2
Tameẓriwt wiss tnayen - Arebɛa n iccawen d arebɛa n imziřen
1 Necc ssgeɛɛdeɣ tiṭṭawin inu uca ẓriɣ, u xzar aqa din arebɛa n waccawen. 2 Necc nniɣ i lmalak nni kidi issawařen: “Min ɛnan ina?” Netta yarra-dd xafi: “Ina d arebɛa n waccawen nni izzuzaren Yahuda, Israil d Urcalim.”
3 Xenni isscen ayi SIDI arebɛa n imziřen. 4 Řexdenni necc nniɣ: “Min umi dd-usin nitni, min ɣa ggen?” Netta issiweř, inna: “Ina d accawen nni izzuzaren Yahuda, ařami war dd-issgeɛɛed ɛad uřa d ijj azeǧif nnes, maca ina usin-dd ḥima ad ten ssnexřɛen, ḥima ad nḍaren accawen n řegnus nni dd-issgeɛɛden icc ḍidd i temmurt n Yahuda ḥima ad tt zuzzaren.”
Tameẓriwt wiss třata - Aryaz s ufiřu n řeqyas
5 Necc ssgeɛɛdeɣ tiṭṭawin inu, ẓriɣ, u xzar, aqa din ijj n weryaz s ufiřu n řeɛbar deg ufus nnes. 6 Necc nniɣ: “Mani ɣa traḥed cek?” Netta yarra-dd “Necc ad raḥeɣ ḥima ad ɛbareɣ Urcalim maḥend ad ẓareɣ mecḥař teǧa tiru nnes u mecḥař teǧa tuzzeggart nnes.” 7 U xzar, iffeɣ-dd lmalak nni kidi issawařen uca ijj n lmalak nneɣni iffeɣ-dd ḥima ad kides immeřqa, 8 inna as: “Deɣyet, siweř ak-d uḥudri nni, ini:
‘Urcalim ad din tiři
teccur s tneddam nurrzment břa řeḥyuḍ
zi ssibbet n waṭṭas n iwdan d řmař
i iǧan di řwesṭ nnes.
9 Necc ad as iřiɣ d ijj n řḥiḍ n tmessi
i d as-dd ittennḍen, iqqar SIDI,
u di řwesṭ nnes ad as iřiɣ i uɛuǧi.
10 Deɣyam, deɣyam, arewřem
zi temmurt n ccamal,
ammu i iqqar SIDI,
maɣar Necc bḍiɣ kenniw
am arebɛa n isemmiḍen n ujenna,
ammu i iqqar SIDI.
11 Deɣyat, Ṣihyun, fekket,
cem d tenni izeddɣen
ɣar yeǧis n Babil!’ ”
12 “Maɣar ammu i iqqar SIDI n řɛeskarat:
‘Di ṭṭweɛ n uɛuǧi,
issekk ayi-dd Netta ɣar řegnus
nni zzaysen ttwakeccḍem,
maɣar wenni kenniw i ɣa iḥadan,
iḥada mummu n tiṭṭ inu.
13 Maɣar xzar, Necc ssenhezzeɣ
afus inu xasen,
u nitni ad dewřen d takeccaḍt
n imsexxaren nsen.
Kenniw ad tessnem
aqa issekk ayi-dd SIDI n řɛeskarat.
14 Sřiwřew u farḥ, a yeǧis n Ṣihyun,
maɣar xzar, Necc ad dd-aseɣ
u ad zedɣeɣ di řwesṭ nnem,
ammu i iqqar SIDI.’ ◘2:14 Lawi 26:12; Ḥiz. 37:27; 2 Kur. 6:16
15 ‘Deg wass nni,
ad qqnen waṭṭas n řegnus ɣar SIDI,
u nitni ad iřin d řgens inu.
Necc ad zedɣeɣ di řwest nnem
u ad tessned, aqa SIDI n řɛeskarat
issekk ayi-dd ɣarem. ◘2:15 Izhd. 22:1 Bṭ. 2:9
16 SIDI ad iṭṭef Yahuda d tasɣart nnes
x temmurt iqeddsen.
Netta ad ifarz Urcalim ɛad.
17 Ejj marra ddat ad isseɣd
zzat i wudem n SIDI,
maɣar Netta ifaq-dd
zi Tzeddiɣt nnes Iqeddsen.’ ”