1 Awař nni dd-iffɣen zi SIDI ɣar Irmiya, inna: 2 “Bedd di tewwart n Taddart n SIDI uca řaɣa dinni awař-a, ini: ‘Sřem awař n SIDI, a Yahuda marra, kenniw inni ittadfen zi tewwura-ya ḥima ad tbendqem zzat i SIDI. 3 Ammu i iqqar SIDI n řɛeskarat, AREBBI n Israil: Ɛedřem ibriden nnem d tmegga nwem, xenni Necc ad kenniw sszedɣeɣ deg wemcan-a. ◘7:3 Irm. 7:3; 18:11; 26:13 4 War ttcařem x wawařen n ixarriqen am teqqarem: Zzawect Tameqqrant n SIDI, Zzawect Tameqqrant n SIDI, Zzawect Tameqqrant n SIDI, aqa-tt d ta zeɛma! 5 Maɣar mɣir mařa tɛedřem ibriden nwem d tmegga nwem nican, mařa s tidett tᵉtteggem s řḥeqq jar weryaz d umeddukkeř nnes, ◘7:5 Irm. 5:28 6 war ḥeṣṣarem abarrani, ayujiř d tajjač, u war ssizziřem idammen imezdagen deg wemcan-a u war ḍeffarem irebbiten nneɣni i uḍeyyeɛ nwem, ◘7:6 Ica. 10:1, 2; 59:7 7 xenni Necc ad kenniw sszedɣeɣ deg wemcan-a, di temmurt i wciɣ i řejdud nwem, zi řebda ař řebda. 8 Xzar, kenniw tᵉttcařam x ixarriqen nni war ineffɛen di walu. 9 Tᵉttacarem, tneqqem, tzennam, tᵉttjaǧam ẓur, tᵉttqeddamem tiwhibin n řebxur i Baɛl u tḍeffaram irebbiten nneɣni nni war tessinem, 10 uca xenni ad dd-tasem tbeddem zzat i wudem inu di Taddart-a min xef ittwabarreḥ s Yisem inu, uca xenni tzeɛmem ɛad ad teqqarem: ‘Neccin nettwassenjem!’, uca xenni tᵉttɛawadem tᵉtteggem marra jjɛayef-a! 11 Ma tedweř Taddart-a min xef ittwabarreḥ Isem inu d ifri n ixewwanen di tiṭṭawin nwem? Xzar, Necc ẓriɣ t mliḥ!’, ammu i iqqar SIDI.” ◘7:11 Mt. 21:13; Mk. 11:17; Lk. 19:46

12 “Waxxa, uyurem ɣar wemcan n Tzeddiɣt inu di Cilu mani tuɣa sszedɣeɣ Isem inu deg umezwaru. Xzarem min zzayes ggiɣ zi ssibbet n řɣar n řgens inu Israil. ◘7:12 1 Ṣm. 4:11; Izhd. 78:60 13 Xenni řexxu, minzi kenniw teggim marra timegga-ya, ammu i iqqar SIDI, u Necc ssiwřeɣ akidwem zeg umezwaru, maca kenniw war tesřim ca, u Necc řaɣiɣ-dd xawem, maca kenniw war dd-tarrim, ◼7:13 zeg umezwaru - s Tɛibranit ‘ssiwřeɣ akidwem umi tuɣa-yi ttfaqeɣ’.  ◘7:13 2 Im. 36:15; Awřn. 1:24; Ica. 65:12; 66:4; Irm. 7:21-28 14 s uyenni Necc ad ggeɣ ak-d Taddart-a min xef ittwabarreḥ Isem inu, min xef tᵉttcařam, u ak-d wemcan-a nni wciɣ i kenniw d řejdud nwem, am mammec ggiɣ ak-d Cilu. 15 Necc ad kenniw nḍareɣ zi zzat n wudem inu, am mammec nḍareɣ marra aytmatwem, marra zzariɛet n Ifrayim.”

16 “A cek, war ttẓaǧ i řgens-a u war sgeɛɛed tmijja nnec ḥima ad trud niɣ ad teẓẓaǧed u war ttɣimi tᵉttrud-dd ɣari, maɣar Necc war ɣarek dd-ttesřiɣ. ◘7:16 Uf. 32:10; Irm. 11:14; 14:11 17 Ma war tᵉttwiřid min tteggen nitni di tneddam n Yahuda u deg ibriden n Urcalim? 18 Iḥenjiren ssmunam akeccuḍ, ibabaten nsen ssraqqan timessi, u timɣarin tteggwent arecti ḥima ad sswejdent tifḍiřin i tjeǧidt n ujenna u ḥima ad farrɣent tiwhibin n useyyeb zzat i irebbiten nneɣni maḥend ad ayi sɛaren. ◘7:18 Ica. 65:11; Irm. 8:2; 19:13; 44:19; Irm. 44:19 19 Ma sɛaren ayi, iqqar SIDI? Ma war t tteggen i yixef nsen i řefḍiḥet n simant nsen? 20 S uya, ammu i iqqar Sidi inu, SIDI, xzar, ad ittwafarreɣ weɣḍab inu d wesɛar inu x wemcan-a: x iwdan, x imuddaren, x tcejjura deg iyyar u x řɣiǧet n wudem n temmurt. Ad yareqq wah, u war izemmar ad ittwassexsi.”

21 “Ammu i iqqar SIDI n řɛeskarat, AREBBI n Israil: ‘Smunem tiɣarṣa n wecmaḍ nwem ak-d tɣarṣa nwem uca ccem aysum nsent. ◘7:21 Ica. 1:11; Irm. 6:20; Ɛam. 5:21 22 Maɣar deg wass nni di ten ssuffɣeɣ zi temmurt n Miṣra, war ssiwřeɣ ak-d řejdud nwem maḥend ad asen weṣṣiɣ x tɣarṣa n wecmaḍ d tɣarṣi. 23 Maca Necc umureɣ tamesřact-a umi nniɣ: ‘Sřem-dd ɣar tmijja inu, xenni Necc ad awem iřiɣ d AREBBI u kenniw ad ayi tiřim d řgens u ad tuyurem di abrid marra nni d awem i ɣa umureɣ maḥend ad tiřim mliḥ!’ ◘7:23 Uf. 19:5; Lawi 26:12; Aɛwd. 6:3 24 Maca nitni war sřin, war d ayi wcin umezzuɣ, nitni ḍfaren ixarriṣen d řeqsaḥet n wuř aɛeffan nsen, u nitni dewřen ɣar ḍeffar, war iǧi ɣar zzat. ◘7:24 Irm. 2:27; 3:17; 16:12; 32:33 25 Zeg wass nni di ffɣen řejdud nwem zi Miṣra ař ass-a, ssekkeɣ-dd ɣarwem marra imsexxaren inu, inabiyyen, zeg wussan n wecḥař uya. 26 Nitni war ɣari sřin u war d ayi wcin amezzuɣ. Nitni arnin di řeqsaḥet mahu řejdud nsen. ◘7:26 Naḥ. 9:17, 29; Irm. 17:23; 19:15 27 Ad kidsen tessawařed marra awařen-a, maca nitni war d ak ttesřin ca. Cek ad asen třaɣid, maca war xak dd-ttarrin. 28 S uya ini asen: ‘Wa d řgens i war ittesřin ɣar tmijja n SIDI, AREBBI nnes, u war ittejjin ixef nnes ad ittwawebbex. Aqa tidett tᵉttwareddeǧ u tᵉttwaqess zeg uqemmum nsen!’ ” ◘7:28 Irm. 5:1, 3

29 “Ḥeff tajj nnec n weɛzař uca nḍar i-t, wwet s igejduren x řegɛudi mani ttwehhbent ddbayeḥ, maɣar SIDI inḍar jjiř min xef idduqqez ufugem nnes, uca ijja i-t. ◘7:29 Ayub 1:20; Ica. 15:2; Irm. 16:6 30 Maɣar iḥenjiren n Yahuda ggin min iǧan d aɛeffan di tiṭṭawin inu, ammu i iqqar SIDI. Nitni ssbedden nnɛawat nsen n l’aṣnam di Taddart min xef ittwařaɣa s Yisem inu maḥend ad tt ssxemmjen. 31 Nitni ssbedden řegɛudi n Tufat mani ttwehhbent ddbayeḥ, d tinni iǧan di Teɣzurt n mmis n Hinnum, ḥima ad sscemḍen iḥenjiren d tḥenjirin nsen di tmessi, min ɛemmarṣ war d asen umureɣ d min ɛemmarṣ war d ayi dd-iddaren ɣar řbař.” ◼7:31 ɣar řbař - s Tɛibranit ‘ɣar wuř’.  ◘7:31 2 Ij. 23:10; Irm. 2:23; 19:5, 6

32 “S uya, xzar, ad dd-asen wussan, ammu i iqqar SIDI, war d as ttřaɣan ɛad ‘Tufat’ niɣ ‘Taɣzurt n mmis n Hinnum’, maca ‘Taɣzurt n Wenɣay’, uca di Tufat ad neḍřen imettan, minzi mani nneɣni war din amcan. 33 Řxecbat n řgens-a ad dewřent d macca i ijḍaḍ n ujenna u i řmař n yeyyar uca uřa d ijj war ten issiggʷid. ◘7:33 Aɛwd. 28:26; Irm. 34:20 34 Zi tneddam n Yahuda u zeg ibriden n Urcalim ad ssbeddeɣ tmijja n usřiwřew d tmijja n řefraḥet, tmijja n muřay d tmijja n tesřit, maɣar tammurt ad tedweř d řxarbet.”◘7:34 Ica. 24:7; Irm. 16:9; 25:10; Ḥiz. 26:13; Ḥuc. 2:13