1 SIDI inna i Musa: “Qess i yixef nnec tnayen n teřwiḥin n weẓru am tmezwura, uca Necc ad ariɣ x teřwiḥin nni awařen d ijjen i tuɣa di teřwiḥin timezwura i tarẓid. ◘34:1 Aɛwd. 10:1 2 Sewjed i ṣṣbeḥ uca geɛɛed di ṣṣbeḥ ɣar wedrar n Sina uca bedd din zzati x tqiccet n wedrar. 3 War iɛeddeř ad igeɛɛed uřa d ijj n bnadem akidek, niɣ ad iban ḥed deg wedrar am ikmeř. Uřa d uǧi d ifunasen d tfunasin war zemmaren ad arewsen ṭṭarf i wedrar.” ◼34:3 bnadem - s Tɛibranit ‘aryaz’.  ◘34:3 Uf. 19:12, 13

4 Xenni iqess tnayen n teřwiḥin n weẓru am tmezwura, uca ikkar Musa di ṣṣbeḥ zic uca igeɛɛed ɣar wedrar n Sina am mammec t iweṣṣa SIDI uca yiwi akis deg ufus nnes tnayen n teřwiḥin n weẓru.

5 Ihwa-dd SIDI deg useynu, ibedd akides din uca iřaɣa s Yisem n ‘SIDI’. 6 Iẓwa SIDI zzat i uɣembub nnes uca iɛeyyed: “SIDI, SIDI, Arebbi, d wenni iccuren s arreḥmet d teḥnunect, ɣares ttasiɛ n řxaḍar, dayes aṭṭas n tmexsiwt icewwaren d řaman, ◘34:6 Uf. 33:19 7 d wenni iḥeṭṭan tamexsiwt nnes icewwaren i řuřuf, d wenni iɣeffaren řmuɛṣiyyet d xeṭṭu d ddnub, d wenni war ittbarrin wenni itteggen ddenb, d wenni dd-yarezfen řmuɛṣiyyet n ibabaten deg iḥenjiren u deg iḥenjiren n iḥenjiren nsen ař jjiř wiss třata d wiss arebɛa.” ◘34:7 Uf. 20:6; Řxř. 14:18; Aɛwd. 5:10; Izhd. 86:15; 103:8; 145:8; Irm. 32:18

8 Musa yuḍar s wudem nnes ɣar temmurt uca ibendeq. 9 Inna: “A Sidi inu, mařa ufiɣ xenni arḍa di tiṭṭawin nnec, ad yuyur xenni Sidi inu di řwesṭ nneɣ, minzi řgens iqseḥ. Ɣfar aneɣ řmuɛṣiyyet nneɣ u qbeř aneɣ d řwart nnec!” ◘34:9 Lawi 25:38; Izhd. 28:9; 33:12; Zak. 2:16 10 Netta inna: “Xzar, Necc ad ggeɣ Řɛahd. Zzat i marra řgens nnek, ad ggeɣ řeɛjayeb war ittwaggen ca di marra tammurt u jar marra řegnus, ařami marra řgens di řwesṭ nnes i zi teǧid, ad iẓar min igga SIDI, minzi min ɣa ggeɣ akidek ad isseggʷed aṭṭas. ◘34:10 Aɛwd. 5:2; Yac. 10:12, 13 11 Ḥḍa min x cek weṣṣiɣ ass-a! Xzar, ad aẓẓřeɣ zzat i uɣembub nnec x Imuriyyen d ayt n Kenɛan d Iḥittiyyen d Ifiriziyyen d Iḥiwiyyen d Iyibusiyyen. 12 Ɣarek ad tegged řɛahd ak-d umezduɣ n temmurt mani ɣa tadfed, ḥima netta war d ac ittiři d řfex di řwesṭ nnec. ◘34:12 Uf. 23:32; Řxř. 33:51; Aɛwd. 7:2 13 Ittxeṣṣa awem ad tɣeḍřem iɛalṭaren nsen u ad tarẓam imayḍuten nsen iqeddsen u ad thedmem tirebbin nsen n cwarti. 14 War ttbendiq i arebbi nneɣni, minzi SIDI, wenni umi qqaren ‘Anessam’, aqa-t d ijj n Arebbi ittasmen. ◼34:14 Anessam - Arebbi ixs aqa iwdan ad ɛebden Netta waha, minzi war dinni Arebbi yuɛřan x marra min iǧan am Netta. S uyenni nzemmar ad nini aqa Netta ittasem, Netta war ittexs ad t neɣdar, ad nuyur awarni i irebbiten nneɣni. Awař ‘anessam’ ixs ad yini ‘wenni ittasmen’.  ◘34:14 Uf. 20:5 15 Ɣarek ad tegged řɛahd ak-d imezdaɣ n temmurt, uca xenni ad ssfesden nitni ixef nsen umi ɣa dewřen awarni i irebbiten nsen, ad qeddmen tiɣarṣa i irebbiten nsen, uca ad cek ɛarḍen i macca n tɣarṣa nsen. 16 Ad teksid tiḥenjirin nsen d timɣarin i iḥenjiren nnec, maca ad ssfesdent tḥenjirin nsen ixef nsent umi ɣa dewřen awarni i irebbiten nsent uca ad arrent iḥenjiren nnec ad dewřen awarni i irebbiten nsent. ◘34:16 1 Ij. 11:2

17 War ttegg i yixef nnec irebbitten n ufessay. ◼34:17 irebbiten n ufessay - ixs ad yini ‘řexyarat ifesyen n irebbiten nsen’.

18 Ad teḥḍiḍ Řɛid n Weɣrum břa Antun: sebɛa n wussan ad tecced aɣrum břa antun, di řweqt ittwaggen deg uyur Abib, am mammec cek weṣṣiɣ, minzi deg uyur Abib i dd-teffɣed zi Miṣra. ◘34:18 Uf. 12:15; 23:15

19 Marra min yarezzmen řemřawet d amezwaru Inu, marra iwetman n řebhayem nnec i ɣa yarzzmen řemřawet d amezwaru, am wenni n ufunas, am wenni n wuǧi. ◘34:19 Uf. 13:2; 22:29; Ḥiz. 44:30 20 Mařa amenzu n weɣyuř yarzem řemřawrat d amezwaru, ad t tefdid s yijj zeg wuǧi. Mařa war t tefdid, ad as tarẓed iri. Ad tefdid marra imenza n iḥenjiren nnec.

War iɛeddeř ad ḍharen s ifassen xwan zzat i wudem inu. ◘34:20 Uf. 13:13; 23:15; Aɛwd. 16:16

21 Setta n wussan ad txedmed, maca deg wass wiss sebɛa ad tareyyḥed. Uřa di řweqt n tyarza d tmeyra ad tareyyḥed. ◘34:21 Uf. 20:9

22 Ad tegged Řɛid n Simanat, aqa-t d Řɛid n Tmenzut n tmeyra n yirden, uřa d Řɛid n Usmuni ɣar uneggar n useggʷas. ◘34:22 Uf. 23:16

23 Kuř aryaz ad dd-iban třata n twařawin deg useggʷas zzat i wudem n Sidi, SIDI, AREBBI n Israil, ◘34:23 Uf. 23:17; Aɛwd. 16:16 24 minzi zzat i uɣembub nnec ad kkseɣ tasɣart n řwart x řegnus uca ad sswesɛeɣ iymiren nnec uca uřa d ijjen ad immeẓri ad yacar tammurt nnec, xmi ɣa tgeɛɛded třata n twařawin deg useggʷas, ḥima ad tbaned zzat i wudem n SIDI, AREBBI nnec.

25 War ttqeddem idammen n tɣarṣt inu ak-d min ixemmaren. Taɣarṣt n Řɛid n Tɣarṣt n Useɛdu war ttnusi ǧiřet ař ṣṣbeḥ. ◘34:25 Uf. 23:18

26 Tamezwarut n tmenzut n wudem n temmurt nnec ad tt-i-dd-tawyed ɣar Taddart n SIDI, AREBBI nnec.

War snenni iɣayḍ d ameẓyan s uɣi n yemmas.” ◘34:26 Uf. 23:19; Lawi 22:27; Aɛwd. 14:21

27 Inna SIDI i Musa: “Ari awařen-a i yixef nnec, minzi am mammec qqaren wawařen-a, aqa ggiɣ Řɛahd akidek u ak-d Israil.” 28 Uca Musa tuɣa din ak-d SIDI arebɛin n wussan d arebɛin n ǧyaři. War icci aɣrum niɣ iswa aman. Uca yura di teřwiḥin awařen n Řɛahd, Ɛecra n Wawařen. ◘34:28 Uf. 24:1, 18; 31:18; 34:1; Aɛwd. 4:13; 9:9, 18; 10:2

29 Řami dd-ihwa Musa zeg wedrar n Sina, am tuɣa tnayen n teřwiḥin n Cchadet deg ifassen n Musa am dd-ihwa zeg wedrar, imsar aqa war issin Musa belli tiřmect n uɣembub nnes tareqq minzi tuɣa akides issawař. ◘34:29 2 Kur. 3:7 30 Harun d marra ayt n Israil ṣewḍen ɣar Musa, u xzar, tiřmect n wudem nnes tuɣa tareqq, ggʷeden ad ɣares dd-qarrben. 31 Iřaɣa-dd xasen Musa uca idweř-dd Harun d marra řḥukkam n tmesmunt ɣares uca issiweř Musa akidsen. 32 Awarni as qarrben-dd marra ayt n Israil uca netta yumur i-ten marra min xef issiweř SIDI akides deg wedrar n Sina. 33 Řami ikemmeř Musa awař nnes akidsen, igga ařeḥḥaf x wudem nnes. ◘34:33 2 Kur. 3:7, 13 34 Xmi i ɣa yiři Musa zzat i wudem n SIDI ḥima ad kides issiweř, ikkes ařeḥḥaf, ař dd-iffeɣ ɛawed. U řami dd-iffeɣ ɣar barra, issiweř ak-d ayt n Israil min d as yumur SIDI. 35 Uca ẓrin ayt n Israil aɣembub n Musa, aqa tiřmect n wudem nnes tareqq, xenni yarra Musa ařeḥḥaf x wudem nnes, ař dd-yudef ɛawed, ḥima akides issiweř.