1 “Necc ẓriɣ Sidi inu ibedd ɣar uɛalṭar, inna: ‘Wwet x uzeǧif n upilar, ařami i ɣa arjijent tnebdatin u arẓ i-tent d iwetwiten x uzeǧif nsen marra. Min zzaysen iqqimen, ad t nɣeɣ s ssif. War zzaysen ittrikkʷiř uřa d ijj n umarwař u uřa d ijj wenni inejjmen, ad ittwafekk. 2 Waxxa nitni ɣzin ařami iwḍen ɣar tmessi n řaxart, afus inu ad ten ssenni yawi, u waxxa nitni geɛɛaden ɣar ujenna, Necc ad ten dd ssenni ssehwiɣ, ◘9:2 Izhd. 139:8-10 3 waxxa nitni ssnuffaren ixef nsen x tqiccat n wedrar n Karmil, Necc ad arzuɣ u ad ten dd-awyeɣ ssenni. Waxxa nitni ssnuffaren ixef nsen zzat i tiṭṭawin inu x tisi n řebḥar, xenni Necc ad weṣṣiɣ afiɣar maḥend ad ten izɛef, 4 u waxxa nitni uyuren di tmeḥbast zzat i wudem n řɛedyan nsen, Necc ad weṣṣiɣ dinni ssif maḥend ad ten ineɣ. Necc ad xasen nḍareɣ tiṭṭ inu i řɣar, war iǧi i řxar. ◘9:4 Irm. 44:11 5 Sidi inu, SIDI n řɛeskarat, Netta d wenni ittḥadan tammurt, ařami tenhezz u marra imezdaɣ nnes ceḍnen. Tᵉttgeɛɛed tmun am yeɣzar n Nil uca tᵉttaři thekkwi am yeɣzar n Miṣra. 6 Netta d wenni ibennan ixxamen nnes sennej deg ujenna u ittegg řqubbet nnes x temmurt, Netta d wenni ittřaɣan i waman n řebḥar uca ittfarreɣ i-ten x wudem n temmurt, SIDI d Isem nnes.◘9:6 Izhd. 104:3, 13; Ɛam. 5:8 7 Ma kenniw war teǧim inu am ayt n Kuc, a ayt n Israil?, iqqar SIDI. Ma Necc war dd-ssuffɣeɣ Israil zi Miṣra u Ifilisṭiniyyen zi Kaftur u Aram zi Qir? 8 Xzarem, tiṭṭawin n Sidi inu, SIDI, aqa atent ḍidd i tgeldit tamednubt. Necc ad tt teḥḥiɣ zeg wudem n temmurt. Necc maca war tteḥḥiɣ marra taddart n Yaɛqub, iqqar SIDI. 9 Maɣar xzarem, Necc ad umureɣ u ad zzeřzeɣ taddart n Israil jar marra řegnus, am mammec zzeřzen zzariɛet deg ijj n bu-siyyar u war tweṭṭi uřa d ict n tḥebbuct ɣar temmurt. 10 Marra imednab n řgens inu ad ttwanɣen s ssif, inni iqqaren: ‘Řɣar war d aneɣ iřeqqef ca u war ɣarneɣ dd-ittqarrib ca zi marra iɣezdisen!’ ”

11 “Deg wass nni ad ssgeɛɛdeɣ ɛawed taxzant iweṭṭan n Dawud i iwḍan u Necc ad qqneɣ tizza nnes u min zzayes ittwahedmen, ad t arreɣ ɣar wemcan nnes u Necc ad t bniɣ ɛawed am deg wussan n wecḥař uya, ◘9:11 Řex. 15:16 12 maḥend nitni ad warten min iqqimen zi Idum d marra řegnus i x ittwabarreḥ s Yisem inu, iqqar SIDI wenni itteggen marra aya. 13 Xzarem, ad dd-asen wussan, iqqar SIDI, aqa wenni icarrzen ad xas dd-iḥart wenni imejjaren, u wenni iřebbzen aḍiř s iḍaren ad xas dd-iḥart wenni isswiẓẓḍen afus ak-d zzariɛet, u idurar ad ttucruren s binu ẓemmen t jdid, u marra tiwririn ad ssefyent. ◘9:13 Yuw. 4:18 14 Necc ad ssenqeřbeɣ tameḥbast x řgens inu Israil u nitni ad bnan ɛawed tineddam i tuɣa ittwahedmen u ad daysent zeddɣen u nitni ad ggen imarjaɛen n uḍiř ad daysen ẓẓun tizayarin u ad zzaysent swen binu, ad ggen iḥwicen ad ccen řɣiǧet nnes. 15 Necc ad ten ẓẓuɣ di temmurt nsen u ɛemmarṣ ɛad ad ttwaqeřɛen zi temmurt nsen nni i d asen wciɣ, iqqar SIDI, AREBBI nnec.” ◘9:15 Irm. 32:41