1 Awař nni dd-iffɣen zi SIDI ɣar Irmiya deg useggʷas wiss ɛecra n Ṣidqiya, ajeǧid n Yahuda. Aseggʷas-a tuɣa d aseggʷas wiss tmenṭac n Nabuxadraṣṣar. 2 Deg wussan nni tuɣa řɛeskar n ujeǧid n Babil iḥeṣṣar-dd Urcalim uca anabi Irmiya tuɣa ittwaḥebbes di řemraḥ n řeḥbes nni tuɣa di taddart n ujeǧid n Yahuda. 3 Maɣar tuɣa iḥebbes i-t Ṣidqiya, ajeǧid n Yahuda, am d as inna: “Mayemmi tᵉttnabbed, teqqared: ‘Ammu i iqqar SIDI: Xzar, Necc ad ggeɣ tandint-a deg ufus n ujeǧid n Babil u netta ad tt tᵉṭṭef. 4 Ṣidqiya, ajeǧid n Yahuda, war inejjem zeg ufus n Ikaldaniyyen, maca ad immewc deg ufus n ujeǧid n Babil. Netta ad kides issiweř zeg uqemmum ɣar uqemmum u netta ad t iẓar tiṭṭ di tiṭṭ. ◘32:4 Irm. 34:3 5 Netta ad yawi Ṣidqiya ɣar Babil u netta ad dinni iqqim, ař ɣares i ɣa raḥeɣ, ammu i iqqar SIDI. Waxxa kenniw ad temmenɣem ak-d Ikaldaniyyen, war ttikkwiḍem ca.’ ”

6 Irmiya inna: “Yusa-dd ɣari wawař n SIDI, inna: 7 ‘Xzar, Ḥanam’il, mmis n ɛemmic Callum, ad ɣarek dd-yas uca ad yini: Seɣ i yixef nnec iyyar inu di Ɛanatut, maɣar cek ɣarek řḥeqq n řefdiyyet maḥend ad t tesɣid.’ ” 8 Xenni yusa-dd ɣari Ḥanam’il, mmis n ɛemmi, ɛlaḥsab awař n SIDI, di řemraḥ n řeḥbes, inna ayi: “Seɣ xenni iyyar inu di Ɛanatut, di temmurt n Binyamin, maɣar cek ɣarek řḥeqq ad t twarted uca ɣarek řḥeqq n usufeɣ maḥend ad t tefdid, ad t tesɣed.” Řexdenni ssneɣ illa awař-a yusa-dd zi SIDI. 9 Ammu i sɣiɣ iyyar nni iǧan di Ɛanatut x Ḥanam’il, mmis n ɛemmi, uca wezneɣ as nnuqart: sbeɛṭac ciqlu n nnuqart. 10 Necc weqqɛeɣ x tabrat, cemmɛeɣ tt uca jjiɣ cchud ad tt ssmetnen uca wezneɣ nnuqart di řmizan. 11 Ksiɣ tabrat ittwannḍen n tmesɣiwt, tenni tuɣa ittwacemmɛen, ittwari dayes mammec ittwagg řɛahd u min ǧant lfarayiḍ, uřa tabrat yarezmen 12 uca wciɣ tabrat ittwanḍen n tmesɣiwt i Barux, mmis n Niri-Yah, mmis n Maḥsiya, zzat i tiṭṭawin n Ḥanam’il, mmis n ɛemmi, u zzat i tiṭṭawin n řechud nni tuɣa iweqqɛen tabrat ittwannḍen n tmesɣiwt zzat i tiṭṭawin n marra Wudayen nni iqqimen di řemraḥ n řeḥbes. 13 Necc umureɣ Barux zzat i tiṭṭawin nsen, nniɣ: 14 “Ammu i iqqar SIDI n řɛeskarat, AREBBI n Israil: ‘Ksi tibratin-a, tabrat ittwannḍen n tmesɣiwt, am tenni icemmɛen am tanita, tenni yarezmen, uca ssars i-tent deg ict n řqecɛet n třaxt, maḥend ad qqiment aṭṭas n wussan ḥḍant!’ 15 Maɣar ammu i iqqar SIDI n řɛeskarat, AREBBI n Israil: ‘Ad ttwasɣen ɛawed tudrin d iyyaren d imarjaɛen n uḍiř di temmurt-a.’ ”

16 Awarni umi tuɣa wciɣ tabrat n tmesɣiwt i Barux, mmis n Niri-Yah, ẓẓuǧeɣ s řaǧaɣ ɣar SIDI, nniɣ: 17 “Ax, Sidi inu, SIDI, xzar, Cek teggid ijenwan d tammurt s jjhed nnec ameqqran u s uɣiř nnec isswiẓẓḍen. War xak iwɛar walu. 18 Cek d wenni iggin tamexsiwt icewwaren i řuřuf uca txeǧṣed řmuɛṣiyyet n ibabaten deg weḥsin n iḥenjiren nsen awarni asen, a Cek Arebbi d ameqqran d ajebbar, wenni umi qqaren: SIDI n řɛeskarat. ◘32:18 Uf. 34:7 19 Cek d ameqqran n ccwar u tejhed di tmegga, maɣar tiṭṭawin nnec ttɛessent x marra ibriden n tarwa n bnadem, ḥima ad txeǧṣeḍ kuř ijj ɛlaḥsab ibriden nnes u ɛlaḥsab řɣiǧet n tmegga nnes.◘32:19 Ayub 34:21; Awřn. 5:21; Ica. 28:29; Irm. 16:17; 17:10 20 Cek teggid řeɛřamat d lmujizat di Miṣra, ař ass-a, am deg Israil am deg iwdan nneɣni. Teggid ijj n Yisem i Yixef nnec, am mammec i teǧa ass-a. 21 Cek tessuffɣed-dd řgens nnec Israil zi temmurt n Miṣra s řeɛřamat d lmuɛjizat, s ijj n ufus ijehden d ijj n uɣiř isswiẓẓaḍen, umi tessekkared ict n teggʷudi tameqqrant jar řegnus.◘32:21 Uf. 6:7; 2 Ṣm. 7:23; 1 Im. 17:21 22 Cek tewcid asen tammurt-a, tenni tejjuǧed i řejdud nsen maḥend ad asen tt tewced, ict n temmurt ifeyyḍen s uɣi d tamment. 23 Nitni udfen-dd ɣares uca ṭṭfen tt d tasɣart, maca nitni war sřin i tmijja nnec u war uyuren deg webrid n Ccariɛa nnec u war ggin ɛlaḥṣab marra minzi ten tweṣṣid. S uya i ten iřqef marra řɣar-a. 24 Xzar, icbaren i řeḥṣaret! Nitni iwḍen-dd ař tandint maḥend ad tt ṭṭfen, uca tandint temmewc deg ufus n Ikaldaniyyen nni akides ittmenɣan, zi ssibbet n ssif d řaẓ d ṭṭaɛun. Min tessiwřed aqa yiweḍ-dd. Xzar, tᵉttwarid t simant nnec. 25 Waxxa amenni tennid ayi, a Sidi inu, SIDI: Seɣ i yixef nnec iyyar nni s nnuqart uca ejj řechud ad tt ssmetnen, řami temmewc tendint deg ufus n Ikaldaniyyen.”

26 Xenni yusa-dd wawař n SIDI ɣar Irmiya, inna: 27 “Xzar, Necc d SIDI, AREBBI n marra nni ɣarsen arrimet n weysum. Ma iwɛar xafi ca?’ ◘32:27 Řxř. 16:22 28 S uya, ammu i iqqar SIDI: ‘Necc ad ggeɣ tandint-a deg ufus n Ikaldaniyyen u deg ufus n Nabuxadraṣṣar, ajeǧid n Babil, u netta ad tt iṭṭef. 29 Ikaldaniyyen, inni ittmenɣan ak-d tendint-a, ad ɣares dd-adfen, ad qedden tandint s tmessi uca ad tt sscemḍen ak-d tudrin nni x tzeɣwin nsent i zi qeddmen tiwhibin n řebxur i Baɛl uca seyyben tiwhibin n useyyeb i irebbiten nneɣni ḥima ad ayi sɛaren. ◘32:29 Irm. 21:10 30 Maɣar ayt n Israil d ayt n Yahuda zi temẓi nsen tteggen mɣir min iǧan d aɛeffan di tiṭṭawin inu. Ayt n Israil sɛaren ayi s řxedmet n ifassen nsen!’, iqqar SIDI. 31 ‘Maɣar tandint tuɣa tt i Necc d ssibbet n weɣḍab d wesɛar zeg wass nni di tᵉttwabna ař ass-a, ařami tt ɣa nḍareɣ x wudem inu 32 zi ssibbet n marra řɣar n ayt n Israil d ayt n Yahuda maḥend ad ayi sɛaren, nitni d ijeǧiden nsen d řḥukkam nsen d ikehhanen nsen d inabiyyen nsen d iryazen n Yahuda d imezdaɣ n Urcalim. 33 Nitni wcin ayi-dd s weɛrur, war iǧi s uɣembub, waxxa Necc ssřemdeɣ ten, ɛad zeg umezwaru ssɣareɣ ten, maca nitni war xsen ad sřen maḥend ad ṭṭfen ttarbiyyet. ◘32:33 Irm. 2:27; 7:13, 24, 25; 25:3; 26:5; 29:19 34 Nitni ssbedden nnɛawat nsen n l’aṣnam di Taddart i xef ittwabarreḥ Isem inu maḥend ad tt ssxemjen. 35 Nitni ssbedden řegɛudi n Baɛl mani i d as ttwehhben ddbayeḥ nsen di teɣzurt n mmis n Hinnum maḥend ad sseɛdun iḥenjiren nsen d tḥenjirin nsent i Mulak di tmessi, min war d asen umureɣ ɛemmarṣ u min war d ayi dd-iddaren di řbař inu, aqa ad ggen nnɛi am wa ařami ɛarnen Yahuda ɣar ddnub.’ ” ◘32:35 Irm. 19:5

36 “S uya, řexxu, ammu i iqqar SIDI, AREBBI n Israil, x tendint-a i x teqqarem: ‘Aqa temmewc deg ufus n ujeǧid n Babil, s ssif, s řaẓ u s ṭṭaɛun!’: 37 Xzar, Necc ad ten ssmuneɣ zi marra timmura mani xasen uẓẓřeɣ deg weɣḍab inu u deg wesɛar inu u deg uduqqez n weɣḍab inu, u Necc ad ten arreɣ ɣar wemcan-a u ad ten sszedɣeɣ di řaman. ◘32:37 Irm. 23:3; 29:14; 31:10 38 Nitni ad iřin d řgens inu u Necc ad iřiɣ d AREBBI nsen. ◘32:38 Irm. 24:7; 30:22; 31:1,33 39 Necc ad asen wceɣ uř d ijj uřa d webrid d ijj ḥima ad ayi ggʷeden marra ussan i tizi nsen u i tizi n iḥenjiren nsen awarni asen. 40 Necc akidsen ggeɣ ijj n Řɛahd ittduman, aqa war ttḥeyyideɣ zi awarni asen, ḥima ad asen ggeɣ min iṣebḥen, u Necc ad asen ssarseɣ tiggʷudi zzayi deg wuř nsen, maḥend war xafi ttḥeyyiden ɛad. 41 Necc ad zzaysen farḥeɣ maḥend ad daysen tthilliɣ u zi řmanet inu ad ten ẓẓuɣ di temmurt-a s marra uř inu u s marra řeɛmar inu.’ ” ◘32:41 Irm. 24:6; Ɛam. 9:15

42 “Maɣar ammu i iqqar SIDI: ‘Am mammec i dd iwyeɣ x řgens-a tuɛeffna-ya tameqqrant, ammu i xasen i ɣa ssiwḍeɣ marra taṣebḥant i xasen nniɣ. 43 Ad sɣen ɛawed iyyaren di temmurt-a i xef teqqarem kenniw: ‘Aqa-tt d ict temmurt ittwareddǧen nhřa bnadem d řmar, temmewc deg ufus n Ikaldaniyyen.’ 44 Ad sɣen ɛawed iyyaren s ttmenyat n nnuqart, ad weqqɛen u ad cemmɛen tibratin n tmesɣiwt, ad awyen řechud ḥima ad ssmetnen tamesɣiwt di temmurt n Binyamin, di jjwayeh n Urcalim, di tneddam n Yahuda, di tneddam n Temmurt n Idurar, di tneddam n Temmurt Iwaṭan u di tneddam n Temmurt n Ljanub, maɣar Necc ad ssenqeřbeɣ tameḥbast nsen, ammu i iqqar SIDI.’ ”