1 Deg wussan nni iffeɣ-dd ijj n řumur zi qayṣar Uɣustus ḥima ad ttwazemmemen marra imezdaɣ n řeḥkamet nnes. ◘2:1 [Mt. 1:18-25] 2 Azemmem-a tuɣa-t d amezwaru umi tuɣa Qiriniyus iḥekkem di Suriya. 3 Kuř ijjen iřuḥ ɣar tendint nnes, ḥima ad ittwazemmem dinni. 4 Igeɛɛed ɛawed Yusuf zi Nnaṣira, ict n tendint di Ljalil, ɣar Yahudiyya, ɣar tendint n Dawud tenni umi qqaren Bayt-Laḥm umi t tuɣa zi taddart u zi jjiř n Dawud, ◘2:4 1 Ṣm. 16; Mixa 5:1; Mt. 1:1; Yḥ. 7:42. 5 ak-d Maryam, tanexḍabt nnes, tenni tuɣa s ddeyset, ḥima ad ittwazemmem dinni.

6 Uca imsar, ařami ten tuɣa dinni, qefřen wussan nnes ḥima ad taru. 7 Turuw-dd Mmis amenzu, tessenneḍ i-t di teḥřucin uca tessars i-t di řkuri, minzi war ɣarsen bu wemcan mani zemmaren ad qqimen. ◘2:7 Mt. 1:25.

8 Di jjwayeh nni tuɣa din ca n imeksawen, ḥeṭṭan tiḥimriwin nsen di ǧiřet. 9 U xzar, lmalak n AREBBI ibedd-dd ɣarsen uca aɛuǧi n SIDI issarɣ xasen, inneḍ asen, uca třeḥḥef asen ict n tiggʷudi temɣar. 10 Inna asen lmalak nni: “War tteggʷedem ca, ad awem barrḥeɣ řexbar aṣebḥan, ad tiři řefraḥet temɣar i ddunect marra. 11 Aqa ittwaxřeq awem-dd ass-a Umsenjem, SIDI, Lmasiḥ, di tendint n Dawud. 12 D wa d awem i ɣa yiřin d řeɛřamet: Ad tafem Aseymi ittwanneḍ di teḥřucin, immars di řkuri.” 13 Řexdenni iban-dd ak-d lmalak ijj n řɣaci ameqqran n řɛeskarat n ujenna ttṣebbaḥen AREBBI, qqaren: ◘2:13 Dan. 7:10; Asa. 5:11.

14 “Aɛuǧi i AREBBI di řuɛřa,

řehna x temmurt,

u asitem d aṣebḥan i yewdan.” ◘2:14 Ica. 57:19; Afa. 2:17.

15 Umi xasen uyurent lmalakat ɣar ujenna, ssiwřen imeksawen ak-d wayawya, nnan: “Ejj aneɣ ad nraḥ ɣar Bayt-Laḥm, ḥima ad nẓar min imsaren min xef d aneɣ issargeb SIDI.” 16 Usin-dd s tazřa, ufin Maryam d Yusuf d Useymi immars di řmedwed. 17 Umi t ẓrin, ɛawden awař i d asen ittwannan x Uḥenjir. 18 Marra inni isřin, tbehten s min d asen nnan imeksawen. 19 Maca Maryam tuɣa txemmeř marra awařen-a, tᵉttxarraṣ daysen deg wuř nnes. 20 Xenni ɛeqben-dd imeksawen, ttṣebbaḥen u ssemɣaran di AREBBI x marra min sřin d marra min ẓrin, nican am mammec d asen tuɣa ittwanna.

21 Umi kemmřen tmenya n wussan, ḥima ad ittwaxten Useymi, semman t ‘Yeccu’, am mammec tuɣa t isemma lmalak qbeř i ɣa ittwaksi deg uɛeddis. ◘2:21 Amz. 17:12; Lawi 12:3; Mt. 1:21; Lk. 1:31; Yḥ. 7:22. 22 Umi kemmřen wussan n usizdeg nsen ɛlaḥsab Ccariɛa n Musa, iwyen t ɣar Urcalim, ḥima ad t qeddmen zzat i SIDI ◘2:22 Lawi 12:6. 23 - am mammec tura di Ccariɛa n SIDI: ‘Aqa kuř mmis amenzu i dd-ittwaxeřqen zeg uɛeddis n yemmas ad ittwasemma d amqeddas i SIDI!’ - ◘2:23 Uf. 13:2, 12; Řxř. 3:13; 8:16, 17. 24 u ḥima ad ḥḍaren taɣarṣt am mammec tᵉttwanna di Ccariɛa n SIDI: tnayen n idbiren niɣ tyuya n iwarruḍen n idbiren. ◘2:24 Lawi 12:8.

25 Tuɣa di Urcalim ijj n weryaz qqaren as Cimɛun. Tuɣa aryaz-a nican d amsegged, ittraja afewwej n Israil uca tuɣa Arruḥ Iqeddsen xas. 26 Tuɣa Arruḥ Iqeddsen iweḥḥa as-dd aqa war ittmetti ca qbeř i ɣa iẓar Lmasiḥ n SIDI. 27 Yusa-dd ɣar Zzawect Tameqqrant am t iɛarren Arruḥ Iqeddsen, umi dd-udfen lwalidin s Uḥenjir Yasuɛ, ḥima ad as ggen ɛlaḥsab lqaɛida n Ccariɛa. 28 Iksi t deg iɣaǧen nnes uca ibarek AREBBI, inna:

29 “A Sidi inu, ejj amsexxar nnec

ad iraḥ di řehna řexxu,

ɛlaḥsab awař nnec, ◘2:29 Amz. 46:30.

30 minzi tiṭṭawin inu ẓrint arreḥmet nnec, ◘2:30 Izhd. 98:2; Ica. 52:10.

31 i tesswejded zzat i wudem n marra řegnus: ◘2:31 Řex. 28:28.

32 Tafawt i ɣa tᵉttwasargeb i řegnus

d uɛuǧi i řgens nnec Israil!” ◘2:32 Ica. 42:6; 49:6; Řex. 13:47.

33 Itebhet Yusuf d yemmas s min xas ittwannan. 34 Xenni ibark i-ten Cimɛun, inna i Maryam yemmas:

“Aqa Wa immars i uweṭṭu d tnukra

n waṭṭas di Israil

u i řeɛřamet i ɣa ittwaɛekksen. ◘2:34 Ica. 8:14; Rum. 9:32; 1 Bṭ. 2:8.

35 Ad icuq ssif di řeɛmar nnem,

ḥima ad dd-ttwasseḍharen ixarriṣen

zeg waṭṭas n wuřawen.”

36 Ict n tnabit, qqaren as Ḥanna, yeǧis n Fanwil, zi teqbič n Acir, tuɣa-tt uřa d nettat tewsar aṭṭas. Teddar ak-d weryaz nnes sebɛa n iseggʷusa zeg wami tt tuɣa ɛad d taɛzarect. 37 Tuɣa-tt d tajjač i yijj n řmijař n arebɛa u-tmanyin n iseggʷusa, war tᵉttbeɛɛid ca x Zzawect Tameqqrant. Tuɣa tɛebbed AREBBI s uẓummi d tẓaǧit ǧiřet d wass. ◘2:37 1 Ṣm. 1:22. 38 Ɣar tsaɛɛet nni tbedd nettat ɛawed, tᵉttṣebbaḥ i SIDI, tessawař xas ak-d marra inni ittrajan asenjem n Urcalim. ◼2:38 asenjem - niɣ ‘asellak’.

39 Umi kemmřen nitni kuřci ɛlaḥsab Ccariɛa n SIDI, ɛeqben ɣar tendint nsen Nnaṣira di Ljalil. 40 Tuɣa Aḥenjir iggam, yarenni dayes Arruḥ, idweř iccur s tiɣit, u arḍa n AREBBI aqa-t xas. ◘2:40 Lk. 1:80.

41 Tuɣa řaǧ nnes ttraḥen kuř aseggʷas ɣar Urcalim di Řɛid n Tɣarṣt n Useɛdu. ◘2:41 Uf. 23:15, 17; Lawi 23:5; Aɛwd. 16:1. 42 Umi ɣares yiweḍ tenɛac n iseggʷusa, geɛɛden ɣar Řɛid am mammec nnumen nitni. 43 Awarni řami ɛdun wussan n Řɛid, ɛeqben-dd, maca Aḥenjir, Yasuɛ, iqqim awarni asen di Urcalim, umi Yusuf d yemmas war argiben ca x man aya. 44 Ittɣiř asen aqa-t jar imsebriden. Awarni řami uyuren ict n ticři n wass, arezzun xas jar řaǧ nsen d yinni ten issnen. 45 Umi war t ufin, ɛeqben ɣar Urcalim, arezzun xas. 46 Awarni třata n wussan ufin t di Zzawect Tameqqrant, tuɣa iqqim di řwesṭ n imesɣaren n Ccariɛa, ittesřa ɣarsen, ittseqsa ten. 47 Marra inni d as isřin tbehten di řefhamet d wawař i dd-ittarra. ◘2:47 Mt. 7:28; Mk. 1:22; Lk. 4:22, 32; Yḥ. 7:15. 48 Řami t ẓrin, tbehten. Tenna as yemmas: “A Mmi, mayemmi d aneɣ teggid ammu? Aqa, babac d necc nedɛeq s tarezzut xak.” 49 Inna asen: “Mayemmi xafi tarzum? Ma war targibem ca belli ittxeṣṣa ayi ad iřiɣ di Taddart n Baba?” 50 Maca war fhimen awař i d asen inna. ◘2:50 Lk. 9:45; 18:34. 51 Uca ihwa-dd akidsen ɣar Nnaṣira, tuɣa ittegg asen array. Maca yemmas txemmeř marra awařen-a deg wuř nnes.

52 Uca tuɣa Yasuɛ yarenni di tiddi nnes d tiɣit nnes u di arḍa ɣar AREBBI d yewdan. ◘2:52 1 Ṣm. 2:26; Lk. 1:80.