1 “Uca cek, a mmis n bnadem, ksi ijj n řmus iqḍeɛ, ksi ijj řmus n uḥeffaf uca sekk i-t x uzeǧif nnec u x tmart nnec. Xenni ad teksid ijj n řmizan uca acuwwaf ad ten tebḍid. ◘5:1 2 Ṣm. 10:4 2 Ict n ttuřut ad tt tesscemḍed di řwesṭ n tendint awarni řami i ɣa kemmřen wussan n řeḥṣaret uca ad teksid ict n ttuřut nneɣni, ad tewted s ssif nnec deg wenneḍ nnes uca ict n ttuřut nneɣni ad tt tzuzzared deg usemmiḍ u Necc ad jebdeɣ ssif awarni as. ◘5:2 Lawi 26:33; Zak. 13:8 3 Ssenni ad teksid cwayt n iẓeṭṭan uca ad ten tcedded deg ibeḥruren n upartessu nnec. ◼5:3 ssenni - ixs ad yini ‘zi Babil’ mani tuɣa zeddɣen Wudayen awařni řami ten yiwi Nabuxadnaṣṣar di tmeḥbast ɣar Babil. 4 Ad zzayes teksid ɛad cwayt n iẓeṭṭan uca ad ten tenḍared di řwest n tmessi uca ad ten tesscemḍed s tmessi. Ssenni ad teffeɣ tmessi x marra taddart n Israil.”

5 “Ammu i iqqar Sidi inu, SIDI: Ta d Urcalim i ẓẓuɣ di řwesṭ n řegnus, ak-d temmura i d as dd-innḍen. 6 Maca nettat tɣewweɣ x lfarayiḍ inu mahu řegnus, uřa x tweṣṣa inu mahu timmura i d as dd-innḍen, minzi nitni nḍaren lfarayiḍ inu u tiweṣṣa inu war tent ḍfaren.” 7 “S uya, ammu i iqqar Sidi inu, SIDI: ‘Minzi kenniw teggim mahu řegnus i d awem dd-innḍen, war tuyurem di tweṣṣa inu u war teggim lfarayiḍ inu, ɛad war teggim ɛlaḥsab lfarayiḍ n řegnus i d awem dd-innḍen’, ◘5:7 Lawi 18:24, 28 8 s uya, ammu i iqqar Sidi inu, SIDI: ‘Xzar, uřa d Necc ad xam qeřbeɣ u ad ggeɣ řeḥkamat di řwesṭ nnem zzat i tiṭṭawin n řegnus. 9 Ad zzayem ggeɣ am mammec ɛemmarṣ war ggiɣ u war tteggeɣ ɛemmarṣ ɛad zi ssa d tsawent, zi ssibbet n marra jjɛayef nnem. 10 S uya ibabaten ad ccen arraw di řwesṭ nnem uca arraw ad ccen ibabaten nsen. Necc ad am ggeɣ řeḥkamat u marra min zzayem iqqimen ad t zuzzareɣ ɣar marra tiɣemmura n usemmiḍ.’ ” ◘5:10 Lawi 26:29; Aɛwd. 28:53; 2 Ij. 6:29; Igjd. 4:10

11 “S uya, s tidett am ddareɣ Necc, ammu i iqqar Sidi inu, SIDI: S tidett, uřa d Necc ad qeḍɛeɣ, war zziǧizeɣ, war areḥḥmeɣ, umi tessxemjed Zzawect inu Iqeddsen s marra nnɛawat nnem n l’aṣnam u s marra jjɛayef nnem! ◘5:11 Ḥiz. 7:4 12 Ict n ttuřut n imezdaɣ nnem ad temmet s ṭṭaɛun u s řaẓ di řwesṭ nnem, uca ict n ttuřut nneɣni ad tewḍa s ssif deg wenneḍ nnem, u ɛad ict n ttuřut ad tt zuzzareɣ ɣar marra tiɣemmura n usemmiḍ u awarni asen ad dd-jebdeɣ ssif. ◘5:12 Irm. 15:2 13 Aɣḍab inu ad ijjiwen ař uneggar uca ad xasen ssarseɣ asɛar inu. Ammu i ɣa ssfewwjeɣ ixef inu u nitni ad ssnen, aqa Necc, SIDI, ssiwřeɣ di tusmi inu iqeddsen, xmi ɣa kemmřeɣ asɛar inu xasen. 14 Ad cem arreɣ d řxirbet d ict n řqecɛet n ustehzi jar řegnus i d am dd-innḍen, zzat i tiṭṭawin n kuř ijj nni i ɣa iɛdun. 15 Ad tedweř Urcalim i ustehzi d řḥegra, i umedya n useqseḥ d usiggʷed i řegnus i d as dd-innḍen, xmi d as i ɣa qḍeɣ řeḥkamat s weɣḍab u s wesɛar u s tiyitta iḥman. Necc, SIDI, aqa ssiwřeɣ! ◘5:15 Aɛwd. 28:37 16 Xmi ten ɣa wteɣ s fřitcat n řaẓ nni dd ɣa yawyen areddeǧ, tinni ɣa wteɣ ḥima ad kenniw sshellkeɣ, xenni ad xawem arniɣ řaẓ u ad arẓeɣ řeɛweč n weɣrum nwem. ◘5:16 Lawi 26:26; 2 Ij. 6:25; Ica. 3:1; Ḥiz. 4:16; 14:13 17 Ad xawem sekkeɣ řaẓ d řewḥuc iwɛaren nni i ɣa ikksen tarwa nnem. Ṭṭaɛun d usizzeř n idammen ad kken xam u Necc ad xam ssekkeɣ ssif. Necc, SIDI, aqa ssiwřeɣ!” ◘5:17 Lawi 26:22