Izřan s Igejduren
1
Izři amezwaru - X Urcalim
1 Alif. Mammec teqqim diha
tendint weḥḥdes!
Tuɣa řebda teccur s řɣaci,
tedweř am yict n tajjač,
tuɣa-tt d tameqqrant jar řegnus,
iǧis n ujeǧid jar lɛamalat,
tedweř ɣar tesmuɣi.
2 Bit. Tᵉttru imeṭṭawen imerzagen s ǧiřet,
imeṭṭawen nnes x imeggizen nnes.
War ɣares wi tt ɣa iɛezzan
zi marra inni tt ittexsen,
marra imeddukkař nnes ɣdaren-tt,
dewřen as d řɛedyan. ◘1:2 Izhd. 6:7
3 Gimel. Tᵉttwaḥebbes temmurt n Yahuda
zi ssibbet n řeɣben,
u zi ssibbet n řqedd
n txemmast nnes iqesḥen.
Tᵉttɣima jar řegnus, war tufi arraḥet,
marra inni tt iḍaffaren ḥarrten xas
di řwesṭ n řeḥṣarat nnes.
4 Dalit. Ibriden ɣar Ṣihyun ceḍnen,
minzi uřa d ijj war iggur ɛad ɣar řɛid.
Marra tiwwura nnes xřant,
ikehhanen nnes zehharen,
tiɛzariyyin nnes ceḍnent,
uca nettat simant nnes teccur s tarzugi.
5 Hi. Iɣrimen nnes dewřen ḥekkmen xas,
řɛedyan nnes farrḥen,
maɣar SIDI issecḍen i-tt
zi ssibbet n řqedd n řmuɛṣiyyet nnes.
Iḥenjiren nnes imeẓyanen uyuren
di tmeḥbast zzat i tiṭṭawin n iɣrimen nsen.
6 Waw. Acewwar n yeǧis n Ṣihyun
ingez zzayes,
marra řḥukkam nnes ggin am udaden
inni war ittifen ddemnet n tarewsa.
Gguren nitni břa jjehd
zzat i tiṭṭawin n wenni ten iḍaffaren.
7 Zayin. Deg wussan n řeɣben nnes
u deg waṭṭas n wetlaɛ nnes
ad teɛqeř Urcalim x marra min dayes iɣřan,
min ɣares tuɣa zic.
Řami iwḍa řgens nnes s ufus n weɣrim,
tuɣa war din wi d as i ɣa iwcen afus.
Iɣrimen nnes ẓrin tt,
stehzan zeg ureddeǧ nnes.
8 Xit. Urcalim tuɣa txeṭṭa aṭṭas.
X uya tedweř am yict n temɣart
deg wussan n weɛzař nnes.
Marra inni tuɣa tt ittweqqaren,
sseḥqaran tt,
minzi ẓrin řeḥya nnes.
Uřa nettat simant nnes tzehhar,
tedweř ɣar ḍeffar. ◘1:8 Ica. 47:3
9 Tit. Taxmuji nnes teřṣeq
ɣar tmuwwa n ubeḥrur nnes,
aneggaru nnes war dayes txemm.
Aqa tehwa-dd ɣar řaǧaɣ
s ijj n webrid isstebhten,
uřa d ijj war tt iɛezzi.
Xzar maca řeɣben inu, a SIDI,
maɣar řeɛdu issmeqqar ixef nnes. ◘1:9 Aɛwd. 32:29
10 Yud. Aɣrim isswiẓẓeḍ afus nnes
ɣar marra min dayes iɣřan.
Iwa teẓra nettat mammec udfen řegnus
ɣar Zzawect nnes Iqeddsen,
řegnus min xef tumured,
war iɛeddeř ad dd-adfen
ɣar wegraw n řgens nnec.
11 Kaf. Qaɛ imezdaɣ nnes zehharen,
arezzun aɣrum.
Nitni wcin řeqcuɛ iɣřan nsen
di ṭṭweɛ n macca,
maḥend ad dd-arren asefsi ɣar řeɛmar nsen.
Xzar, a SIDI, wařa
mammec dewřeɣ ttwasseḥqareɣ. ◘1:11 Irm. 52:6
12 Lamid. Ma war daywem icqi,
kenniw inni iɛeddun x webrid?
Wařam u xzarem,
ma din ca n řeḥriq am řeḥriq i d ayi ittwaggen,
i zi d ayi issxeyyeq SIDI,
deg wass n řḥaduq n weɣḍab nnes.
13 Mim. Zi sennej i dd-issekk Netta timessi
deg iɣsan inu,
tcebbar daysen.
Netta inḍar-dd tracca ɣar iḍaren inu,
yarra ayi ad dewřeɣ ɣar ḍeffar,
aqa yareddeǧ ayi,
issehřec ayi ass am ikmeř.
14 Nun. Ittwacedd uzayřu n iɛediyyen inu
s ufus nnes,
aqa ttwamuden, geɛɛden-dd x yiri inu.
Netta yarra jjehd inu ad ifceř.
Iwca ayi Sidi inu deg ifassen nsen,
necc war zemmareɣ ad beddeɣ ɛad.
15 Samix. Inḍar Sidi inu
marra ayt n bu-ṣṣulṭa inu di řwest inu,
am mammec ibarreḥ
s ijj n umuni ifarzen ḍidd inu,
maḥend ad yarẓ iḥudriyyen inu,
Sidi inu aqa iɛfes di tsirt n uḍiř,
n teɛzarect, n yeǧis n Yahuda. ◘1:15 Irm. 14:17
16 Ɛayin. S man aya ttruɣ,
a tiṭṭ inu, a tiṭṭ inu issazzařen imeṭṭawen,
minzi amesfewwej nni izemmaren
ad dd-yarr řeɛmar inu,
iggʷej xafi.
Ttwateḥḥan iḥenjiren inu,
minzi řeɛdu ijhed xasen.◘1:16 Irm. 13:17
17 Pi. Tesswiẓẓeḍ Ṣihyun ifassen nnes,
maca nettat war ɣares wi tt ɣa issfewwjen.
Yumur SIDI x Yaɛqub,
aqa iɣrimen nnes ad as dd-nnḍen.
Urcalim tedweř jar asen am yict n temɣart
deg wussan n weɛzař nnes.
18 Tsadi. SIDI d amsegged,
maɣar necc tuɣa ɣewwɣeɣ x řumurat nnes.
Sřem xenni, marra řegnus,
xzarem ɣar řehřiq inu.
Tiɛzariyyin inu d iḥudriyyen inu
uyuren di tmeḥbast.◼1:18 x řumurat nnes - s Tɛibranit ‘x uqemmum nnes’.
19 Quf. Necc řaɣiɣ x yinni d ayi ittexsen,
maca nitni cemten ayi.
Ikehhanen inu d imɣaren inu
ḍeřqen i buḥbeř di tendint,
umi tuɣa arezzun macca i yixef nsen,
ḥima ad ssmeḥḍen řeɛmar nsen. ◘1:19 Irm. 30:14
20 Rix. Xzar, a SIDI, maɣar necc di řeḥṣaret,
takrict inu tenneḥweř,
uř inu inneqřeb-dd zi daxeř inu,
maɣar tuɣa ɣewwɣeɣ aṭṭas.
Di barra i d ayi yucar ssif iḥenjiren inu,
daxeř iḥekkem řmewt. ◘1:20 Ica. 16:11; Irm. 48:36
21 Cin. Sřin mammec zehhareɣ,
maca necc war ɣari uřa d ijj n umesfewwej,
marra řɛedyan inu sřin x arẓiyyet inu.
Farḥen aqa Cek i tt iggin.
Xmi dd ɣa tessiwḍed ass i zi dd-tɛeřmed,
xenni ad iřin am mammec ǧiɣ necc.
22 Taf. Ejj ad dd-yas marra řɣar nsen zzatek,
egg zzaysen am mammec zzayi teggid
zi ssibbet n marra iɛeddiyen inu,
minzi izehharen inu d aṭṭas,
uř inu yuḥeř aṭṭas.
◘1:9 1:9 Aɛwd. 32:29
◘1:15 1:15 Irm. 14:17
◘1:16 1:16 Irm. 13:17
◼1:18 1:18 x řumurat nnes - s Tɛibranit ‘x uqemmum nnes’.
◘1:19 1:19 Irm. 30:14
◘1:20 1:20 Ica. 16:11; Irm. 48:36