1 Deg uyur wiss tmenya, deg useggʷas wiss tmenya n Dariyus, yusa-dd wawař n SIDI ɣar Zakariyya, mmis n Baraxya, mmis n Ɛiddu, anabi, inna:

2 “SIDI tuɣa iffugem aṭṭas x řejdud nwem. 3 Ini asen: ‘Ammu i iqqar SIDI n řɛeskarat: Dweř-dd ɣari, ammu i iqqar SIDI n řɛeskarat, xenni Necc ad ɣarwem-dd dewřeɣ, iqqar SIDI n řɛeskarat. 4 War ttiřim am řejdud nwem i yinni umi barrḥen inabiyyen n zic, nnan: ‘Ammu i iqqar SIDI n řɛeskarat, dewřem-dd xenni zeg ibriden nwem iɛeffnen u zi tmegga nwem iɛeffnen!’ Maca nitni war sřin ca u war d ayi wcin amezzuɣ, ammu i iqqar SIDI. ◘1:4 Ica. 31:6; Irm. 3:12; 18:11; Ḥiz. 18:30; Ḥuc. 14:2 5 Řejdud nwem, mani ǧan? U inabiyyen, ma ad ddaren i řebda? 6 Maca awařen inu d tweṣṣa inu nni umureɣ i imsexxaren inu, inabiyyen, ma war řqifen řejdud nwem? Nitni dewřen-dd, nnan: Am mammec tuɣa SIDI n řɛeskarat inekkʷa ad yegg akidneɣ ɛlaḥsab ibriden nneɣ d tmegga nneɣ, ammu i igga Netta akidneɣ.’ ” ◘1:6 Igjd. 1:18

7 Deg wass wiss arebɛa u-ɛicrin, deg uyur wiss ḥiṭac, wa d ayur n Cabaṭ, deg useggʷas wiss tnayen n Dariyus yusa-dd wawař n SIDI ɣar Zakariyya, mmis n Baraxya, mmis n Ɛiddu, anabi, ḥima ad kis issiweř.

8 Necc ẓriɣ di ǧiřet, xzar, aqa ijj n weryaz x ijj n uyis d azeggʷaɣ. Netta tuɣa ibedd jar tcejjura n triḥant di řaǧaɣ u awarni as din iysan izeggʷaɣen d yeysan iqarqacen d yeysan icemřařen. 9 Necc nniɣ: “Sidi inu, min ɛnan ina?” Řexdenni inna ayi lmalak nni kidi issawařen: “Necc ad ac ssecneɣ min ɛnan ina!” 10 Aryaz nni ibedden jar tcejjura n triḥant, yarra-dd, inna: “Ina d inni dd-issekk SIDI ḥima ad suḥen x temmurt.” 11 Nitni arrin-dd x lmalak n SIDI, wenni ibedden jar tcejjura n triḥant, nnan: “Neccin nsuḥ di temmurt, u xzar, marra tammurt teqqim, tarsa.”

12 Xenni yarra-dd lmalak n SIDI, inna: “A SIDI n řɛeskarat, ař meřmi ɛad war tᵉttḥinnid x Urcalim u x tneddam n Yahuda nni x tuɣa tsexḍed sebɛin n iseggʷusa-ya?” 13 SIDI yarra-dd x lmalak nni kidi issawařen s wawařen cnan, s wawařen n ufewwej. 14 Lmalak nni kidi issawařen, inna ayi: “Barreḥ, ini:

‘Ammu i iqqar SIDI n řɛeskarat:

Necc usmeɣ di ṭṭweɛ n Urcalim

d Ṣihyun s wasam d ameqqran.

15 S ijj n uduqqez ameqqran n weɣḍab inu

ffugmeɣ x řegnus innefxen.

Necc tuɣa ffugmeɣ mɣir cwayt n řweqt,

maca nitni ruḥen arnin dayes.’

16 S uya, ammu i iqqar SIDI:

‘Necc dewřeɣ-dd ɣar Urcalim s teḥnunect,

Taddart inu ad tᵉttwabna dayes,

ammu i iqqar SIDI n řɛeskarat,

uca afiřu n řeɛbar

ad ittwagg x Urcalim.’

17 Arni barreḥ, ini:

‘Ammu i iqqar SIDI n řɛeskarat:

Tineddam inu ad feyyḍent ɛawed s řxar,

maɣar SIDI ad issfewwej Ṣihyun ɛawed

u Netta ad ixḍar Urcalim ɛawed.’ ”