7
Aneggaru ad dd-yas!
1 Yusa-dd ɣari wawař n SIDI, inna:
2 “Cek, a mmis n bnadem, ammu i iqqar Sidi inu, SIDI, i temmurt n Israil:
‘Aneggar, yusa-dd uneggar
x arebɛa n iɣezdisen n temmurt.
3 Řexxu yusa-dd xam uneggar nnem,
minzi ad ɣarem dd-sekkeɣ aɣḍab inu
u ad xam ḥekmeɣ am yibriden nnem
uca ad xam ggeɣ marra jjɛayef nnem.
4 War d am zziǧizent tiṭṭawin inu
u war areḥḥmeɣ,
minzi ad arreɣ ibriden nnem
x uzeǧif nnem
u jjɛayef nnem ad cem řeqfent
di řwesṭ nnem.
Ammu i ɣa tessnem belli Necc d SIDI.’ ◘7:4 Ḥiz. 5:11; 8:18
5 Ammu i iqqar Sidi inu, SIDI:
‘Ijj n řɣar, ijj n řɣar ifarzen,
aqa ad dd-yas.
6 Yusa-dd uneggar,
aneggar yusa-dd,
ifaq-dd ḍidd nnem,
aqa ad dd-yas!
7 Tusa-dd ɣarek tqedduḥt,
a amezduɣ n temmurt,
tasaɛɛet tusa-dd,
ass n uxarweḍ iqarreb-dd
u war din asřiwřew
zeg idurar. ◼7:7 tasaɛɛet - s Tɛibranit ‘řweqt’.
8 Řexxu deɣya ad xam zeǧɛeɣ asɛar inu
uca ad dayem kemmřeɣ aɣḍab inu.
Ad xam ḥekmeɣ anect n ibriden nnem
uca ad xam ssiwḍeɣ
marra jjɛayef nnem.
9 War zziǧizeɣ u war areḥḥmeɣ.
Ad ɣarem dd-arreɣ
min tessdaheǧed,
u jjɛayef nnem ad iřint di řwesṭ nnem
u kenniw ad tessnem
belli aqa Necc d SIDI
wenni kenniw iccaten.’
10 ‘Xzar, ass, xzar,
aqa da tiweḍ-dd tqedduḥt,
teqḍa tqedduḥt,
tnewwar taɣɣarct,
tessendi nnfaxet.
11 Igeɛɛed lɛunf am uzeǧaḍ n řɣar.
War zzaysen iqqim uřa d ijj,
walu n řɣaci nsen inhewřen,
walu n ddriz nsen
u walu n usemɣar ad ɣarsen iqqim ɛad.
12 Tusa-dd tsaɛɛet, ixecced wass.
Ejj wenni isɣin war ifarreḥ
u ejj wenni izznuzan war ittecḍin,
minzi řḥaduq n weɣḍab
aqa-t x marra řɣaci nnes inhewřen.
13 Minzi wenni izznuzan
war dd-iddikkwiř
ɣar min immenzen,
waxxa nitni qqimen ddaren,
minzi war ibeṭṭiř řewḥiy
x marra řɣaci inhewřen n temmurt,
uca uřa d ijj war izemmar s řmuɛṣiyyet nnes
ad iqqim ittᵉṭṭef di tudart nnes.
14 Nitni suḍen s jjehd di řbuq
uca sswejden marra řeḥwayej,
maca uřa d ijj war itteffeɣ ɣar umenɣi,
minzi řḥaduq n weɣḍab inu
aqa-t x marra řɣaci inhewřen n temmurt.’
15 ‘Zi barra ssif
u zi daxeř ṭṭaɛun d řaẓ.
Wi iǧan deg iyyar ad immet s ssif,
wi iǧan di tendint ad t yecc řaẓ d ṭṭaɛun.
16 Wi zzaysen yarewřen, wah ad nejmen,
maca ad iřin x idurar
am idbiren zi teɣzurin,
ad nnezbaren marra,
kuř ijj x řmuɛṣiyyet nnes.
17 Marra ifassen ad heyyfen,
u marra ifadden ad dewřen d aman.’ ◘7:17 Ica. 13:7; Irm. 6:24
18 ‘Ad beysen s txuncay n wecḍan,
arjef ad ten issduriy
x marra udmawen ad yiři řeḥya
u x marra izeǧifen nsen tuqeccart. ◘7:18 Ica. 15:2, 3; Irm. 48:37
19 Ad nḍaren nnuqart nsen deg ibriden
u ureɣ nsen ad yiři am ca n řḥajjet texmej.
Nnuqart nsen d wureɣ nsen
war zemmaren ad ten fekken
deg wass n uduqqez n ufugem n SIDI.
War zemmaren ad zzaysen ssjiwnen
řeɛmar nsen
niɣ ad zzaysen ccuren takrict nsen,
minzi aya tuɣa d ssibbet n uneqraḍ
i dd-yiwyen řmuɛṣiyyet nsen. ◘7:19 Awřn. 11:4; Ṣaf. 1:18
20 Aẓri n telwizt igga i-t d lɛaḍama yuɛřan,
maca nitni ggin dayes
řexyařat n nnɛawat nsen n l’aṣnam
u řexyařat n jjɛayef nsen.
X uya arriɣ talwizt d taxmuji i nitni.
21 Necc ad tt wceɣ d tucceffra
deg ufus n ibarraniyyen
uca ad tt wceɣ d takeccaḍt
i iɛeffanen n temmurt,
uca nitni ad ssɛiǧten talwizt.
22 Necc ad xas ssenqeřbeɣ udem inu
u nitni ad ssɛiǧten tazeddiɣt inu innufaren,
maɣar iceffaren ad din adfen
uca ad ssɛiǧten marra.’
23 ‘Sewjed ssnesřet,
minzi tammurt teccur s usizzeř n idammen
u tandint teccur s lɛunf.
24 Necc ad awyeɣ řegnus iɛeffanen qaɛ,
u nitni ad ṭṭfen tudrin nsen,
ad ssbedden nnfaxet n ayt n jjehd,
uca ad ttwassɛiǧtent
Tzawiyyin nsen Iqeddsen.
25 Ad dd-yas unexřiɛ d ameqqran.
Nitni ad arzun řehna,
maca war ittiři.
26 Aqa ad dd-yas uceřwaw awarni i uceřwaw,
ad yiři řhard awarni i řhard.
Nitni ad arzun řewḥiy n unabi,
waxxa teqḍa Ccariɛa n ukehhan
d ccwar n imɣaren
27 Ajeǧid ad icḍen,
řḥakem ad yarḍ anexřiɛ
u ifassen n řgens
ad qarrmen s tiggʷudi.
Necc ad zzaysen ggeɣ am webrid nsen
u Necc ad xasen ḥekmeɣ
am lfarayiḍ nsen.
Ammu i ɣa ssnen aqa Necc d SIDI.’ ”
◼7:7 7:7 tasaɛɛet - s Tɛibranit ‘řweqt’.
◘7:17 7:17 Ica. 13:7; Irm. 6:24
◘7:18 7:18 Ica. 15:2, 3; Irm. 48:37
◘7:19 7:19 Awřn. 11:4; Ṣaf. 1:18