1 I umeqqran n imeɣnajen. Ak-d uzenzun x ufiřu wiss tmenya. Azehhed n Dawud.

2 A SIDI, war d ayi ttweddab

deg weɣḍab nnec,

war d ayi ttarebbi ca deg wesɛar nnec! ◘6:2 Izhd. 38:2

3 Ḥinn xafi, a SIDI,

maɣar necc aqa arxuɣ.

Sgenfa ayi, a SIDI,

maɣar iɣsan inu ttarjijin!

4 Wah, řeɛmar inu yarjef aṭṭas,

u Cek, a SIDI, ař meřmi?

5 Dweř-dd, a SIDI, fekk řeɛmar inu,

senjem ayi di ṭṭweɛ

n tmexsiwt nnec icewwaren.

6 Minzi di řmewt war

dinni bu řidaret nnec.

Wi Cek i ɣa iqadan di řaxart?

7 Necc uḥřeɣ s inixsisen inu.

Ǧiřet tekmeř ssuffeɣ qama inu,

uřa d tassut inu tᵉṭṭebṭeb qaɛ s imeṭṭawen.

8 Tiṭṭ inu teɣři s wecḍan,

jjehd nnes iruḥ zi marra

inni d ayi iḥeṣṣaren.

9 Aggʷejem xafi,

marra inni itteggen řmuɛṣiyyet,

minzi SIDI isřa i tmijja n imeṭṭawen inu. ◘6:9 Mt. 7:23; 25:41; Lk. 13:27

10 SIDI isřa i tutra inu,

SIDI ad iqbeř taẓaǧit inu.

11 Marra řɛedyan inu ad ten teřqef

řefḍiḥet d unexřiɛ,

ad dd-dewřen ɣar ḍeffar,

ak-d wermac n wabřiwen ad seḍḥan.