1 “Uct x imeksawen i ineqqen u zuzzaran uǧi n ddmani inu n tarewsa, ammu i iqqar SIDI. ◼23:1 imeksawen - niɣ ‘iničan’.  ◘23:1 Ḥiz. 34:2 2 S uya ammu i iqqar SIDI, AREBBI n Israil, x imeksawen nni yarekkwsen řgens inu: ‘Kenniw tzuzzarem uǧi inu uca tuẓẓřem xasen. Kenniw war ten teḥḍim. Xzar, Necc ad xeřfeɣ zi tuɛeffna d tmegga nwem, ammu i iqqar SIDI. 3 Necc ad ssmuneɣ min iqqimen n wuǧi inu zi marra timmura mani xasent uẓẓřeɣ. Necc ad tent arreɣ ɣar řkurit nsent, ad arwent, ad mmarnint. 4 Necc ad asent ggeɣ imeksawen nni tent i ɣa yarewsen. Nitni war tteggʷdent ɛad u war ttnexřiɛent u war ttweddirint!’, ammu i iqqar SIDI.” ◘23:4 Ḥiz. 34:11, 12

5 “Xzar, ad dd-asen wussan, ammu i iqqar SIDI, aqa Necc ad ssekkareɣ i Dawud AƔEDDU n tsegda. Netta ad iḥkem am Ujeǧid, ad ifřeḥ uca ad igg řḥeqq d tsegda di temmurt. ◘23:5 Ica. 4:2; 40:11; Irm. 33:14, 15; Dan. 9:24; Lk. 1:32,33 6 Deg wussan nnes ad ittwassenjem Yahuda uca Israil ad izdeɣ di řaman. Wa ad yiři d Isem i zi d as i ɣa řaɣan: SIDI, Tasegda nneɣ.” ◘23:6 Aɛwd. 33:28

7 “S uya, xzar, ad dd-asen wussan, ammu i iqqar SIDI, war qqaren ɛad: ‘S tidett am iddar SIDI nni dd-issuffɣen ayt n Israil zi Miṣra!’, ◘23:7 Irm. 16:14, 15 8 maca: ‘S tidett am iddar SIDI nni dd-isgeɛɛden zzariɛet n taddart n Israil, wenni ten dd-yarrin zi temmurt n ccamal u zi marra timmura manis xasen uẓẓřeɣ. Nitni ad zedɣen di temmurt nsen.’ ”

9 X inabiyyen.

“Uř inu ittwarẓ di daxeř inu, marra iɣsan inu ttarjijin. Necc dewřeɣ am yijj n umescur, am weryaz nni yarni binu, zi ssibbet n SIDI u zi ssibbet n wawařen nnes iqeddsen. 10 Maɣar tammurt teccur s yinni izennan, maɣar tammurt tecḍen zi ssibbet n nneɛřet, ddmani n tarewsa di řexřa uẓɣent. Mani xsen ad awḍen aqa-t d aɛeffan, uřa d jjehd nsen war iǧi ca nican. ◘23:10 Irm. 5:7, 8; 9:2 11 Maɣar am unabi am ukehhan ttwafesden, ɛad di Taddart inu ttafeɣ tuɛeffna nsen, ammu i iqqar SIDI. ◘23:11 Irm. 6:13; 8:10; 14:18 12 S uya ad dd-asen idweř webrid nsen am yijj n řewḍa itteḥruǧuḍ di taǧest. Ad ttwaɛarrnen u nitni ad zzayes dd-wḍan, maɣar ad xasen dd-ssehwiɣ ict n tecti taɛeffant deg useggʷas i zzaysen i ɣa xeřfeɣ, ammu i iqqar SIDI.” ◘23:12 Izhd. 35:6; 73:18; Irm. 13:16

13 “Aqa Necc ẓriɣ timesřayin isstebhaten ɣar inabiyyen n Samarya: nitni tuɣa ttnabben s Baɛl uca ttɣarran řgens inu. 14 Maca ɣar inabiyyen n Urcalim ẓriɣ ijj n nnɛi d aɛeffan qaɛ: nitni zennan, uyuren am ssxarriqen uca ssjehden ifassen n iɛeffanen ařami uřa d ijj war dd-iɛqeb zeg webrid nnes aɛeffan. Mammec ttwařiɣ Necc, marra idsen am Sadum, uca imezdaɣ n Urcalim i Necc am Ɛamurra. ◘23:14 Ica. 1:9 15 S uya, ammu i iqqar SIDI n řɛeskarat, AREBBI n Israil: Xzar, Necc ad wceɣ cciḥ d macca i řgens-a uřa d aman n arrhaj maḥend ad ten swen, minzi zeg inabiyyen di Urcalim iffeɣ-dd uɣesseb n Ccariɛa ɣar marra tammurt. ◘23:15 Irm. 8:14; 9:15 16 Ammu i iqqar SIDI n řɛeskarat: War ttesřim ca i wawařen n inabiyyen nni d awem ittnebban, am ssawařen akidwem baṭeř. Nitni ssawařen ijj n řewḥiy n wuř n yixef nsen, war ssiwiřen řewḥiy zeg uqemmum n SIDI. 17 Řebda qqaren i yinni d ayi isseḥqaran: SIDI inna i-t, ad ɣarwem yiři řehna! U i kuř ijj wenni igguren di řeqsaḥet n wuř nnes, qqaren: War dd xawem ittemsar uřa d ijj n řɣar! ◘23:17 Irm. 6:14; 8:11; Ḥiz. 13:10; Zak. 10:2 18 Maɣar man wen zzaysen tuɣa ibedd di řḥeřqet n imcawaren n SIDI, iẓra awař nnes u isřa as? Wi issḥessen i wawař nnes uca isřa ɣares? 19 Xzar, taḥaryaḍt n SIDI, iffeɣ-dd zzayes wesɛar, ict n tḥaryaḍt tezzebzib nni dd ɣa ihwan x uzeǧif n iɛeffanen. ◘23:19 Irm. 30:23, 24 20 Aɣḍab n SIDI war dd-iddikkʷiř ca ař ɣa yiřin ixarriṣen n wuř nnes. Deg uneggar n wussan ad as tfehmem s řefhamet tekmeř. 21 Necc war dd-ssekkiɣ ca inabiyyen nni, waxxa amenni gguren ttazzřen nitni. Necc war ɣarsen ssiwřeɣ ca, waxxa amenni bdan ad nebban deɣya zeg yixef nsen. ◘23:21 Irm. 14:14 22 Mři tuɣa nitni bedden di řheřqet n imcawaren inu, iři arrin řgens inu ad iseř i wawařen inu u iři arrin ten ad dd-dewřen zeg webrid nsen aɛeffan u zi řɣar n tmegga nsen.”

23 “Necc d ijj n AREBBI zi řadas, ammu i iqqar SIDI, war iǧi ijj n AREBBI zi řaggʷaj? 24 Ma izemmar ca n yijjen ad innuffar deg imucan innuffaren, ařami Necc war t ẓarreɣ, iqqar SIDI. Ma war iǧi d Necc wenni iccuren ajenna d temmurt?, iqqar SIDI. ◘23:24 Izhd. 139:7-12; Ɛam. 9:2, 3 25 Necc sřiɣ min qqaren inabiyyen nni ittnebban am ssxarriqen deg Yisem inu, qqaren: ‘Tuɣa ɣari ict n tirja, ict n tirja!’ 26 Ař meřmi ɛad ad iřint tirja deg wuř n inabiyyen nni ittnebban am ssxarriqen? Nitni d inabiyyen n wecmaṭ n wuř n yixef nsen, 27 inni yarezzun ad arren řgens inu ad ittu Isem inu s tirja nsen nni tthajan ijj i wenneɣni, am mammec ibabaten nsen ttun Isem inu s Baɛl. ◘23:27 Řqḍ. 3:7; 8:33,34 28 Anabi nni ɣares ict n tirja, ejj i-t ad tt iḥaja, u anabi nni ɣar iǧa wawař inu, ejj i-t ad issiweř awař inu s tidett. Maɣar min dd-yiwyen řum ɣar imendi, iqqar SIDI. 29 Ma war iǧi wawař inu am tmessi, iqqar SIDI, uca am yijj n wefḍis i iřebbzen taṣḍart? 30 S uya, xzar, Necc ad řeqfeɣ inabiyyen nni, ammu i iqqar SIDI, inni ittacaren awařen inu ijj n wenneɣni. ◘23:30 Aɛwd. 18:20; Irm. 14:14, 15 31 Xzar, Necc ad řeqfeɣ inabiyyen nni, iqqar SIDI, inni issxeddamen iřes nsen u ssawařen zzayes ammu: ‘Netta iqqar!’ 32 Xzar, Necc ad řeqfeɣ inni ittnebban s tirja ixarriqen, ammu i iqqar SIDI. Nitni ttḥajan tirja nni u ammu i ttɣarran řgens inu zeg ixarriqen nsen d řhard nsen ibeṭṭřen. Necc war ten dd-ssekkeɣ u war d asen wciɣ awař. Nitni war ǧin d nnfeɛ i řgens, ammu i iqqar SIDI.” ◘23:32 Ṣaf. 3:4

33 “Xmi cek i ɣa isseqsa ijj n řgens niɣ ijj n unabi niɣ ijj n ukehhan, ad yini: ‘Min iɛna xenni řḥukm issaggʷaden n SIDI?’, xenni cek ad asen tinid: ‘Min iɛna xenni řḥukm issaggʷaden?’ ‘Ad kenniw nḍareɣ!’, ammu i iqqar SIDI. 34 Anabi d ukehhan d řgens nni iqqaren am stᵉhezzan: ‘Řḥukm issaggʷaden n SIDI?’, aryaz nni d taddart nni ad zzayes xeřfeɣ. 35 Ammu ittxeṣṣa ad tinim, kuř ijj i jjar nnes u kuř ijj i umas: ‘Mammec xak dd-yarra SIDI?’, u: ‘Min inna SIDI?’ 36 War tidarem ɛad řḥukm issaggʷaden n SIDI, maɣar řḥukm issaggʷaden n SIDI ad yiři min ɣa yini kuř ijj: aqa kenniw tessfarɣem awařen n AREBBI iddaren, SIDI n řɛeskarat, AREBBI nneɣ.

37 Ammu i ɣa tinid i unabi: ‘Mammec xak dd-yarra SIDI?’, niɣ: ‘Min inna SIDI?’ 38 Maca umi teqqarem kenniw: ‘Řḥukm issaggʷaden n SIDI?’, s uya, ammu i iqqar SIDI, umi kenniw teqqarem awař-a: ‘Řḥukm issaggʷaden n SIDI?’, waxxa Necc ssekkeɣ-dd ɣarwem ijjen ḥima ad awem yini: ‘Kenniw war teqqarem ca: Řḥukm issaggʷaden n SIDI?’, 39 s uya, xzar, Necc ad kenniw ttuɣ qaɛ. Necc ad kenniw nḍareɣ zi zzat i wudem inu ak-d tendint nwem nni d awem wciɣ i kenniw uřa i řejdud nwem. 40 Necc ad xawem dd-ssehwiɣ řḥegra i řebda d řefḍiḥet i řebda nni war ittwattun ɛemmarṣ.” ◘23:40 Irm. 20:11