt tadunt.
25 Necc dewřeɣ asen
d ict n řqecɛet n useḥqar.
Mařa ẓrin ayi,
ssenhezzan azeǧif nsen.
26 Ewc ayi afus, a SIDI, AREBBI inu,
senjem ayi
ɛlaḥṣab tamexsiwt nnec icewwaren,
27 ḥima ad ssnen
aqa d man aya d afus nnec,
aqa Cek i iggin man aya, a SIDI.
28 Nitni d yinni ineɛɛřen,
maca Cek ad tbarked,
mařa ttɣewwɣen,
ad dewřen ttseḍḥan
maca amsexxar nnec ad ifarḥ.
29 Ejj iɣrimen inu ad yarḍen s řefḍiḥet,
ad řeḥḥfen deg useḍḥi
am deg ijj n useřham.
30 Zeg wuř inu ad qadiɣ SIDI
s uqemmum inu,
ad t ssemɣareɣ jar waṭṭas.
31 Maɣar Netta ad ibedd
ak-d umezřuḍ ɣar ufus nnes afusi,
ḥima ad t issenjem
zeg inni iḥekkmen x řeɛmar nnes.