1 Ma ittxeṣṣa aneɣ ad awem nweṣṣa ixef nneɣ min neɛna twařa nneɣni? Niɣ neḥdaj, am inneɣni, tibratin n uweṣṣi i kenniw? Niɣ ittxeṣṣa aneɣ ad awem nari ḥima kenniw ad aneɣ tweṣṣam? ◘3:1 2 Kur. 5:12; 10:8. 2 Aqa kenniw d tabrat nneɣ i yuran deg wuřawen nneɣ, ittwassen u ittwassɣaren zeg iwdan marra. 3 Minzi tessnem, aqa kenniw d tabrat n Lmasiḥ i ittwaggen s tsexxart nneɣ, tabrat yuran, war teǧi s ssmex maca s Arruḥ n AREBBI iddaren, war teǧi di teřwiḥin n weẓru, maca di teřwiḥin n wuřawen n weysum. ◘3:3 Uf. 24:12; 34:1; Irm. 31:33; Ḥiz. 11:19; 36:26; Ɛbr. 8:10. 4 Maɣar ammu i teǧa ttiqqet i ɣarneɣ di Lmasiḥ zzat i AREBBI. 5 War nzemmar ad neḥseb ca n řḥajjet axmi dd-tusa zzayneɣ, maca tizemmar nneɣ tusa-dd zi AREBBI. 6 Netta yarra aneɣ aqa nesdaheǧ ad niři d imsexxaren i Řɛahd n Jdid, war iǧi s tira s lḥuruf, maca s tirra n Arruḥ, minzi tira s lḥuruf neqqent, maca Arruḥ isseddar. ◘3:6 Irm. 31:31; Mt. 26:28, Mk. 14:24, Lk. 22:20, 1 Kur. 11:25, 2 Kur. 3:6, 5:18; Ɛbr. 8:6, 8, 13; 9:15; 12:24; 2 Kur. 5:18;

7 Maca mařa tuɣa tsexxart n řmewt i ittwaxebcen s tira deg iẓra s wanect uɛuǧi maḥend tarwa n Israil war zemmaren ad sewḍen ɣar wudem n Musa x ssibbet n uɛuǧi n uɣembub nnes, waxxa aɛuǧi nni iɛeddun, ◘3:7 Uf. 24:12; 34:1, 30; Aɛwd. 10:1. 8 mecḥař ktar i ɣa tiři tsexxart n Arruḥ deg uɛuǧi? 9 Minzi mařa tasexxart i ineddhen ɣar lḥisab tuɣa-tt s uɛuǧi, mahu ɛad tasexxart i ineddhen ɣar tsegda ad dd-tawi aɛuǧi ař afeyyeḍ. 10 Minzi min ittwassɛuǧen, iban-dd war ittwassɛuǧi ca deg wudem n uɛuǧi-ya i xas iɛuǧen. 11 Minzi mařa min iɛeddun tuɣa ɣares aɛuǧi, mahu min iqqimen ad ɣares yiři uɛuǧi.

12 Ejj aneɣ xenni, maɣar ɣarneɣ asitem am wanita, ad nuyur s teryast, 13 war nᵉttegg ca am Musa, wenni iggin lltam x wudem nnes, maḥend tarwa n Israil war sekkweḍen ca aneggar n min ɣa iɛdun. ◘3:13 Uf. 34:35; Rum. 10:4. 14 Maca ixarriṣen nsen ttwassdaraɣřen, minzi ař ass-a ittɣima lltam d ijjen x teɣri n Řɛahd Aqdim břa ma d asen ittwassargeb, aqa lltam ittwabḍeř di Lmasiḥ. ◘3:14 Ica. 6:10; Ḥiz. 12:2; Mt. 13:11; Řex. 28:26; Rum. 11:8. 15 Ař ass-a, xmi d ɣa ɣaren zeg idlisen n Musa, lltam aqa-t x wuř nsen. 16 Maca xmi dd ɣa idweř ḥed zzaysen ɣar SIDI, lltam ad zzayes ittwakkes. ◘3:16 Mt. 13:11; Rum. 11:23; 1 Kur. 2:10. 17 Aqa SIDI s Yixef nnes d Arruḥ uca mani iǧa Arruḥ n SIDI, aqa din tiřelli. ◘3:17 Yḥ. 4:24. 18 Maca marra neccin nettwařa aɛuǧi n SIDI s iɣembab war iřeḥḥfen amecnaw di tisit, uca ad nbeddeř zeg uɛuǧi ɣar uɛuǧi ɣar ṣṣifet d icten, am s uɣembub n SIDI, Arruḥ. ◘3:18 1 Kur. 13:12; 2 Kur. 5:7.