1 Awarni as isscen ayi Yahucaɛ, arrays n ikehhanen. Netta tuɣa ibedd zzat i wudem n lmalak n SIDI. Cciṭan ibedd-dd ɣar ufus afusi n Yacuɛa ḥima ad zzayes isscetca. 2 SIDI inna i cciṭan: “Ad yiři ad cek iɛaqeb SIDI, a cciṭan! Ad cek iɛaqeb SIDI, wenni ifarzen Urcalim! Ma war iǧi Yahucaɛ wanita d ijj n ukeccuḍ qeřɛen t-dd zi tmessi?” ◘3:2 Yah. 9 3 Yahucaɛ tuɣa yarḍ arruḍ iwessxen am ibedd zzat i wudem n lmalak.

4 Xenni iṭṭef Netta deg wawař uca issiweř ak-d yinni ibedden zzat i wudem nnes, inna: “Kksem as arruḍ iwessxen i wanita!” Xenni inna as: “Xzar, Necc kkseɣ zzayek řmuɛṣiyyet nnec u ad cek ssyarḍeɣ s ijj n warruḍ icuwwaren.” ◘3:4 Mixa 7:18 5 Necc nniɣ: “Ad as qqnen ict n areẓẓet tamezdagt x uzeǧif nnes!” U nitni qqnen as areẓẓet tamezdagt x uzeǧif nnes uca ssyarḍen as arruḍ icuwwaren, am tuɣa lmalak n SIDI ibedd din 6 Xas uca iched lmalak n SIDI i Yahucaɛ, inna:

7 “Ammu i iqqar SIDI n řɛeskarat:

‘Mařa cek tuyured x ibriden inu,

u mařa cek ad teḥḍid tasexxart inu,

xenni ad tessuyured

uřa d Taddart inu s řḥeqq

u ad tiřid d ameḥḍay n řemraḥat inu,

u Necc ad ac wceɣ

ad tzemmared ad traḥed ad tadfed

jar inni da ibedden.

8 Xenni seř, Yahucaɛ,

cek, arrays n ikehhanen,

cek d imeddukkař nnec,

inni iqqimen zzatek,

maɣar nitni d ict n řeɛřamet n utebhet,

maɣar xzar, Necc ad dd-awyeɣ

Amsexxar inu, ‘AƔEDDU’. ◘3:8 Ica. 4:2; 11:1; Irm. 23:5; 33:15; Zak. 6:12

9 Maɣar xzar, aẓru,

wenni din ssarseɣ zzat i Yahucaɛ,

x weẓřu nni xezzarent sebɛa n tiṭṭawin.

Xzar, Necc ad dayes neqceɣ

taneqqact nnes,

ammu i iqqar SIDI n řɛeskarat,

u Necc ad kkseɣ

řmuɛṣiyyet n temmurt-a

deg ijj n wass!

10 Deg wass nni, iqqar SIDI n řɛeskarat,

ad tɛarḍem ijj i wenneɣni

sadu tzayart u sadu wartu.’ ”