1 Degga aqa ggiɣ t deg yixef inu, aqa war ɣarwem dd-ttiseɣ twařa nneɣnit s wecḍan. 2 Minzi mařa zeɛma necc ssffugmeɣ kenniw, wi xenni d ayi ɣa issfarḥen mɣir wenni di ggiɣ afugem? 3 Uriɣ awem-dd man aya, ḥima necc, xmi dd ɣa yawḍeɣ din, war ttwassffugmeɣ ca zeg inni ittxeṣṣa ad zzaysen farḥeɣ. Aqa ttiqqeɣ daywem marra, belli řefraḥet inu, aqa-tt d řefraḥet nwem marra. ◘2:3 2 Kur. 8:22; Gal. 5:10. 4 Minzi uriɣ awem-dd di řmeḥnet temɣar s waṭṭas n imeṭṭawen uřa s wuř yarejfen, war iǧi ḥima ad tffugmem, maca ḥima ad tessnem tayri i ɣari i kenniw s ufeyyeḍ.

5 Maca mařa din wenni issffugmen, netta war d ayi issffugem waha, maca zeg ijj n uɣezdis i kenniw marra, ařami war kenniw ssḍeqřeɣ ɛad ktar s wawař-a. 6 Cfa yas i wanita, aqa azyen ameqqran zzaywem tuɣa iwebbex i-t. ◘2:6 1 Kur. 5:3. 7 Zi jjihet nneɣni aqa ittxeṣṣa awem řexxu ad as tsamḥem uca ad xas tessfewwjem, ḥima war xas yarenni ufugem ař aneggaru. 8 S uyenni ttzawageɣ kenniw maḥend ad as tesstebbtem tayri nwem i netta. 9 Minzi ɛawed i man aya uriɣ awem-dd, ḥima ad ssneɣ s tidett, ma tᵉttᵉṭṭaɛem di marra. 10 Wenni umi tsamḥem, necc ɛawed ad as samḥeɣ. Minzi x mixef umi d as samḥeɣ, samḥeɣ t di ṭṭweɛ nwem qibač i wudem n Lmasiḥ, 11 ḥima xenni cciṭan war d aneɣ izemmar, minzi nessen ixarriṣen nnes.

12 Řami dd-iwḍeɣ ɣar Truwas s Řexbar Aṣebḥan n Lmasiḥ, tennurzem ayi-dd tewwart s ufus n SIDI, ◘2:12 Řex. 16:8. 13 maca war areyyḥeɣ ca di arruḥ inu, minzi war ufiɣ ca uma Titus. Uca mmsebḍiɣ xasen, uyureɣ ɣar Makiduniya.

14 Maca aqadi i AREBBI, wenni d aneɣ igga ad niři nᵉttban řebda di Lmasiḥ, uca isscan zzayneɣ řefwaḥet n tussna nnes di marra imucan. ◘2:14 Kul. 1:27. 15 Minzi neǧa d ict n řefwaḥet icnan i AREBBI di Lmasiḥ jar inni iddaren u jar inni i ɣa ittwahellken. 16 I ineggura aqa aneɣ d řefwaḥet n řmewt i řmewt uca i imezwura d řefwaḥet n tudart i Tudart. Uca man wen d as iqedden i ssuq-a? ◘2:16 Lk. 2:34. 17 Aqa neccin war neǧi anect inneɣni inni issfarraɣen awař n AREBBI, maca nessiweř di Lmasiḥ qibač i AREBBI ɛlaḥsab tidett u ɛlaḥsab min iǧan zi AREBBI.