1 Řḥukm issaggʷaden x Mu’ab.

“Di ǧiřet ittwahdem Ar-Mu’ab, idweř issusem, wah, di ǧiřet ittwahdem Qir-Mu’ab, idweř issusem! ◘15:1 Irm. 48:1; Ḥiz. 25:9; Ɛam. 2:1 2 Geɛɛden ɣar Bayit d Dibun, ɣar řegɛudi ḥima ad run. Dinni ad iru Mu’ab x Nabu d Maydaba. Qaɛ azeǧif nsen iřsa d aqeccar, marra timira ttwaḥeffent. ◘15:2 Irm. 48:37; Ḥiz. 7:18 3 Beysen s txuncay n wecḍan deg izniqen nsen, aqa din mɣir tɣuyyit x tzeɣwin nsen u deg wazzayen nsen, imeṭṭawen weṭṭan-dd x uɣembub. 4 Ḥacbun isɣuyyu, uřa d Aliɛala. Ttesřan i tmijja nsen ař Yahaṣ. X uya sɣuyyun uřa d iryazen n Mu’ab nni ɣar iǧa řesnaḥ, buḥbeř n mkuř aryaz ifceř dayes.”

5 “Uř inu isɣuyyu x Mu’ab. Imarwařen nnes iwḍen ař tandint n Ṣuɣar, tenni iǧan am taɛejmit n třata n iseggʷusa. Am ttrun ttgeɛɛaden tasawent n Luḥit, wah, deg webrid ɣar Ḥurunayim ssgaɛɛaden nitni taɣuyyit n txessart. 6 Wah, aman n Nimrim ad dewřen imucan xřan, wah, arbiɛ isřaw, aɣemmuy n arbiɛ iqḍa, war ittiři ɛad uɣemmuy aziza. 7 X uya ad arbun min iceṭṭen d min ɛad ɣarsen, ɣar ujemmaḍ n iɣzar n Iṣefṣafen. 8 Wah, ad dd-teffeɣ tɣuyyit n ucetci di temmurt n Mu’ab, aweɛɛeḍ nnes ad dd-iffeɣ ař Ajlayim, aɣuyyi s imeṭṭawen ař Bi’r-Ilim. 9 Ɛad ccuren waman n Dimun s idammen, waxxa Necc ad arenyeɣ x Dibun ɛad ktar: ayrad ad dd-yas x yinni dd-yarewřen zi Mu’ab, x min iqqimen di temmurt.”