1 Axab iḥaja i Izabal marra min igga Iliya uřa d marra x mammec inɣa Iliya marra inabiyyen s ssif. 2 Izabal tessekk ijj n ureqqas ɣar Iliya, maḥend ad as yini: “Ad ayi ggen irebbiten ta d ta uřa d ktar zi man aya, mařa war ggiɣ tiwecca di řweqt-a řeɛmar nnec am řeɛmar n ijj zzaysen.” 3 Netta ixzar, ikkar uca iruḥ, ḥima ad injem řeɛmar nnes. Yusa-dd ɣar Bi’r-Sebɛa nni iǧan di Yahuda, uca ijja aḥudri amsexxar nnes dinni. 4 Netta simant nnes yuyur ticři n webrid n ijj n wass di řexřa, iqqim izzeř sadu tazeggʷart n wazzu uca ittar, ḥima ad immet řeɛmar nnes, inna: “Kfa, a SIDI, ksi řexxu řeɛmar inu, maɣar war ǧiɣ ḥsen x řejdud inu.” 5 Xenni izzeř, iṭṭeṣ sadu ict n tzeggʷart n wazzu. U xzar, lmalak iḥada t, inna as: “Kkar, ecc!” 6 Umi netta issgeɛɛed tamuɣři nnes, xzar, zzat i uzeǧif nnes aqa din ict n tefḍiřt i tuɣa ssengʷen tt s řefḥem uřa d ict n tebriqt dayes aman. Xenni icca, iswa uca idweř ɛawed izzeř din. 7 Lmalak n SIDI yusa-dd twařa wiss tnayen, iḥada t, inna: “Kkar, ecc, niɣ abrid ad yiři d azirar xak.” 8 Netta ikkar, icca, iswa. S jjehd n macca yuyur ticti n arebɛin n wussan d arebɛin n ǧiyaři ař adrar n AREBBI, Hurib. ◘19:8 Uf. 34:28; Mt. 4:2

9 Dinni yiweḍ ɣar ijj n yefri uca issens dinni. U xzar, yusa as-dd awař n SIDI, inna as: “Min da i ɣa tegged, Iliya?” 10 Netta inna: “Necc cḍareɣ ař ṭṭarf di ṭṭweɛ n SIDI, AREBBI n řɛeskarat, maɣar ayt n Israil semḥen di Řɛahd nnec, hedmen iɛalṭaren nnec u inabiyyen nnec ttwanɣen s ssif, mɣir necc d wenni iqqimen u nitni arezzun ad ayi kksen uřa d tudart inu.” ◼19:10 tudart - s Tɛibranit ‘řeɛmar’.  ◘19:10 Rum. 11:3

11 Netta inna: “Ffeɣ, bedd x wedrar zzat i wudem n SIDI.” U xzar, iɛdu-dd SIDI. Ict n tḥaryaḍt temɣar u tejhed aqa tewta idurar u teřbez řejruf zzat i wudem n SIDI. Maca SIDI tuɣa war iǧi ca di tḥaryaḍt. Awarni i tḥaryaḍt yusa-dd ijj n wenhezzi n temmurt. Maca SIDI tuɣa war iǧi ca deg wenhezzi n temmurt. 12 Awarni i wenhezzi n temmurt tusa-dd tmessi. Maca SIDI tuɣa war iǧi ca di tmessi. Awarni tmessi tuɣa din ict n tmijja tefsus, tarsa.

13 Umi isřa Iliya, imsar aqa iřeḥḥef aɣembub nnes deg upartessu nnes, iffeɣ ɣar barra uca ibedd ɣar uqemmum n yefri. U xzar, ict n tmijja issiweř akides, tenna: “Min da tegged Iliya?” 14 Netta inna: “Necc cḍareɣ ař ṭṭarf di ṭṭweɛ n SIDI, AREBBI n řɛeskarat, maɣar ayt n Israil semḥen di Řɛahd nnec, hedmen iɛalṭaren nnec, u inabiyyen nnec ttwanɣen s ssif, mɣir necc d wenni iqqimen, u nitni arezzun ad kksen uřa d tudart inu.”

15 Inna as SIDI: “Uyur, ɛqeb abrid nnec ɣar řexřa n Dimacq u xmi ɣa tawḍed ɣar din, dhen Ḥazayil d ajeǧid x Aram! 16 Uřa d Yahu, mmis n Nimci, ad t tdehned d ajeǧid x Israil uca Ilicaɛ, mmis n Cafat zi Abal-Maḥula, dhen i-t d anabi deg wemcan nnec. 17 Ad imsar, aqa Yahu ad ineɣ wi ɣa inejmen i ssif n Ḥazayil, u Ilicaɛ ad ineɣ wi ɣa inejmen i ssif n Yahu. ◘19:17 2 Ij. 9:14-37 18 Xenni jjiɣ Necc di Israil sebɛa-ařaf n řeɛmur, marra inni ifadden nsen war qqunjeřen zzat i Baɛl u marra inni war t issudmen s uqemmum nsen.” ◘19:18 Rum. 11:4

19 Iffeɣ Iliya ssenni, yufa Ilicaɛ, mmis n Cafat. Netta tuɣa icarrez s tenɛac n izayřuten n iyenduzen u netta simant nnes icarz x wiss tenɛac. Iliya iɛdu ɣares, inḍar xas apartessu nnes. 20 Řexdenni ismeḥ deg ifunasen, iɛřef awarni i Iliya, inna: “Ttzawgeɣ, ejj ayi ad ssudmeɣ baba d yemma i uqebbeḍ, xenni ad cek ḍfareɣ.” Netta inna as: “Uyur, dweř, minzi min dayek ggiɣ necc?” 21 Iɛqeb netta xenni awarni as, iksi ijj n uzayřu n ifunasen uca iɣarṣ asen. S ukeccuḍ n uzayřu issnenna aysum nsen, iwca i-t i řgens maḥend ad icc. Awarni uya ikkar, uca iḍfar Iliya, isexxar as.