1 Ayt n inabiyyen nnan i Ilicaɛ: “Xzar, amcan mani nzeddeɣ zzat i wudem nnec, iḥṣar i neccin.” 2 Ejj aneɣ ad nuyur ɣar L’Urdun u dinni qaɛ ijj zzayneɣ ad dd-yawi ijj n ukeccuḍ, maḥend ad negg ict n tzeddiɣt i neccin.” Netta inna: “Uyurem!” 3 Ijjen zzaysen maca inna: “Ɛafak, uyur ak-d imsexxaren nnec.” Netta inna: “Necc akidwem uyureɣ.” 4 Xenni yuyur akidsen. Umi dd-usin ɣar L’Urdun, zedmen ticejjura. 5 Řami izdem ijj ict n tcejjart, imsar, aqa řeqḍeɛ n wuzzař n ccaqur iwḍa deg waman uca netta iřaɣa, inna: “A sidi inu, ccaqur tuɣa ittwarḍeř!” 6 Aryaz n AREBBI inna: “Mani iwḍa?” Umi d as isscen amcan, iqess ijj n ukeccuḍ, inḍar i-t din u ammu yiwi-dd uzzař iggur sennej. 7 Inna netta: “Sgeɛɛed i-t-i-dd ɣarek!” Xenni isswiẓẓeḍ s ufus nnes uca iṭṭef i-t.

8 Ajeǧid n Aram immneɣ ak-d Israil uca imcawar ak-d imsexxaren nnes, inna: “Deg wemcan-in d win ad wteɣ iqiḍan i řɛeskar inu.” 9 Maca aryaz n AREBBI issekk ijj ɣar ujeǧid n Israil, inna: “Ḥḍa ixef nnec ad tekked x wemcan nni, maɣar din hwan ayt n Aram.” 10 Ajeǧid n Israil issekk ireqqasen ɣar wemcan i x tuɣa akides issiweř weryaz n AREBBI u i zi tuɣa i d as iɛřem wanita, uca igga ad ḥḍan din. U man aya war imsar ca ict n twařa niɣ tnayen n twařawin waha. 11 Uř n ujeǧid n Aram ihaj x man aya u netta iřaɣa i imsexxaren nnes, inna asen: “Ma war tzemmarem kenniw ad ayi tinim man wen jar aneɣ ittraḥ ak-d ujeǧid n Israil?” 12 Ijjen zeg imsexxaren nnes inna: “Lla, sidi inu, ajeǧid! Maca Ilicaɛ, anabi wenni iǧan di Israil, issargeb ujeǧid n Israil awařen i tessawařed deg wexxam nnec n yiḍeṣ.” 13 Inna netta: “Uyurem uca xzarem mani ittiři netta. Xenni ad ssekkeɣ iryazen inu, ad t ṭṭfen.” Xebbaren t, nnan: “Netta aqa-t di Dutan.” 14 Xenni issekk netta iysan d ikarruten d ijj n řɛeskar ameqqran. Nitni iwḍen din di ǧiřet uca nnḍen-dd i tendint.

15 Amsexxar n AREBBI ikkar ɣar tuffut uca iffeɣ ɣar barra, u xzar, ijj n řɛeskar tuɣa inneḍ i tendint s yeysan d ikarruten. Xenni inna as aḥudri: “A sidi inu, min ɣa negg?” 16 Netta inna: “War tteggʷed ca, maɣar inni ɣarneɣ aṭṭas x yinni ɣarsen.” ◘6:16 2 Im. 32:7; Yḥ. 16:33; 1 Yḥ. 4:4 17 Ilicaɛ iẓẓuǧ, inna: “A SIDI, arzem as tiṭṭawin, maḥend ad iẓar!” U SIDI yarzem i umsexxar tiṭṭawin ařami itwařa. U xzar, adrar iccur s yeysan d ikarruten n tmessi i dd-innḍen i Ilicaɛ. 18 Umi ɣares dd-usin nitni, iẓẓuǧ Ilicaɛ i SIDI, inna: “Wwet maca řgens-a s tuddarɣeč!” Uca netta iwta ten s tuddarɣeč ɛlaḥsab awař n Ilicaɛ.

19 Xas uca inna asen Ilicaɛ: “Wa war iǧi d abrid nican u war teǧi d tandint nican. Ḍfarem ayi-dd! Necc ad kenniw nedheɣ ɣar weryaz nni x tarezzum!” U netta indeh i-ten ɣar Samarya. 20 Umi iwḍen nitni ɣar Samarya, imsar, aqa Ilicaɛ inna: “A SIDI arzem tiṭṭawin n iryazen-a, maḥend ad ẓaren!”. Uca yarzem asen SIDI tiṭṭawin ařami ẓrin. U xzar, aqa nitni tuɣa aten di řwesṭ n Samarya. 21 Umi ten iẓra, inna ujeǧid n Israil i Ilicaɛ: “Ma ad ten nɣeɣ, a baba?” 22 Maca wanita inna: “War ten neqq ca! Cek s yixef nnec, ma ad tenɣed inni tḥebbsed s ssif nnec d řqews nnec? Sars asen-dd aɣrum d waman maḥend ad ccen ad swen, uca xenni ad ɛeqben ɣar sidi nsen.” 23 Issewjed asen ijj n umensi d ameqqran uca nitni ccin, swin. Awarni aya yarxu asen uca ffɣen ɣar sidi nsen. Xenni war dd-usint bandiyyat n Aram ɛad di temmurt n Israil.

24 Awarni uya imsar, aqa Binhadad, ajeǧid n Aram, issmun marra řɛeskar nnes, iffeɣ, ḥima ad inneḍ i Samarya. 25 Imsar ijj n řaẓ d ameqqran di Samarya, maɣar xzar, nitni nnḍen as-dd ařami idweř ijj n uzeǧif n ijj weɣyuř isekkwa tmenyin n uqiyyat n nnuqart d yijj n arrbeɛ n ijj n řeqyas s řeɣbar n wedbir idweř isekkwa xemsa n uqiyyat n nnuqart. 26 Umi iɛdu ujeǧid n Israil x řḥiḍ, imsar, belli třaɣa as-dd ict n temɣart, tenna: “Ewc ayi-dd afus, a sidi inu ajeǧid!” 27 Netta inna: “Mařa SIDI war d am iwci afus, mammec necc d am ɣa wceɣ afus? Ma ad yiři s ca zeg unedrar niɣ zi tsirt n uḍiř?” 28 Inna as ujeǧid: “Min cek yuɣin?” Nettat tenna: “Tamɣart-a tenna ayi: ‘Awi-dd mmim, ḥima ass-a ad t necc u mmi ad t necc xenni tiwecca.’ ” 29 Ammu neccin nᵉssnenna mmi uca necca i-t. Maca řami d as nniɣ tiwecca nnes: ‘Ewc řexxu mmim, ḥima ad t necc!’, řexdenni tessnuffar nettat mmis.” ◘6:29 Aɛwd. 28:53

30 Umi isřa ujeǧid awařen n temɣart-a, icarreg arruḍ nnes uca ammu i yuyur x řḥiḍ uca iẓra řgens illa aqa yarḍ ict n txancet n wecḍan x arrimet nnes. 31 Netta inna: “Ejj ad ayi igg AREBBI ta d ta uca ad dayes yarni ɛad, mařa iqqim uzeǧif n Ilicaɛ, mmis n Cafat, xas ař ass-a!” ◘6:31 1 Ij. 19:2

32 Ilicaɛ iqqim di taddart nnes d imeqqranen qqimen ɣares. Tuɣa ujeǧid issekk ijj n weryaz ɣar zzat nnes, maca qbeř ma yiweḍ ureqqas ɣares, inna Ilicaɛ i imeqqranen: “Ma teẓrim aqa wanita, mmis n ijj n uqettař, issekk-dd wenni d ayi ɣa iqessen azeǧif? Ḥḍam řexxu, xmi dd ɣa yas ureqqas, bellɛem tawwart u sbeddem t ɣar tewwart! Ma war ittwaseř řḥess n iṣuraf n sidis awarni as?” 33 Řami tuɣa akidsen issawař ɛad, xzar, ihwa-dd ureqqas ɣares. Uca ajeǧid inna: “Xzar, tuɛeffna-ya zi SIDI. Min ɣa rajiɣ ɛad xenni zi SIDI?”