1 “Qqaren: ‘Xzar, ijj n weryaz iǧef i temɣart nnes u nettat tuyur xas, tedweř d tamɣart n ijj nneɣni, ma iɛeddeř ad ɣares dd-iɛqeb xenni? Ma war tefsed temmurt nni aṭṭas?’ Cem maca tegged ffarq-cɣeř nnem ak-d ijj n ubarru n imeddukkař, ma xenni tzemmared ad ɣari dd-tɛeqbed, ammu i iqqar SIDI. ◘3:1 Aɛwd. 24:1-4 2 Sgeɛɛed tamuɣři nnem di řegɛudi i xef wehhben tiɣarṣa, xzar, mani war cem xarḍen? Aqa tuyured ad teqqimed deg ibriden marra am yijj n Weɛrab di řexřa. Ammu i tessfesded tammurt s farq-ccɣeř nnem d řɣar nnem. 3 S uya ittwamneɛ wenẓar uca war dd-iwti wenẓar ajuri. Maca cem tuɣa ɣarem tanyart teqjar n temɣart n farq-ccɣeř, war texsed ad tseḍḥid. 4 Ma war tebdid mɣir i cwayt n řweqt waha ad ayi tᵉttřaɣad ‘Baba! Cek d Ameddukkeř inu zi temẓi inu! 5 Ma xenni ad iqqim weɣḍab nnes ittbedda i řebda? Ma Netta ad t iḥḍa i řebda?’ Xzar, ammu i teqqared, am tᵉttegged mařa timesřayin nni tiɛeffanin u tᵉttxarrṣed aqa aya iɛeddeř ad ittwagg.”

6 SIDI inna ayi deg wussan n Yuciya: “Ma teẓrid min tegga temɣart Israil ikfaren? Nettat tgeɛɛed kuř adrar yuɛřan, tezzeř sadu kuř tacejjart tazizawt uca tegga din am temɣart n farq-ccɣeř! ◼3:6 tacejjart - niɣ ‘addag’ (‘iddagen’).  ◘3:6 Irm. 2:20 7 Awarni řami tegga aya, nniɣ: ‘Ad dd-tedweř ɣari!’, maca nettat war dd-tedwiř ca. Xenni teẓri aya učmas iɣeddaren Yahuda. 8 Ẓriɣ, umi d as ǧfeɣ zi ssibbet n marra min zi tezna temɣart Israil ikfaren u wciɣ as tabrat n waǧaf, aqa aya war issnexřiɛ učmas taɣeddart Yahuda, maca nettat tuyur, tessefsed ixef nnes uřa d nettat s farq-ccɣeř nnes. 9 S farq-ccɣeř nnes ihewnen, tᵉttwassefsed temmurt, maɣar nettat tezna s weẓru d ukeccuḍ. 10 Di marra aya war dd ɣari teɛqib učmas Yahuda taɣeddart s marra uř nnes, maca tessniɛmiř waha, ammu i iqqar SIDI.”

11 S uya inna ayi SIDI: “Tawečmat Israil ikfaren, aqa tarra ixef nnes tban-dd tsegged ktar x učmas Yahuda taɣeddart. 12 Uyur, řaɣa awařen-a ɣar ccamal, ini: ‘Dweř-dd, a cem temɣart Israil ikfaren!’, ammu i iqqar SIDI. Aɣembub inu war ittbarcin, maɣar Necc ccureɣ s tmexsiwt icewwaren, ammu i iqqar SIDI. Necc war ttiřiɣ ttfugmeɣ řebda. ◘3:12 Izhd. 86:15; 103:8, 9; 145:17 13 Maca nɛem s řmuɛṣiyyet nnem, aqa tɛeddid x SIDI, AREBBI nnem, uca teffɣed zeg webrid ɣar marra iɣezdisen ɣar ibarraniyyen, sadu kuř tacejjart tazizawt, maca kenniw war tesřim ca ɣar tmijja inu, ammu i iqqar SIDI.”

14 “Dewřem-dd, a tarrawt ikfaren!, ammu i iqqar SIDI, maɣar Necc d aryaz nwem, Necc ad kenniw qebřeɣ ɛawed, ijj zeg ict n tendint u tnayen zeg ijj n řaǧ, u Necc ad kenniw awyeɣ ɣar Ṣihyun. 15 Necc ad awem wceɣ imeksawen i ixs wuř inu, inni kenniw i ɣa yarewsen s tussna d řeɛqeř. ◘3:15 Irm. 23:4; Ḥiz. 34:23; Afa. 4:11 16 Xmi ɣa temmarenyem deg wussan nni, ad dd-tawyem řɣiǧet di temmurt, iqqar SIDI, ad tafed war qqaren ɛad ‘Ttabut n Řɛahd n SIDI!’ War dd asen tᵉttaři ɣar řbař, war tt ttidaren, war tt feqqden ɛad uca war tt ttsennaɛen.”

17 “Di řweqt nni ad inin i Urcalim ‘Řkursi n SIDI!’, uca marra řegnus ad ɣares dd-nnyarwen di ṭṭweɛ n Yisem n SIDI, ɣar Urcalim, uca war ttɣimin gguren ca ɛlaḥsab řeqsaḥet n wuř nsen aɛeffan. 18 Deg wussan nni ad tuyur taddart n Yahuda ɣar taddart n Israil uca nitenti ad ffɣent munent zi temmurt n ccamal ɣar temmurt nni wciɣ d tasɣart i řejdud nwem.”

19 “Necc tuɣa nniɣ: ‘Mammec zemmareɣ ad kenniw arreɣ d iḥenjiren inu uca ad awem wceɣ tammurt iɛizzen, tasɣart nni iǧan d talwizt n řɛeskarat n řegnus?’ Necc nniɣ: ‘Kenniw ad ɣari řaɣan: Baba! uca war xafi tᵉttḥeyyidem ɛad!’ 20 S tidett, am temɣart teɣdar ameddukkeř nnes, ammu uřa d kenniw tiɣdarem ayi, a taddart n Israil, ammu i iqqar SIDI.”

21 Ittwaseř ijj n řḥess x tewririn iqeccaren, anixses d tutra n ayt n Israil, minzi nitni uyuren ibriden farɣen uca SIDI, AREBBI nsen, ttun t.

22 “Dewřem-dd, a tarrawt ikfaren!, Necc xseɣ ad ssgenfiɣ akfar nwem.”

“Xzar, aqa aneɣ da, neccin nusa-dd ɣarek, maɣar Cek d SIDI, AREBBI nneɣ! 23 Nican x walu i ittraja bnadem zi řegɛudi n tewhibin d ǧɣareɣ x idurar. Nican, di SIDI, AREBBI nneɣ, aqa iǧa usenjem n Israil. ◘3:23 Izhd. 121:1 24 Řefḍiḥet tecca řxedmet n řejdud nneɣ zi temẓi nneɣ: uǧi nsen d ifunasen d tfunasin nsen, iḥenjiren nsen d tḥenjirin nsen. 25 Neccin nezzeř di řefḍiḥet nneɣ uca řeḥya nneɣ tedřa aneɣ, maɣar neccin nexḍa ak-d SIDI, AREBBI nneɣ, neccin d řejdud nneɣ, zi temẓi nneɣ ař iḍa. Neccin war nesři ca ɣar tmijja n SIDI, AREBBI nneɣ.”