1 Ammu i iqqar SIDI: “Uyur uca seɣ ijj n uɣarraf n třaxt uca awi ca zeg imɣaren n řgens u zeg imɣaren n ikehhanen akidek. 2 Ffeɣ ɣar barra ɣar Teɣzurt n mmis n Hinnum, tenni ɣar wadaf n Tewwart n Iceqfan, uca barreḥ dinni awařen nni i d ac ɣa iniɣ, 3 ini: ‘Sřem i wawař n SIDI, a ijeǧiden n Yahuda d imezdaɣ n Urcalim! Ammu i iqqar SIDI n řɛeskarat, AREBBI n Israil: Xzar, Necc ad ssiwḍeɣ ict n tecti tameqqrant x wemcan-a, maḥend n marra nni tt ɣa isřen, ad ṭneṭnen imezzuɣen, ◘19:3 1 Ṣm. 3:11; 2 Ij. 21:12 4 maɣar nitni ḥeyyden xafi, arrin amcan-a d ijj n wemcan i ibarraniyyen uca qeddmen tiwhibin n řebxur i irebbiten nneɣni nni war ssinen, war iǧi nitni uřa d ibabaten nsen d ijeǧiden n Yahuda. Nitni ɛemmaren amcan-a s idammen n imezdagen. ◘19:4 Ica. 65:11; Irm. 2:13, 17, 19; 5:7, 19; 7:6; 15:6; 17:13 5 Minzi nitni ssbedden řegɛudi mani ttwehhbent ddbayeḥ nsen i Baɛl, ḥima ad sscemḍen iḥenjiren nsen s tmessi, am tɣarṣa n wecmaḍ i Baɛl, min war d asen umureɣ d min war ɣarsen ssiwřeɣ d min ɛemmarṣ war t ggiɣ deg wuř inu.’ ”

6 “S uya, xzar, ad dd-asen wussan, ammu i iqqar SIDI, war daysen qqaren ɛad i wemcan-a ‘Tufat’ niɣ ‘Taɣzurt n mmis n Hinnum’, maca ‘Taɣzurt n Wenɣay’. ◘19:6 Irm. 7:32 7 Maɣar ad ssbeṭṭřeɣ inwayen n Yahuda d Urcalim deg wemcan-a u ad ten ɣeḍřeɣ zzat i wudem n řɛedyan nsen s ssif u s ufus n yinni yarezzun tudart nsen. Necc ad wceɣ řxecbat nsen d macca i ijḍaḍ n ujenna u i řmař n temmurt. ◼19:7 tudart nsen - s Tɛibranit ‘řeɛmar nsen’.  ◘19:7 Irm. 15:3; 16:4 8 Necc ad arreɣ tandint-a d ict n řqecɛet n unexřiɛ d tseḍḥac. Kuř ijj wenni xas dd ɣa ikken ad innexřeɛ u ad iṣeffar s asrubi x marra jjɛayef nnes. 9 Necc ad asen ggeɣ ad ccen aysum n iḥenjiren nsen d weysum n yessitsen. Nitni ad ccen, kuř ijj aysum n jjar nnes, di řweqt nni di ɣa quwwaren i tendint, di řeḥṣaret i zi ten i ɣa ḥṣaren řɛedyan nsen d yinni yarezzun tudart nsen.”◘19:9 Lawi 26:29; Aɛwd. 28:53; Igjd. 4:10 10 Xenni ittxeṣṣa ac ad tarẓed aɣarraf jar tiṭṭawin n yeryazen nni akidek yuyuren. 11 Ittxeṣṣa ad asen tinid: “Ammu i iqqar SIDI n řɛeskarat: ‘Ammu i ɣa arẓeɣ řgens-a d tendint-a, am mammec ttareẓẓan ijj n uɣarraf n bu-třaxt nni war izemmaren ad t ɛedřen ɛad. Nitni ad ten neḍřen di Tufat umi war din iqqim wemcan mani ɣa neḍřen. ◘19:11 Irm. 7:32 12 Ammu i ɣa ggeɣ zeg wemcan-a u zeg imezdaɣ nnes, iqqar SIDI, ḥima ad arreɣ tandint-a am Tufat. 13 Tudrin n Urcalim d tudrin n ijeǧiden n Yahuda ad dewřent xemjent am wemcan n Tufat, zi ssibbet n marra tudrin i zi x tzeɣwin nsent qeddmen nitni řebxur i marra řɛeskar n ujenna d tewhibin n useyyeb i irebbiten nneɣni.’ ” ◘19:13 Irm. 7:18

14 Umi dd-iɛqeb Irmiya zi Tufat, mani tuɣa t issekk SIDI maḥend ad inebba, yuyur di řemraḥ n zzat n Taddart n SIDI uca inna i řgens marra: 15 “Ammu i iqqar SIDI n řɛeskarat, AREBBI n Israil: ‘Xzar, Necc ad ssiwḍeɣ x tendint-a u x marra tineddam nnes marra řɣar nni x ssiwřeɣ, minzi nitni menɛen taɣennant am ugin ad sřen ɣar wawařen inu.’ ” ◘19:15 Irm. 7:26; 17:23