145
1 Izři n uṣebbeḥ n Dawud.
Alif. A, AREBBI inu, Ajeǧid,
necc ad Cek ssɛuǧeɣ,
ad barkeɣ Isem nnec i řebda qaɛ.
2 Bit. Kuř ass ad Cek barkeɣ,
ad ssemɣareɣ Isem nnec i řebda qaɛ.
3 Gimel. SIDI d ameqqran,
issdiheǧ asemɣar aṭṭas,
řemɣaret nnes war dayes bu tarezzut. ◘145:3 Ayub 5:9; Izhd. 18:4; 150:2
4 Dalit. Jjiř awarni jjiř
ad issemɣar řexdayem nnec,
ad barrḥen s tmegga nnec timeqqranin. ◘145:4 Aɛwd. 4:9; 6:7
5 Hi. Necc ad ssiwřeɣ
x tissiqt n uɛuǧi n lɛaḍama nnec,
x řexbar n lmuɛjizat nnec. ◼145:5 x řexbar - s Tɛibranit ‘n wawařen’.
6 Waw. Nitni ad ssiwřen
x jjhed n tmegga nnec issaggʷaden,
necc ad barrḥeɣ s řemɣaret nnec.
7 Zayin. Řidaret n tcuni nnec ifeyyḍen
ad tt ggen d ijj n řɛunṣar ittcurcur,
ad sřiwřiwen i tsegda nnec. ◘145:7 Izhd. 119:171
8 Xit. SIDI d arḥim d aḥnin,
ɣares ttasiɛ n řxaḍar
d waṭṭas n tmexsiwt icewwaren. ◘145:8 Uf. 34:6, 7; Řxř. 14:18; Izhd. 86:15; 103:8
9 Tit. SIDI d aṣebḥan i marra,
arreḥmet nnes aqa-tt tiwa
marra timegga nnes.
10 Yud. Marra timegga nnec,
a SIDI, ad Cek qadint,
imtiqqan nnec ad Cek barken.
11 Kaf. Nitni ad ssiwřen
x uɛuǧi n Tgeldit nnec, ad ssiwřen
x timegga nnec timeqqranin,
12 Lamid. ḥima ad barrḥen
s tmegga nnes timeqqranin
i tarwa n bnadem,
s uɛuǧi n lɛaḍama n Tgeldit nnes.
13 Mim. Tageldit nnec
d ict n Tgeldit i řebda,
řeḥkamet nnec ad tiři x kuř jjiř.
14 Samix. SIDI ittsenned
marra inni iwḍan,
ittseggem marra inni iqwisen.
15 Ɛayin. Marra tiṭṭawin ttrajant Cek,
Cek tᵉtticed asen macca
di řweqt nnes ittwaggen. ◘145:15 Izhd. 104:27
16 Pi. Cek tarezzmed afus nnec,
tessyawaned marra min iddaren
ak-d min ixs řxaḍar nsen.
17 Tsadi. SIDI aqa-t nican
di marra ibriden nnes,
ittegg s tmexsiwt icewwaren
di marra timegga nnes.
18 Quf. SIDI yudes i marra
inni xas ittřaɣan,
marra inni xas ittřaɣan di tidett.
19 Rix. Netta igga s řxaḍar
i marra inni t itteggʷden,
ittesřa iɣuyyan nsen u issenjam i-ten.
20 Cin. SIDI iḥeṭṭa x marra inni t ittexsen,
maca marra iɛeffanen itteḥḥa i-ten.
21 Taf. Aqemmum inu ad issiweř
x uṣebbeḥ n SIDI,
marra ddat ad ibarek
Isem nnes iqeddsen, i řebda qaɛ.
◘145:3 145:3 Ayub 5:9; Izhd. 18:4; 150:2
◼145:5 145:5 x řexbar - s Tɛibranit ‘n wawařen’.
◘145:7 145:7 Izhd. 119:171
◘145:8 145:8 Uf. 34:6, 7; Řxř. 14:18; Izhd. 86:15; 103:8
◘145:15 145:15 Izhd. 104:27